Garchi ko‘pchilik muxlislar professional futbolchilarni har kuni 90 daqiqadan bemalol o‘ynay oladilar, deb o‘ylashsada, aslida ular hatto mashq qilishga ham yaramay qolishlari mumkin. Ko‘pincha ishqibozlar haftalab to‘p suradigan ayrim futbolchilar o‘zlarini o‘ta og‘ir jismoniy yuklamalarga jalb etishlarini unutib qo‘yadilar. E’tiboringizga qandaydir sabablarga ko‘ra juda kam mashq qiladigan futbolchilar haqidagi materialni havola etamiz.
LEDLI KING
O‘z vaqtida unga qarshi to‘p surgan Tyerri Anri Ledlini dunyoning eng yaxshi himoyachilaridan biri sifatida e’tirof etgandi. Chindan ham, King yuksak saviyali futbolchi edi. Tizzasidagi surunkali muammolar tufayli himoyachi «Tottenxem»dagi mashg‘ulotlar tugul, bolalar bilan o‘ynashga ham yaramaydigan holatda edi. Biroq shunga qaramasdan, u jamoaning barcha o‘yinlarida maydonga tushar va albatta, «master-klass» darajasini namoyish etardi.«Hafta davomida bir marta ham mashg‘ulotga kelmaydigan o‘yinchi shanba oqshomida uchrashuvning eng yaxshi futbolchisi unvoniga sazovor bo‘lganini ko‘rgan kishi aqldan ozishi aniq», - degandi Garri Rednapp 2011 yilda.
JONATAN VUDGEYT
Vudgeyt «Tottenxem»da Kingning jamoadoshi bo‘lgandi. 19 yoshli paytida u «Lids»da o‘ynardi. Jarohat tufayli muammolari «Nyukasl»da boshlanib, faoliyatining oxirigacha uni ta’qib etdi. «Uayt Xart Leyn»dagi hayratlanarli o‘yinlariga qaramasdan, himoyachi Fabio Kapello rahbarligidagi Angliya terma jamoasi bilan JCH-2010da ishtirok eta olmasligini kuyunib e’tirof etgandi: «Taslim bo‘lmasdan, qo‘limdan kelganicha harakat qildim. Biroq men muntazam ravishda mashq qilmayman. Unga esa har kuni mashg‘ulotlarga keladigan o‘yinchilar yoqadi».
RONALDO
Dunyoning eng yaxshi futbolchilari darajasiga ko‘tarilgan davrida ham Ronaldo hech qachon mashg‘ulotlarda o‘zini boshqalardek koyitmaganligini ta’kidlash adolatdan bo‘ladi. Unga «Inter»da ustozlik qilgan Jidji Simoni ham boshqa futbolchilar oldiga qo‘yadigan talablarni uning oldiga qo‘ymaganligini tan olgandi: «Barcha o‘yinchilarni bir xil qoidada boshqarish qanchalik to‘g‘ri ekanligini hech qachon o‘ylab ko‘rmagandim. Ronaldo yagona istisno edi. Men uni yugurishga majbur etmadim, shunchaki, to‘p bilan muomala qilish u uchun yetarli edi». 2006 yilda Fabio Kapello kelganida, braziliyalik hujumchi ortiqcha vazndan aziyat chekayotgan bo‘lsada, mashg‘ulotlarni o‘tkazib yubormasdi. «Quloq soling, uning vazni 96 kg. edi. Men undan JCH-2002da g‘olib chiqqanida vazni qancha bo‘lganini so‘radim. U 84 deya javob qaytardi. Shunda men og‘irligini hech bo‘lmaganda 90ga tushirishni so‘radim. Ammo u gapimni inobatga olmadi».
Shunday bo‘lsada, don Fabio hamon Ronaldoni murabbiylik faoliyatidagi eng zo‘r futbolchi, deb hisoblaydi. «U shunchalik ajoyib o‘yinchi ediki, maftun bo‘lmaslikning iloji yo‘q edi», deya Sid Lou qiziq bir voqeani aytib berdi: «Mavsumoldi yig‘inida yangi o‘yinchilardan biri maydonda beparvo ketayotgan Ronaldoga baqirdi: «Yugur, baqaloq!». Tabiiyki, Ronaldo pinagini buzmadi: «Sen yugurasan, men esa - yo‘q. Men gollar uraman». 5 daqiqadan keyin u gol urdi va yangi jamoadoshiga yuzlandi: «Qalay, hammasi joyidami?» U shunaqa futbolchi edi». Hatto jamoadoshlari ham «So‘yloq»ning har bir harakatida o‘ziga xos mantiqni tuyushardi. Michel Salgado jilmaygan tarzda o‘yinchilar murabbiydan uni mashq qilishga majburlamaslikni iltimos qilishganini hikoya qilgandi: «Ronaldo shunday dedi: «Xavotir olmang, siz uchun 2ta gol uraman». Keyin va’dani bajardi»
ROMARIO
Mahorat bobida mashhur vatandoshidan aslo qolishmaydigan Romario ham murabbiylarning erkatoy shogirdi sifatida barcha futbolchilar faqat orzu qilishi mumkin bo‘lgan istaklarini amalga oshira olardi. Masalan, u Yoxann Kroyffdan Riodagi karnavalga kechikmay yetib borishi uchun bitta mashg‘ulotni o‘tkazib yuborishi va o‘zi ishtirok etadigan o‘yinni barvaqt tark etishiga ruxsat berishiga ko‘ndirgandi. «Bir kuni Romario Braziliyadagi karnavalga borishi uchun mendan izn so‘radi. Unga ertaga bo‘ladigan o‘yinda 2ta gol ursa, 2 kun qo‘shimcha dam olish kuni berishni va’da qildim. Ertasiga u 20 daqiqa ichida 2ta gol urdi va menga yuzlandi: «Ustoz, o‘rnimga boshqa o‘yinchini tushiring, samolyot bir soatdan keyin Rioga uchadi».
POL MAKGRAT
Makgratning «Aston Villa»dagi qahramonligi xususida King juda ko‘p gapirardi. Tizzasidagi jarohati bilan u ikki marta Liga kubogi sohibiga aylangan va «Yil o‘yinchisi» unvoniga sazovor bo‘lgandi. «Dastlabki bir necha oy mashg‘ulotlarda to‘liq qatnashdim. Keyingi 7 yilda 1 marta ham borgan emasman. «Villa»ning shifokori qadrdon do‘stim va men uchun haqiqiy qahramon edi. Butun faoliyatim davomida u meni qo‘llab-quvvatlab turdi. Agar u bo‘lmaganda, 4 yilda futbol bilan xayrlashishga to‘g‘ri kelardi. Jim men uchun maxsus mashqlar tizimini o‘ylab topdi. Unga ko‘ra, har kuni ertalab 10 daqiqa velosipedda sayr qilardim. Ba’zan shunchaki, vannada cho‘milish bilan kifoyalanardim. Sport formasida bo‘lishim uchun shu yetarli edi. Ochig‘i, boshqalarning shug‘ullanishiga jimgina qarab turish men uchun og‘ir edi. Mashg‘ulot tugagach, to‘plarni yig‘ishtirardim. Lekin jamoadoshlarim yaxshi yigitlar edi. Ularning hech qaysisi arz qilmadi, meni to‘g‘ri tushunishdi».
JORJ BEST
Afsonaviy yulduzning mashg‘ulotlar, umuman, futbolga munosabati rasmiy hujjatlarda o‘z ifodasini topgan. 1972 yilning yanvarida Best «MYU» mashg‘ulotlarida bir hafta qatnashmagan, buning o‘rniga, Britaniya go‘zali bilan sayr qilgandi. Hatto Jorjning xotirasi va faoliyatiga bag‘ishlangan veb-sayt ham uning ichkilikka ruju qo‘yganligi mashg‘ulotlar sifatining pasayishi va tashqi ko‘rinishining buzilishiga olib kelganligini ochiq-oydin qayd etgandi. Shunday bo‘lsada, agar siz har o‘yinda 6talab gol ursangiz, barcha ayblaringizga ko‘z yumishadi...
RONALDINYO
Braziliyalik afsonaning «PSJ»dagi jamoadoshi Jerom Lerua shunday degandi: «Ronaldinyo hech qachon mashg‘ulotda ishtirok etmagan, haftada bir kun bo‘lsada mashq qilmagan. Shunchaki, shanba kuni maydonga tushish uchun juma kuni paydo bo‘lardi. O‘ylashimcha, u tun bo‘yi ko‘chalarda sang‘ib yuradigan Romariodan ibrat olgandi. Ertalab Ronaldinyo quyoshdan himoya qiluvchi ko‘zoynagini taqqan holda uqalash xonasiga kelar va o‘sha yerda uxlardi. O‘ta noyob iqtidor sohiblari odatda sal tentakroq bo‘ladilar».
KARLOS KAYZER
Bu qahramonimiz el orasida hech qachon maydonga tushmagan eng buyuk futbolchi sifatida tanilganini inobatga olsak, uning tarixi uchun kamdan-kam uchraydigan noyob hodisa ta’rifi ozlik qiladi. O‘z faoliyatida Kayzer 10ta jamoa, jumladan, Braziliya grandlari - «Botafogo», «Flamengo», «Vasko da Gama» va «Fluminense» a’zosi bo‘lgan. Biroq amalda hech qachon to‘p surmagan, mashg‘ulotlarni chetlab o‘tish uchun turli jarohatlar va tobi qochganligini bahona qilib yurgan. Chunki u chindan ham futbolchi bo‘lgan emas. Ha, 80-yillarda Internet tugul, risoladagidek telefon aloqasi ham yo‘q edi. Bundan unumli foydalangan Karlos Kayzer xaridor jamoalar vakillarini argentinalik nomdoshi - Karlos Enrikening gollari yozilgan videolavhalarni namoyish etish orqali aldagan. Rivoyatga ko‘ra, braziliyalik soxta futbolchi «Independyente» hujumchisiga juda o‘xshash bo‘lgan. Ana shu o‘xshashlik unga qo‘l kelgan. «Men boshqa futbolchilar orasida bo‘lishni istardim. Faqat o‘ynashni yoqtirmasdim. Agar futbolchi bo‘lishimni istagan bo‘lishsa, bu ularning muammolari», - degandi Kayzer.
JON SHERIDAN
«Lids» ikkinchi divizionda qatnashgan 80-yillarda Jon «Elland Roud»ning chinakam qahramoni edi. Shu bois, bosh murabbiy erkatoy yarim himoyachisini rag‘batlantirib turardi. Sheridan uchun esa dushanba kuni dam olishdan ko‘ra yaxshiroq mukofot yo‘q edi. Axir dam olish oqshomlaridagi maishatdan keyin hushyor tortib, o‘ziga kelib olishi kerak edi-da. Biroq Billi Bremner o‘rnini egallagan Xovard Uilkinson Sheridanga bunday iltifotni lozim topmadi - ayniqsa, mast holdagi futbolchining polisiyachi bilan mushtlashuvidan keyin. Natijada, Jon lash-lushlarini yig‘ishtirib, «Nottingem»ga o‘tib ketdi.
DARREN MAKGREGOR
Nil Lennon 2017 yilda «Xibernian» himoyachisining mashg‘ulotlarda qatnashmasligidan boxabar bo‘lgach, MakGregorni MakGratga qiyoslagandi. 2015 yilda «Reynjers»ning «Yil o‘yinchisi» unvonini qo‘lga kiritgan MakGregor keyinchalik tizzasidan 2ta jarohat olgan va Lennon uni «jangchi» deb atagandi. «Darren anchadan beri tizzasidagi jarohat bois, mashg‘ulotlarda ishtirok etmayapti. O‘tgan mavsumda ham u mashg‘ulotlarda shug‘ullanish o‘rniga, xuddi Pol MakGrat kabi haftani velosipedda sayr qilish bilan o‘tkazmoqda».
S.RAHMONOV tayyorladi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
