Joriy mavsumni «Barselona»da boshlagan argentinalik hujumchi Serxio Aguero futbolchilik faoliyatiga rasman nuqta qo‘ydi. Kataloniya klubi shu munosabat bilan YouTube tarmog‘idagi kanalida goleador ishtirokida matbuot anjumani tashkillashtirdi. Unda yurak tizimidagi muammolar tufayli butsalarini mixga ilishdan o‘zga chora topolmagan argentinalik futbolchi ko‘z yoshlarini tiya olmadi. «Juda murakkab holatga tushdim, ammo muayyan qaror qabul qilganimdan mamnunman. Axir gap salomatligim haqida ketmoqda», - dedi Aguero.
* Serxio Aguero 30 oktyabr kuni «Alaves»ga qarshi kechgan o‘yin (1:1)ni barchaga ma’lum muammo tufayli yakuniga yetkazolmadi. Avvaliga uning tiklanishiga 3 oy ketishi aytildi, ammo keyinroq muammo jiddiyroq ekanligi oydinlashdi. Umuman, «Kun» laqabli goleador «Barsa»ning 5ta o‘yinida qatnashib, 1ta gol urdi.
* Aguero faoliyati davomida klub darajasi jami 17ta jamoaviy sovrin yutdi. Bular - YEL kubogi, Yevropa superkubogi, Angliya chempionati oltin medali (5ta), Angliya Liga kubogi (6ta), Angliya kubogi va Angliya superkubogi (3ta). U shuningdek, Argentina termasi bilan Olimpiada-2008 va Amerika kubogi-2021da g‘alaba nashidasini surdi.
* 33 yoshli hujumchi «Barselona»dan tashqari, «Inde-pendente», «Atletiko» va «Manchester Siti» klublari sharafini himoya qildi. 2006 yildan Argentina milliy jamoasida o‘ynayotgandi.
* Serxio Agueroning shaxsiy kardiologi Roberto Pedro munosabati: «Futbolchi 2004 yili aritmiyadan davolangan edi. Fenomen ekanligi uchun ham shundan keyin 17 yil o‘ynadi. Hozirgi muammoni o‘sha xastalik yoki koronavirusga aloqasi yo‘q. Ehtimol, unda ilgari miokardit yuzaga kelgandir, shuning asoratida taxikardiya o‘zini namoyon qildi. Serxio 23 yoshda bo‘lganida, 3 oy kutib, yana tekshiruvdan o‘tishi mumkin edi. Ammo hozir bundan ma’no yo‘q, faoliyatni to‘xtatish - eng to‘g‘ri qaror. Do‘stlari bilan o‘ynashi mumkin, muammo yo‘q. Chunki sinovlardan yuqori bosim va aritmiyasiz o‘tdi. Ammo professional futbol boshqa...».
* Serxio Aguero APLda eng ko‘p gol urgan xorijlik futbolchidir. Uning hisobida «Manchester Siti» libosida urilgan 184ta gol bor. Keyingi o‘rinda 175ta gol urgan Tyerri Anri (Fransiya) bormoqda. 3-pog‘onadagi Robin van Persi (Niderlandiya) APLda 144 marta gol quvonchini tuygan.
* «Barselona» prezidenti Joan Laportaning munosabati: «Barselona»da o‘yinlaringdan ko‘p bahramand bo‘lishni xohlagandik. Asosiysi, eng kerakli qarorni chiqara olding. Kerakli payt qo‘llab-quvvatlashga tayyormiz. Serxio, faoliyating davomida futbol chiroyiga katta hissa qo‘shding. Endi futboldan tashqaridagi hayotingda omad tilayman».
* «Manchester Siti» bosh murabbiyi Xosep Gvardiola munosabati: «Maradona Italiyani, Messi Ispaniyani, Aguero esa Angliyani zabt etdi. Uning statistikasi barchasini ko‘rsatib beradi. Jamoang tarkibida Aguero kabi yonadigan futbolchi o‘ynasa, xotirjam o‘tirasan. Chunki uning o‘zi o‘yin taqdirini hal qilib qo‘ya oladi».
* «PSJ» klubi va Argentina termasi hujumchisi Lionel Messi munosabati: «Serxio, deyarli butun faoliyatimiz birga o‘tdi. Yuksalishlar va pasayishlar bizni faqat birlashtirdi. Amerika kubogidagi g‘alabadan so‘ng shunday voqea yuz bergani achinarli, albatta. Sevimli mashg‘ulotingni to‘xtatganingdan xafaman, albatta. Lekin bilaman, baxtli bo‘lib qolasan, chunki baxt taratuvchi insonsan. Ishonchim komil, hayoting yangi bosqichini ham tabassum bilan davom ettirasan. Seni juda yaxshi ko‘raman, do‘stim. Maydonda hamda terma jamoada birga o‘tkazgan damlarimizni sog‘inishim turgan gap».
* Serxio Aguero 1988 yilning 2 iyun kuni Buenos-Ayres shahrida tug‘ilgan. 2003 yilning 5 iyulida, 15 yoshu 35 kunligida (!!!!) Argentina chempionatida debyut qilib, bu borada 1976 yili Diyego Maradona o‘rnatgan rekordni yangiladi. 17 yoshida Argentina o‘smirlar termasi, 20 yoshida esa yoshlar jamoasiga chaqirildi va har ikki toifadagi JCHda g‘alaba qozondi. 2008 yili Pekin Olimpiadasi yarim finalida Braziliya termasi darvozasiga 2ta gol urdi va yakunda oltin medal yutdi.
* «Atletiko» 2006 yili Aguero transferi uchun «Independyente»ga 23 million yevro to‘ladi. 2011 yili esa hujumchi 35 million funt sterling evaziga «Manchester Siti» safiga o‘tdi.
* Serxio Ispaniyaga qaytishiga qadar Manchesterga yaqin Cheshir grafligidagi elit turar-joy - Olderli Ejda yashadi. Manchester klublarining ko‘plab futbolchilari ayni shu hududda istiqomat qilishadi. Aguero yana Mayamida qiymati 9 million yevroga teng hashamatli uyga ega.
* Agueroning shaxsiy garajida Lamborghini Aventador (bahosi - 500 ming yevro), Range Rover (bahosi - 100 ming yevro), Audi K8 (bahosi - 125 ming yevro) va Nissan GTR (bahosi - 150 ming yevro) avtomobillari bor.
* Aguero bo‘sh vaqtda o‘g‘li bilan sayr qilish, film ko‘rish va suv sporti bilan shug‘ullanishni ma’qul ko‘radi. U ayniqsa, yaxtalar va gidrosikl «jinnisi»dir. Xobbilaridan yana biri - baliq ovlash.
Ole nashrida yozilishicha, «Manchester Siti» Serxio Agueroga klub elchisi rolini taklif qilishga ulgurdi. To‘g‘ri, argentinalik bunga hozircha javob bergani yo‘q. «Kun» oldida futbol eksperti sifatida ish boshlash varianti ham bor. Binobarin, ko‘plab telekanallar u bilan hamkorlik qilishga tayyor turibdi.
R.IBROHIMOV tayyorladi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
