Bugun O‘FA rahbariyati va klublar vakillari o‘rtasida video-anjuman bo‘lib o‘tdi. Yig‘ilish avvalida O‘FA birinchi-vise prezidenti Ravshan Ermatov barchani milliy ramzimiz — madhiyamizning 29 yilligi bilan tabrikladi. Jahon maydonlarida madhiyamizning yangrab turishi har bir sportchi uchun katta kuch va motivasiya berishini e’tirof etdi.
Kun tartibiga ko‘ra, milliy chempionatimizda to‘p suradigan klublarning keyingi yilgi moliyalashtirish jarayonini to‘g‘ri yo‘naltirishga doir masalalar muhokama etildi.
“Yillar davomida ko‘p klublar bir kun bilan yashadi. Biz bir kun emas, balki klubning uzoq yillik kelajagini o‘ylagan holda reja qilishimiz zarur . Moliyalashtirish tizimi ertani va rivojlanishni o‘ylagan holda maqsadli bo‘lishi va eng avvalo har bir klub zamonaviy sport infratuzilmasiga ega bo‘lishini nazarda tutishi kerak”, dedi Ravshan Ermatov.
Xabaringiz bor, Superliga hamda Pro ligada ishtirok etayotgan klublarga ajratilayotgan mablag‘larning maqsadli sarflanishini monitoring qilish uchun Vazirlar Mahkamasining 2021 yil 30 apreldagi “Futbol klublari faoliyatining samaradorligini oshirish chora-tadbirlari to‘g‘risida”gi 261-sonli qaroriga muvofiq professional futbol klublarining yillik moliyalashtirishni maqsadli yo‘naltirish O‘FA tomonidan nazorat qilinishi belgilangandi. Unga ko‘ra, barcha futbol klublari 2022 yilgi xarajatlar rejasi loyihasini ishlab chiqib, O‘FAga taqdim etishi ko‘zda tutiladi.
Yig‘ilishda O‘FA va O‘zPFL vakillaridan tashkil etilgan mutaxassislar guruhi klubning yillik rejasida bir qancha yo‘nalishlar aks etishi lozimligi borasida o‘z taklif va tavsiyalarini berib o‘tishdi. Xususan, stadion va maydon parvarishi, akademiya hamda o‘quv-mashg‘ulot qarorgohini tashkil qilinishi, ayollar va futzal jamoalari, shuningdek turli yosh toifasidagi jamoalarning musobaqalardagi ishtirokini xarajatlari o‘rin olgan bo‘lishi kerakligi belgilandi.
Bu jarayon aksariyat klublarda uzoq yillardan buyon yechim topmay kelayotgan infratuzilma bo‘yicha kamchiliklarni bosqichma-bosqich bartaraf etish uchun amalga oshirilayotgani tushuntirildi. Shuningdek, yig‘ilishda klub vakillari tomonidan ko‘tarilgan mavzular yuzasidan O‘FA mutaxassislari tomonidan javob berib o‘tildi.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
