Gamburg. Noyabr oyi oxiri. «Zandxauzen» Bundesliga-2 doirasida bellashish uchun «Sankt-Pauli» maydoniga tashrif buyurdi. «Millerntor» stadionining tomi ortida futbol maydonini neon nurlari bilan yoritib turuvchi moslama ko‘zga tashlanmoqda.
Arena atrofida qishki yarmarka - qovurilgan bodomning xushbo‘y isi ufurib turibdi. Stadion ichida ham hayot qaynamoqda. O‘yin boshlanganidan 2 daqiqa o‘tar-o‘tmas, Daniel-Kofi Kyure to‘pni tovoni bilan Gvido Burgshtallerga uzatdi, u esa yengil harakat bilan darvoza «to‘qqizligi»ni nishonga oldi. Tezkor va o‘ta chiroyli gol. Gvido qo‘llarini yoygan holda tribuna tomon yugurdi. Stadion karnaylaridan «Sankt-Pauli»ni sharaflovchi ohanglar yangradi. Kamtarin jamoa shu tariqa turnir jadvalida 1-o‘ringa ko‘tarilib oldi...
***
Gamburg shahrining ikki jamoasi o‘rtasidagi tafovut shahar chetrog‘ida yaqqol ko‘zga tashlanadi. Balandligi 1,5 metr, kengligi esa 1 metrga teng telekommunikasiya shkafchalarining aksariyati «Gamburg» libosiga hamohang havorang-qora-oq ranglarda. Agar «Gamburg» videoo‘yini yaratilganida, «barcha shkaflarni izlab top va klub rangiga bo‘ya» sharti uning asosiy mohiyatiga aylanardi. Buning ajablanadigan tomoni yo‘q. Axir gap 1983 yili Yevropani zabt etgan va ajoyib «Folksparkshtadion» arenasini bunyod etgan Uve Zeeler jamoasi haqida ketmoqda. Ha, «Gamburg» 2018 yili Bundesligadan tushib ketdi, shunga qaramay, hamon Germaniyaning eng nomdor klublari qatorida tilga olinadi. Umuman, Gamburgning barcha joylari - poyezdda, yer osti yo‘laklarida, hattoki, kichik novvoyxonalarda ham shu klub ramzi va ranglarini ko‘rish odddiy holatdir.
«Sankt-Pauli»ning yo‘rig‘i boshqa. Ha, shaharda «Gamburg» hukmron, ammo bu kamtarin klub ham o‘z so‘zini baralla aytish niyatida. Uning shiori jo‘shqin emas, lekin aniq: «Biz fashistlarga qarshimiz, biz nasistlarga qarshimiz, biz qochoqlarni hurmat qilamiz».Sankt-Pauli tumani azaldan quvg‘indilar, hayotda ishi yurishmagan kishilarga makon sanalgan. Tumanga nomdosh klub shunchaki, futbol bilan cheklanib qolmaydi. Bu - diniy yo‘nalishlar, ideologiya, o‘zligini namoyon etish tizimi. Jekson Irvin aynan shuning uchun bu yerdan qo‘nim topdi. Avstraliya terma jamoasi vakili so‘nggi yillarda omadsizlik botqog‘idan chiqolmayotgandi. Uning «Xall Siti»dagi faoliyati mojaro va quvg‘inlik bilan xotima topdi. Irvin 6 oydan keyin «Xibernian»ga ko‘chib o‘tdi va Edinburgda yangi uyga ega bo‘ldi. Hozir 28 yoshli futbolchi uchun hammasi oldinda. U «Sankt-Pauli» taklifi haqida gapirsa, ko‘zlari yonib turadi. Chunki to‘g‘ri qarorga kelganini o‘sha zahoti his etgan. Jekson aslida «Gamburg»ga ham befarq emasdi. Darvoqe, avstraliyalik futbolchi lokdaun tufayli yopilgan shaharga kelishi bilan jarohatga yo‘liqqandi. «Dastlabki haftalar ajabtovur o‘tdi. Tarkibga qo‘shilib, maydonga tushishga qadar shahar va odamlar tabiiatiga ko‘nikishim qiyin kechdi. Lekin moslashishdan o‘zga choram yo‘q edi», - deydi Irvin. Endi u - Timo Shuls jamoasining yetakchilaridan biri, ishonchli «8-raqam». E’tiborli tomoni, 1 yilcha muqaddam Jeksonda shartnomasi ham yo‘q edi, 13ta o‘yinda jamoasiga atigi 8 ochko keltirgandi. Qarang, «Sankt-Pauli» 2021 yilni turnir yetakchisi maqomida yakunladi va bunda avstraliyalik yigitning xizmati juda katta.
***
O‘zi Bundesliga-2 ajabtovur turnir. Uning o‘ziga xos jihati - sensasion natijalar. Joriy mavsum «Gamburg» va «Gannover»dek favoritlar safi «Verder» hamda «Shalke» hisobiga kengaydi. Qisqasi, ligada kutilmagan muvaffaqiyatsizlikdan hech bir jamoa himoyalangan emas. «Sankt-Pauli» yangi yildagi dastlabki uchrashuvning 11 daqiqasidayoq o‘z oldiga jiddiy maqsad qo‘yganini isbotladi. Kosovolik himoyachi Leart Pakarada markazgacha olg‘a bordi va reydni davom ettirdi. To‘p darvoza burchagiga yo‘naltirilganida, tribunalardan gulduros qarsaklar yog‘ilmadi - bunga cheklov imkon bermadi. Muhimi, himoyachi jamoaga ko‘tarinki kayfiyat tortiq etdi. Xullas, derbida «Gamburg» mahv etildi, keyin «Shalke» mag‘lubiyatga uchratildi. «Verder» ham o‘z maydonida yengilishi hech gap emasdi, faqat VAR «Sankt-Pauli» golini bekor qildi. Kamtarin va romantik jamoa yuragi - zarur pallada qulay vaziyatlar yaratadigan va gollar uradigan hujumkor yarim himoyachi Daniel-Kofi Kyure. Gamburgliklar safiga 4-diviziondan taklif etilgan futbolchi qandaydir 3 yil ichida Gana milliy jamoasi darajasigacha ko‘tarildi. Irvinning aytishicha, jamoa Kyure kabi yigitlar bilan bemalol istagan cho‘qqiga intiladi.
***
«Sankt-Pauli»ning joriy mavsumdagi joyini belgilashda Gvido Burgshtaller ham muhim o‘rin tutadi. Avstriyalik 32 yoshli hujumchi vaqtida Ole-Gunnar Sulsher boshqargan «Kardiff Siti»da ham to‘p surgan. «Millerntor»dagi kutilmagan qahramonlardan yana biri - bu jamoa bosh murabbiyi, albatta. Timo Shuls «Sankt-Pauli»da debyut mavsumini o‘tkazmoqda. U bunga qadar yoshlar jamoasini shug‘ullantirgan va bosh murabbiyga assistentlik qilgan. Shuls 2010 yili «Sankt-Pauli» bilan futbolchi sifatida Bundesligaga ham chiqqandi. O‘shanda jamoani mahalliy afsona - Xolger Stanislavski boshqarardi. Gamburgning romantik jamoasi hozirda sermahsul o‘yin ko‘rsatmoqda. To‘g‘ri, kamchiliklar ham yo‘q emas. Deylik, jamoa Rojdestvo arafasida kutilmaganda, «Xolshtayn Kil»ga imkoniyatni boy berdi. Bunda Kyurening Gana termasiga ketgani yaqqol sezildi. Muhimi, «Pauli» 18 yanvar kuni «motor» maydonga tushmaganiga qaramay, Germaniya kubogi nimchorak finalida Dortmund «Borussiya»sini 2:1 hisobida yengdi.
***
«Sankt-Pauli» o‘yinning ma’lum qismini o‘ta shiddatli o‘tkazishga odatlangan. Deylik, joriy mavsum «Ingolshtadt» darvozasiga atigi 17 daqiqada 3ta gol urdi, «Xaydenxaym»ga esa mehmonda qandaydir 10 daqiqa oralig‘ida shuncha gol tortiq etdi. Shuningdek, «Shalke» 19 daqiqa ichida 2 marta to‘pni maydon markazidan o‘yinga kiritishga majbur bo‘ldi. Umuman, Timo Shuls shogirdlari ochiq futbol ko‘rsatish asnosida 18ta uchrashuvda 29ta gol hosil qilishdi. Shuncha gol 12 nafar futbolchi nomiga yozilgani ham e’tiborga molik fakt. Qolaversa, 11 nafar o‘yinchi hisobida samarali uzatma bor. Bu jamoaviy harakatlar to‘g‘ri yo‘lga qo‘yilganidan dalolat, albatta. Xo‘sh, shunday qiziqarli drujinani keyingi mavsum Bundesligada ko‘ramizmi? Baralla gapirishga hali erta. Lekin «Sankt-Pauli» hozirgi sur’atini pasaytirmasa, yo‘llanmaga ega chiqadi. Shunday bo‘lsa, «Gamburg» bilan tirik Gamburgda qanday holat yuzaga kelishini bir tasavvur qiling-a...
S.RAHMONOV tayyorladi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
