«Real»da tobora effektli o‘ynayotgan Vinisius Juniorning yana bir qiyofasi bor: u maydon tashqasida imperiya qurmoqda. Braziliyalik futbolchi uchun naq 30 nafardan ko‘p kishi ishlaydi. U shuningdek, shaxsiy brendini yuksaltirish barobarida Braziliyada ta’lim-tarbiya saviyasi ko‘tarilishiga hissa qo‘shmoqda. Xullas, ikki Vinisius bor. Birinchisi - aqlli futbolchi, qarshi hujumlarda juda xavfli, chiroyli gollar uradi. Ikkinchisi - aqlli biznesmen. Braziliyaning Globo nashri oktyabr oyi boshida bu haqda alohida maqola tayyorladi. Undan ma’lum bo‘lishicha, 21 yoshli futbolchi jismoniy holati va imidjiga o‘ta e’tibor bilan yondashadi. Deylik, maydon tashqarisida o‘z ichiga 30 nafardan ko‘p kishini jamlagan katta bir jamoa braziliyalik yulduz uchun turli yo‘nalishlarda ish olib boradi: shaxsiy murabbiy, ruhshunoslar, oshpaz, hattoki, imidjer...
Neymarning sobiQ murabbiyi, ruhshunos...
Shaxsiy murabbiy. 2020 yilning mart oyida karantin yuzaga kelganida, Vinisius o‘ziga Braziliyadan shaxsiy murabbiy yolladi. Gap bunga qadar Braziliya yoshlar termasi va «Santos» klubida ishlagan, Neymar hamda Markinyosga yakka tartibda murabbiylik qilgan Tiago Lobo haqida ketmoqda. U avvalo, Vini uchun individual mashg‘ulotlar dasturini ishlab chiqdi. Murabbiyning metodologiyasi Ronaldu ish tizimiga asoslangan: mushaklarni tez rivojlantirish, tanani doimiy nazoratda ushlab turish. Darvoqe, Vinisius yil oxirigacha Madriddagi boshqa uyga ko‘chib o‘tadi. Bundan maqsad - qulaylikni yanada yaxshilash emas, balki mukammal ish muhitini yaratish. Yangi qo‘nimgohda tanani parvarishlash uchun hammasi mavjud: keng sport zali, kichik maydon va kriokameraga ega tiklanish xonasi. Globo nashrida qayd etilishicha, uyga o‘rnatilgan ayrim jihozlar hattoki, Braziliya «A» seriyasining ba’zi klublarida ham yo‘q.
Shaxsiy oshpaz. Fransiyalik oshpaz kunlik taomnomani tuzadi va barchasini o‘zi tayyorlaydi. U yana Vinisiusning qat’iy parhezga rioya qilishini nazorat qiladi. Xususan, shirinliklar taomnomadan chiqarib yuborilgan, hisob. Baliq go‘shtidan tayyorlanadigan taomlar va sabzavotlarga katta urg‘u beriladi. «Endi tanamda ortiqcha yog‘ juda oz, - deya maqtandi Junior yaqinda AS nashriga bergan intervyusida. - Chunki organizmimga g‘amxo‘rlik qila boshladim, kun tartibi va ovqatlanish rejimiga to‘liq amal qilyapman. Maydon tashqarisidagi bunday cheklovlar o‘yinimni yaxshilashga yordam berdi. Hammasi o‘zaro bog‘liq».
Ruhshunoslar. Vinisius shu yil yozda shaxsiy ruhshunos bilan ham ishlay boshladi. Ular braziliyalikning maydondagi xatolarini tahlil qilib, ularning kelib chiqish sabablarini aniqlashadi. Braziliyalikning aytishicha, bu qisqa vaqtda o‘z samarasini ko‘rsatdi: u endilikda turli tanqidiy qarashlarga e’tibor qaratmayapti. Qizig‘i, Vinisius «Real»da katta maosh oladigan futbolchilar qatorida emas: yillik ish haqi 3,5 million yevroga teng. Demakki, braziliyalik yigit hozirda maoshining katta qismini o‘zini parvarishga sarflamoqda.
Vinisius - mediayulduz
Junior o‘yinlar va mashg‘ulotlardan so‘ng shaxsiy imperiyasining ikkinchi tomoni bilan shug‘ullanadi - OAV uchun o‘z imidjini yaratadi. Buning muhimligi haqida 2020 yildan buyon Vini bilan ishlayotgan Mediacom Sport and Entertainment vakili Misha Sher alohida gapirgandi: «Sportchilar avvallari o‘z imidjlari ustida ishlamasdilar, hammasi o‘z-o‘zidan shakllanardi. Endi ular zamonaviy texnologiyalar vositasida muxlislar bilan to‘g‘ridan-to‘g‘ri muloqotga kirishishlari, o‘zlarining turli qirralarini ko‘rsatishlari mumkin. Bunga klub sayti yoki matbuot xizmati aralashmaydi - filtrsiz demokratik aloqa. Shunday ekan, shaxsiy menejmentning sportchi imidj-brendini aniqlash, yaxshilash, shu orqali pul topishdagi o‘rni katta». Braziliyalikka imidj ustida ishlashda ikki kishi - shaxsiy fotograf va operator yordam beradi. Har ikkisi futbolchining maydondagi xatti-harakatini kuzatib borib, uni mukammallik sari yo‘naltiradi. Ayni payt Vinisius «Instagram» tarmog‘ida 12 million obunachiga ega. Uning sahifasi ideal suratlarga to‘la, har biri kamida bir million layk to‘plamoqda. Operator esa YouTube tarmog‘idagi kanalga mas’ul. Aytish o‘rinli, Vinisius jahondagi eng mashhur bloger-futbolchidir (shaxsiy kanali 1,4 million obunachi to‘plashga ulgurdi).
Vinisius va reklamalar tarixi
Huquqiy masalalar, logistika, klub bilan muzokara, reklama shartnomalari - bularning hammasi Mediacom Sport and Entertainment va TFM agentliklari zimmasida. Vinisius maydonda yadro yaratsa, fotograf va imidjer uni chiroyli qobiqqa solishadi, qolgani aynan ikkinchi zvenoga bog‘liq. Reklama bo‘yicha takliflar TFM tomonidan o‘rganiladi. Bunda hammasi inobatga olinadi: to‘lov miqdori, Vinisiusning imidjiga ta’siri, brend va sportchi o‘rtasida haqiqiy aloqa shakllanishi... Asosiy shart - Vinisius faqat o‘zi foydalanadigan mahsulotlarni reklama qiladi. Junior chindan ham, duch kelgan taklifni qabul qilavermaydi. Uning brendbukida faqat Gaga Milano soat brendi, Dolce&Gabbana va Nike bor. Globo ma’lumotiga ko‘ra, «Real» vakili homiylar ustidan yiliga 1 million yevro topadi. TFM yana o‘z futbolchilaridan ba’zi imidj huquqlarini olib qo‘yishni xush ko‘ruvchi «Real» bilan yuzaga keladigan masalalarni hal qilmoqda. Deylik, «galaktikos» davrida futbolchining shaxsiy imidji huquqlaridan 50 foizini klub nazorat qilardi. Ronaldo, Devid Bekxem va Raul ham bu shartga ko‘nishgan. Vinisius jamoasi esa mutlaqo boshqacha shartlarni o‘tkaza oldi - futbolchi reklama shartnomalari summasidan atigi 5 foizini klubga beradi.
Ilm-fanga e’tibor
Vinisius braziliyalik bolalar futbolchi emas, deylik, shifokor bo‘lishlarini xohlaydi. U buning uchun Braziliyada ta’lim saviyasini ko‘tarishga hissa qo‘shmoqda. U joriy yil boshida Instituto Vini Jr. guruhini tuzdi. Maqsad - braziliyalik bolalarni tarbiyalashda texnologiya va sportni uyg‘unlashtirish. Vini o‘ylab topgan Base ilovasi moddiy holati haminqadar oilalar farzandlari uchun mo‘ljallangan. Hammasi sport turniri formati asosida yaratilgan: 4 daraja (hududlar, mamlakat, qit’a va dunyo miqyosi)li uch mavsum. Har birida turli murakkablikdagi savollar bor va ularning javobiga mukofot belgilangan. Vinisius bu loyihaga deyarli 2 million ajratib bo‘ldi.
So‘z
- Futbol - bu orzu, ammo bolalarni ta’lim orqali qashshoqlikdan chiqib ketishga yo‘naltirsak, yaxshiroq bo‘lmaydimi? Shaxsan men ular yangi Vinisius, Neymar yoki Ronaldu emas, shifokor va boshqa sohaning yetuk mutaxassisi bo‘lishga intilishlarini xohlayman. Visinius Junior (The Guardian nashriga bergan intervyusidan).
R.IBROHIMOV tayyorladi.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
