So‘nggi oylarda ishlar ko‘payib ketdi va «Telegram» kanalni yuritishga ulgurmadim. Afsuski, sukunatni buzishga arzigulik qayg‘uli sabab topildi: Nikolay Shirshovning kutilmagan vafoti yuraklarni parchaladi. U nafaqat yorqin, balki ishonchli o‘yin ko‘rsatgan futbolchilardan biri edi. Qolaversa, maydon tashqarisida shu qadar ideal ediki, suhbatning dastlabki daqiqalaridan odamni o‘ziga tortardi...
***
- 1974 yili tug‘ilgan Kolya futbolimizning «oltin avlodi»ga birinchilardan bo‘lib kirgan. Sobiq ittifoq payti O‘zbekiston termasi ushbu yosh toifasida «Nadejda» turnirining oxirgisida 2-o‘rinni egalladi. O‘sha jamoadan sobiq ittifoq yoshlar termasiga 5 nafar futbolchi chaqirildi: darvozabon Pavel Bugalo, yarim himoyachilar Yorqin Nazarov, Andrey Yarovoy, hujumchilar Valeriy Kechinov va Oleg Shaskix. Yana bir kiper Ruslan Ahmedxonov (O‘zbekiston termasida Bugalodan avval debyut qilgan), yarim himoyachilar Olim Shokirov hamda Avaz Hoshimov (bir yosh kichik bo‘lgan) termadan chetda qolishdi. Shirshov esa nafaqat sobiq ittifoq, balki O‘zbekiston termasiga ham kirmagan. Kolya bundan ranjigan, albatta. Ya’ni murabbiylar o‘z maktablari tarbiyalanuvchilariga e’tibor qaratishgani tufayli nazardan chetda qolganini aytgandi. Shirshov «Paxtakor»dan chiqqan. Yoshlar futbol maktabini tamomlagach, dastlab ijara asosida «Sverdloves» (bu klubning ham, uning Toshkent viloyatidagi stadioni ham yo‘qlikka yuz tutganiga ancha bo‘ldi)ga bordi, keyin «Traktor»da o‘ynadi. U bilan aynan shu jamoada tanishgandik. «Traktor» bilan munosabatim yaxshi bo‘lib, jamoada muhit ham ajoyib edi. Shirshov «Traktor»da shu qadar yorqin o‘yin namoyish etdiki, O‘zbekiston chempionatining dastlabki mavsumi yarmidayoq kashfiyotga aylandi. Tabiiyki, «Paxtakor» uni ortga qaytarishni xohladi va bu ish 1993 yilning yanvarida amalga oshdi.
Kolya bilan esda qolgan uchrashuvimiz 1993 yilning martiga to‘g‘ri keldi. «Paxtakor» o‘shanda Malayziyada tashkillashtirilgan mavsumoldi yig‘inidan qaytgan, jamoani Qibraydagi bazada futbol federasiyasi prezidentligiga endigina saylangan Abdulhoshim Mutalov bilan uchrashuv kutib turgandi. Mamlakat tarixida futbolni rivojlantirish bo‘yicha ilk Qaror chiqarilgan, O‘zbekistonning o‘sha paytdagi bosh vaziri Mutalovning e’tibori esa futbolchilar uchun juda qiziq tuyulgandi. Uning tashrifini kutar ekanmiz, vaqt o‘tkazish uchun Shirshov xonasida o‘tirib, futbolchining Malayziya safari taassurotlarini tingladik. Eslatma, 1993 yil haqida gap ketmoqda. Futbolchilar o‘zlari xohlagandek ko‘p maosh olishmasdi. Shu bois, Malayziya safari qo‘shimcha daromad maqsadida ham amalga oshirilardi. Delegasiya a’zolari o‘zlari bilan yig‘in joyida sotish mumkin bo‘lgan buyumlarni olishardi: kimdir shampan vinosi, kimdir - shisha idishlar. Kolyaning aytishicha, o‘shanda Toshkent bojxonasida undan Chust pichog‘ini olib qo‘yishgan. Buni shu qadar tushkun holda so‘zladiki, 18 yoshli yigitga rahmim kelgandi:
- Bojxonachi juda ... (yomon odam) ekan. Ozgina pul ishlab olish imkoniyatingdan mahrum qilibdi.
- Hechqisi yo‘q, - dedi Kolya. - Yuklarim ichida yana 9ta pichoq bor edi.
Shu suhbat ham uning sodda va samimiy ekanligidan dalolat. Qalbi keng, ko‘ngli ochiq inson edi.
Alisher NIKIMBAYEV, «Futbolium»
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
