Ayni payt «Kastilya»ni shug‘ullantirayotgan «Real» afsonalaridan biri - Raul Gonsales italiyalik Karlo Anchelotti boshqaruvidagi jamoaning joriy mavsumdagi eng go‘zal lahzasini kutib olishga shay. Aniqroq aytsak, sobiq hujumchi madridliklar CHL chorak finalida turnirning amaldagi g‘olibi - «Chelsi» to‘sig‘idan o‘tishlariga to‘liq ishonmoqda. U Marca nashriga bergan intervyusida bu borada qat’iy ishonch bilan gapirdi. Raul shuning barobarida Xavining «Barselona»da amalga oshirayotgan ishlari tahsinga loyiqligini ham alohida e’tirof etdi.
- Raul, Yevropa Chempionlar Ligasi chorak finalida «Chelsi»ga qarshi kechadigan o‘yinlardan nimalar kutyapsiz?
- Albatta, «Real» g‘alabasini. O‘ylaymanki, jamoa hozir «Chelsi» to‘sig‘idan o‘tish salohiyatiga ega. «Madrid» La Liga turnir jadvalida ishonch bilan peshqadamlik qilmoqda, Chempionlar Ligasi chorak finaliga esa kuchli raqibni yengish asnosida chiqdi. Shubha yo‘q, jamoa mutlaqo tayyor, mavsumning eng go‘zal lahzasi yaqinlashmoqda. Hozir hammasi hal bo‘ladigan palla va bundan shunchaki, zavqlanish kerak.
- «Real» tizimidagi asosiy jamoada ishlash istiqboliga qanday qarayapsiz?
- Tabiatan bugungi kun bilan yashashga moyilman. Shuning barobarida asta-sekin yuqoriga ko‘tarilishni istayman, albatta. Zero, murabbiylik sohasiga kirdimmi, o‘zimni ko‘rsatishim shart. Ha, «Real» odamiman, hozir jamoaga munosib tarzda tayyorlanish harakatiman. Hammasini vaqt ko‘rsatadi. Hozirgi ishimdan zavqlanyapman, yana o‘rganishdan ham. Qachon klubga kerak bo‘lsam, uning ixtiyoridaman.
- Xavining «Barselona»dagi ishini kuzatyapsizmi?
- O‘zi Xavi futbolchilik paytidayoq murabbiy edi. U har doim zimmasidagi vazifani a’lo darajada bajarishga odatlangan. O‘ylaymanki, Xavining buguni ham, kelajagi ham nurli. Vaqt hammasini o‘z o‘rniga qo‘yadi. Ko‘rinib turibdiki, Xavida ishtiyoq katta, bu murabbiylik ishida juda muhim. Qolaversa, u «Barsa»ni juda yaxshi biladi. Shunday ekan, hozirgi ishida ancha uzoqqa borishini taxmin qilish qiyin emas. Har holda, shaxsan men uning muvaffaqiyat qozonishiga ishonaman.
- «Kastilya»ning «Linens»ga qarshi o‘yinida Migel Gutyerres urgan toza gol hisobga olinmadi. Bunga munosabatingiz...
- To‘g‘risi, hakamlar ishi haqida gapirmaslikni ma’qul ko‘raman. Shunchaki, bunday holatlarga moslashib, ishlashda davom etishimiz kerak. Falsafam oddiy: yosh yigitlarga chinakam professional bo‘lib yetishish va orzu sari dadil qadam bosishda yordam berish.
- Hozirda Yoxan Kroyff nomidagi jamg‘arma bilan hamkorlikda o‘zingiz ulg‘aygan rayonda sport kengligi yaratish loyihasi ustida ham ishlayapsiz. Shu haqda ham ma’lumot bera olasizmi?
- Yordam berish qo‘limdan kelishi va jonajon makonimga otaliq qilishdan bag‘oyat xursandman, albatta. Hozir u yerda o‘zgarishlar katta. Oldin ochiq hudud edi, endi ko‘plab loyihalar bor. Umid qilamanki, biz qurayotgan sport markazi ham bolalarga orzularni ro‘yobga chiqarishlarida qo‘l keladi.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Шуҳрат Шокиржонов
Шерзод Ражабов
Қаҳрамон Асланов
