Yevropa Chempionlar Ligasi bosh sovrini futbolchilardan katta tajriba va ulkan iste’dodni talab qiladi. Hatto eng oddiy ko‘ringan o‘yinlarda ham ishtiyoq shiddati yuqori tempda bo‘ladi. Ba’zan uning mas’uliyati va bosimiga yoshlar u yoqda tursin, ulkan tajribaga ega futbolchilar ham bardosh bera olmaydi.
Biroq, bugungi kun qahramonlari yoshlik davrlaridayoq yuqori xarizma va mahoratga ega bo‘lish mumkinligini butun dunyoga namoyish etishmoqda. Murabbiylar ularni Chempionlar ligasi bahslariga bemalol «otib» yuborishmoqda. Quyida ko‘hna qit’aning eng nufuzli turnirida debyut qilgan eng yosh va umidli futbolchilar xususida so‘z yuritamiz.
5. Yuri Tilemans («Anderlext») – 16 yoshu 161 kun
Yuri - Belgiya futbolining so‘nggi o‘n yillikdagi asosiy iste’dodlaridan biri. Aynan u De Bryuyne va Lukaku ketganidan keyin «qizil iblislar»ning yangi yetakchisiga aylanishi kutilmoqda. 2013/14 yilgi mavsumda mahalliy «Anderlext» yarim himoyachini asosiy tarkibga qo‘shib oladi. U Belgiya chempionatida 2013 yilning iyulida «Lokeren» bilan o‘yinda debyut qilgan, ikki oydan so‘ng esa Chempionlar ligasida ilk o‘yinini o‘tkazadi.
Tilemans «Olimpiakos»ga qarshi maydonga tushdi. Ammo debyut yarimhimoyachi uchun omadli kelmadi. Greklar bilan qarama-qarshilikda «binafsharang-oqlar» mag‘lubiyatga uchradi (0:3) va guruhda so‘nggi o‘rinni egalladi.
Hozircha Tilemans Chempionlar ligasining doimiy «mehmoni»ga aylanganicha yo‘q. «Monako»dagi davrida unga bu nasib etmadi, «Lester» esa ikki yil ketma-ket muhim pallalarda turnir chiptalaridan mosuvo bo‘ldi. Biroq, futbolchi hali endigina 24 yoshda va uning uchun barchasi oldinda.
4. Alen Xalilovich («Dinamo Zagreb») – 16 yoshu 129 kun
Ushbu futbolchiga xorvatiyalik «Messi» laqabi berilgan. U YECHLdagi o‘z sayohatini darhol kuchli raqib «PSJ»ga qarshi boshlagan. O‘sha paytlar parijliklar tarkibida Zlatan Ibrahimovich to‘p tepar edi. Ammo, 16 yoshli yigit uchun o‘zining eng yaxshi o‘yinlarini namoyish etishga vaqt yetarli bo‘lmadi. Xuddi Tilemans jamoasi kabi «Dinamo» ham guruhda so‘nggi o‘rinni egalladi. Kelasi yili esa zagrebliklar YECHL guruh bosqichiga chiqa olishmadi va o‘z omadlarini Yevropa ligasida sinab ko‘rishdi.
Chempionlar ligasidagi debyutidan ikki yil o‘tib, Alen «Barselona» safiga borib qo‘shildi, lekin hech qachon asosiy tarkibga moslashib keta olmadi. «Ko‘k-anorranglilar» uni 2016 yili «Sporting Xixon»ga ijaraga berib yuborishdi, shundan so‘ng uning faoliyatida doimiy pasayish kuzatildi. Xorvat besh yil ichida naq olti marta jamoasini o‘zgartirdi. Ushbu sayohat «Gamburg»dan boshlanib, hozirgi jamoasi «Birmingem Siti»da tugaydi.
Albatta, iste’dodli Alenni 25 yoshida Chempionshipning o‘rtamiyona jamoasida ko‘rishni ko‘pchilik kutmagani shubhasiz. Chempionlar ligasidagi debyutidan sakkiz yil o‘tib, Ibrahimovich va Xalilovich A Seriyada uchrashishgani naqadar ramziy ma’noga ega. Biroq ikkala futbolchi o‘rtasida birgina farq mavjud. Keksa shved hali ham super formada bo‘lsa, bir paytlar Xorvatiyaning asosiy iste’dodi deya tilga olingan Xalilovich o‘ziga mos klubni Chempionshipdan qidirmoqda. Shunaqa!
3. Rayan Sherki («Olimpik Lion») - 16 yoshu 103 kun
«Sherlar» shu paytgacha juda ko‘plab iste’dodlarni yetishtirib chiqargan. Lyakazett, Tolisso, Ndombele yoki Auarni misol tariqasida keltirishning o‘zi kifoya. Ularning ichida Rayan ajoyib texnik va aqlli o‘yin qura oladigan futbolchilar sirasiga kiradi. U o‘zining ilk YECHL o‘yinini 2019 yil sentyabr oyida o‘n olti yoshga to‘lganidan bir oy o‘tgach o‘tkazdi. Noyabr oyining oxirida «Lion» «Zenit»ga qarshi maydonga tushdi va imkoniyatni qo‘ldan boy berdi (0:2).
So‘nggi mavsum u Fransiya chempionatida allaqachon 29 ta o‘yin o‘tkazgan va mavsum yakunida uchinchi o‘rin uchun kurashda kattalar safida ilk golini urdi. O‘shanda raqib «Monako» edi.
2. Selestin Babayaro («Anderlext») – 16 yoshu 87 kun
«Anderlext» futbol tizimining yorqin vakillaridan biri bo‘lgan Babayaro Belgiyaga o‘n besh yoshida ko‘chib o‘tgan. Uning debyuti yuqoridagi 3 futbolchiga qaraganda har qalay esda qolarliroq kechdi. Ruminiyaning «Styaua» jamoasiga qarshi maydonga tushib, 37-daqiqada ikkita sariq kartochka oldi va maydonni tark etdi. Albatta yoqimli emas, lekin unutilmas debyut. Mana uning g‘ayrioddiyligi qanday?!
Babayaro nomi Afrika jamoalari tarixida birinchi marta 1996 yilgi Olimpiadada g‘olib chiqqan Nigeriya terma jamoasi bilan bog‘liq. Chap qanot himoyachisi Argentina bilan turnir finalida gol urdi va bu Krespo, Lopes va Zanettisi bor jamoaga qarshi edi. Umuman olganda, Selestinning karyerasi yaxshi tempda rivojlangan.
Bryussel jamoasidan so‘ng u Londonga yo‘l oldi va u yerda 7,5 yilini «Chelsi»da o‘tkazdi. Futbolchining eng samarali yillari «aristokratlar» bilan bog‘liq: Kubok egalari kubogi 97/98, UYEFA Superkubogi 98/99, Angliya Superkubogida zafar quchdi. 2001 va 2005 yillari APLni qo‘lga kiritdi. «Ko‘klar»dan keyin «Nyukasl» va «Los-Anjeles Gelaksi»da faoliyat olib bordi. Babayaro nihoyat, 2008 yilda butsalarini mixga ilishga qaror qildi.
1. Yusuf Mukoko («Borussiya Dortmund») – 16 yoshu 18 kun
Germaniyalik futbolchining shov-shuvli iste’dodi uzoq vaqt davomida muhokama qilindi. Ikki-uch yil avval butun futbol ommasi kuchli raqiblar darvozasiga to‘p kiritgan o‘yinchi haqida bashorat qila boshladi. Yusuf 8 dekabr kuni Sankt-Peterburgning «Zenit» jamoasi bilan o‘yinda zaxiradan maydonga tushib, Chempionlar ligasi tarixidagi eng yosh futbolchiga aylandi. Va o‘n kundan keyin Bundesligadagi birinchi golini kiritdi. «Yunion Berlin» darvozasini ishg‘ol qilgach esa yana bir rekord o‘rnatdi.
U tobora yaxshi rivojlanib bormoqda. Tez-tez zaxirada qolishiga qaramay maydonda o‘zini yo‘qotib qo‘ymayapti. Noyabr oyining oxirida Yusuf 17 yoshga to‘ldi. Bugungi Mukoko va Xoland kabi iste’dodlari bor «Borussiya»ni katta muvaffaqiyatlar kutib turibdi.
Yusufbek Saydaliyev tayyorladi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
