Ertaga, yakshanba kuni oqshomida Angliya Premyer-ligasining o‘ta muhim qismi o‘tkaziladi. «O‘ta muhim» deyilishiga sabab, hozirga qadar APLda kim chempion bo‘lishi, kim YECHLga yo‘l olishi-yu, kim elita bilan xayrlashishi ma’lum bo‘lmadi. Bunday hol esa turnir tarixida ilk bor kuzatilmoqda. Quyida aynan shu mavzularga qisqacha to‘xtalib o‘tamiz.
Chempionlik uchun kurash haqida
Ayni damda «Manchester Siti» 90 ochko bilan yetakchilikni qo‘lga olib turibdi. Uni ortidan esa bir ochkolik farq bilan «Liverpul» ta’qib qilmoqda. Shunday paytda «shaharliklar» 38 turdagi «Aston Villa»ni mag‘lub etishi talab etiladi. Shuningdek, durang ham chempionlikka yetarli bo‘lishi mumkin. Ammo, u holda «Liverpul» «Vulverxempton»ni mag‘lub qila olmasligi lozim bo‘ladi.
Aksini ko‘radigan bo‘lsak, Stiven Jerrard shogirdlari «Etihad»da g‘alaba yoki durang qayd etishi, Klopp jamoasi esa «bo‘rilar»ni yutishi kerak. Ana shunda, mersisaydliklar chempionga aylanishi mumkin. Qolaversa, «Liverpul» durang bilan ham titulga erishishi mumkin. Bu nazariyaga ko‘ra, «Manchester Siti» o‘z o‘yinida mag‘lub bo‘lishi, «Liverpul» esa «Vulvz»ga yettitadan ko‘proq gol urishi kerak. Ana shunda gollar nisbati bilan ustunlikni qo‘lga kiritish imkoni tug‘iladi.
Agar siz bundan ham qizg‘in va ekstremal ssenariy xohlayotgan bo‘lsangiz, u holda Gvardiola jamoasi 6-0 hisobida mag‘lub etilishi, «Liverpul» esa 5-5 hisobida durang qayd etishi shart. O‘shanda, har ikki da’vogarning gollar nisbati, urilgan va o‘tkazib yuborilgan gollardagi statistikasida muvozanat vujudga keladi. Bu orqali esa chempionlik uchun yana bir «pley-off» o‘yini o‘tkazilishi mumkin.
YECHLning so‘nggi yo‘llanmasi uchun kurash haqida
«Manchester Siti», «Liverpul» hamda «Chelsi» yangi mavsum yo‘llanmasini yana naqd qildi. «Arsenal» va «Tottenxem» esa 38 turda so‘nggi yo‘llanmaga ega chiqishga harakat qiladi. «Shporlar»da vazifa ancha oson. Ular raqibdan ikki ochko oldinda, shuningdek, gollar nisbatida ham katta farq bor (15 ta gol). «Tottenxem» APLdan ketishi aniq bo‘lib ulgurgan «Norvich»ni yutsa yoki durang o‘ynasa, u holda YECHL chiptasi ularniki bo‘ladi. Ammo bu – «Tottenxem» va ulardan har narsani kutish mumkin. Shuningdek, o‘z uyida «kanareyka»lar ham g‘alabaga intilishi tayin. «Arsenal» esa «Everton»da ustun kelgan taqdirdagina, YECHLga chiqishi mumkin, ammo u ham yuqorida aytilganidek, «Norvich»ga bog‘liq.
Yevrokuboklar uchun jang haqida
«Liverpul» Angliya kubogi va liga kubogini qo‘lga kiritib, APLning qolgan jamoalariga Yevropa eshiklarini kattaroq ochdi. Bu narsa beshinchi va oltinchi o‘rin egalari Yevropa ligasiga avtomatik yo‘l olishini anglatadi. Ayni damda «MYU» 58 ochko bilan oltinchi o‘rinni band etgan. Undan keyingi pog‘onadagi «Vest Xem»da esa 56 ochko mavjud. Bu degani «MYU» so‘nggi turni g‘alaba bilan yakunlashi lozim. «Kristal Pelas»ga qarshi durang ham «qizil iblislar»ni YELdan mosuvo qilishi mumkin. Negaki, «Vest Xem»da gollari nisbati ancha yaxshi. Devid Moyes boshchiligidagi «bolg‘achilar» esa «Brayton»ni mag‘lub etish orqali, nisbatan saviyali bo‘lgan turnirda o‘ynash huquqini qo‘lga kiritishi mumkin. Yettinchi o‘rinni band etgan klub Yevropa Konferensiyalar ligasiga yo‘l oladi.
Jon saqlab qolish uchun hayot-mamot kurashi haqida
«Everton»ning o‘z uyida «Kristal Pelas»dan ustun kelishi, Lempard jamoasini APLda qolishini ta’minladi. Endilikda faqat ikki klub – «Lids» hamda «Byornli» jon saqlash uchun jang qilmoqda. Ushbu jamoalarning to‘plagan ochkolari bir xil (35). To‘plar nisbati esa «Byornli»da yaxshiroq. Shu sabab ular ayni damda «Lids»dan bir pog‘ona yuqorida, xavfsiz zonadan joy olib turibdi. Xullas, har ikki klub so‘nggi turda g‘alaba uchun o‘ynaydi. Bunda «Lids»ning missiyasi murakkabroq, albatta. Chunki Jessi Marsh shogirdlari nafaqat o‘z o‘yinida g‘alaba qozonishi, balki «Byornli»ning durangi yoki mag‘lubiyatini kutishga ham majburdir...
Jaloliddin ISMATOV tarjimasi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Шуҳрат Шокиржонов
Шерзод Ражабов
Қаҳрамон Асланов
