«PSJ» hujumchisi Kilian Mbappe Marca nashriga intervyu berdi. Hujumchi «PSJ»da nega qolgani, faqatgina «Real» emas, balki «Liverpul» bilan ham muzokaralar bo‘lib o‘tgani haqida gapirib o‘tdi.
Pul uchun Parijda qoldi deb hisoblashlari haqida
— Biroz xafaman, chunki faoliyatimning boshidayoq barchaga sabrli ekanligimni ko‘rsatganman. Doim futbol, unvonlar, muhim uchrashuvlar haqida gapirganman. Va pul haqida umuman og‘iz ochmaganman.
Odamlar xohlagan narsasini aytishi mumkin, lekin meni hamma biladi. «Real»ning barcha rahbarlari bilan gaplashdim, «PSJ» bilan suhbatlashdim. Florentino Peres bilan ham, Nosir al-Helayfi bilan ham pulni muhokama qilmaganman. Advokatim va onam pul haqida biroz gapirdi, ammo men emas. Men sport haqida gapiraman, chunki maydonda o‘ynayapman.
Hisob raqamimga pul tushganda qarashim mumkin, lekin bunga ahamiyat bermayman. Sovrinlar qo‘lga kiritish, eng yaxshisi ekanligimni isbotlash va baxtli bo‘lish uchun «PSJ»daman. Hozir baxtliman deb o‘ylayman.
«Real»ga o‘tmaganidan so‘ng bo‘layotgan tanqidlar haqida
— Buni qabul qilaman va tushunaman. Birinchidan, Madriddagi barchadan menga shunday mehr va muhabbat ko‘rsatgani uchun minnatdorman. Ismim «Real» va uning muxlislari tomonidan tilga olinganidan faxrlandim.
Ularning hafsalasi pir bo‘lganini tushunaman va bu normal holat. Menda bunga nisbatan hech qanday munosabat yo‘q. Fransuz bo‘lganim uchungina vatanimda qolganimni tushunishlarini xohlayman. Ular buni tushunishiga ishonchim komil.
Qachondir «Real»ga o‘tishi mumkinligi haqida
— Bir necha kun oldin yangi shartnoma imzolagan holatda «Real» haqida gapirish hurmatsizlik bo‘ladi, menimcha.
Orzu — bu yaxshi. Lekin men hozir haqida o‘ylayapman, butun diqqatim yangi shartnomaga qaratilgan. Keyinchalik nima bo‘lishini hech kim bilmaydi. «PSJ» bilan 3 yillik shartnomam bor va diqqatim keyingi mavsumga qaratilgan.
«Real» orzusi o‘tmish emasligi haqida
— U hech qachon o‘tmish bo‘lmaydi. Lekin men «PSJ» bilan shartnoma imzoladim. Kelajakda nima sodir bo‘lishini hech kim bilmaydi. Hozirim haqida bosh qotiryapman. Ayni damda Parij jamoasi bilan 3 yillik shartnomam bor.
Qaysi jamoaga o‘tishi borasida hammada har xil fikr bo‘lgani haqida
— Sen mashhur bo‘lsang, har doim senga nima qilishing kerakligini o‘rgatadiganlar topiladi (kuladi).
Bu bilan qanday kurashishi haqida
— Zavqlanaman, chunki o‘yinlarga 100% diqqatimni qarataman.
Florentino Peres «Real» futbolkasini jo‘natgani haqida
— U menga futbolka yubormagan.
«PSJ»da qolish qarorini «Real»ga bildirgani haqida
— Dastlab «Real» prezidenti Florentino Peresga qarorimni yetkazdim. Chunki uni va klubni juda hurmat qilaman. Shaxsan o‘zim bu haqida aytishni to‘g‘ri deb bildim. Bizning munosabatlarimiz yaxshi. Shundan so‘ng «PSJ»ga qolayotganimni va Parijda ko‘proq vaqt o‘tkazishni xohlayotganimni aytdim.
«Real»dan tashqari «Liverpul»dan ham qiziqish bo‘lgani haqida
— Ha, bu haqiqat. «Liverpul» bilan ham muzokara o‘tkazdim, chunki qizil — onamning sevimli rangi. U «Liverpul»ni yaxshi ko‘radi. Nega? Bilmadim, buni uning o‘zidan so‘rang (kuladi).
«Monako»da o‘ynab yurgan vaqtlarimda jamoa bilan uchrashganman. «Liverpul» — ajoyib jamoa. Yaqinda ular bilan ham suhbatlashdik, ammo uzoqqa cho‘zilmadi. Shuning uchun tanlov «Real» va «PSJ» o‘rtasida kechdi.
Bir yil oldin «Real»ga o‘tmoqchi bo‘lgani haqida
— O‘tgan yili «Real»ga o‘tmoqchi bo‘lganimni hamma biladi. O‘shanda ketish eng yaxshi qaror deb hisoblaganman. Ammo hozir barchasi o‘zgargan. Erkin agentga aylandim, fransuzman va mamlakatimga kerakligimni his qildim. Mamlakat uchun kerak ekansan, sen faqat futbol haqida emas, hayot haqida ham o‘ylashing zarur.
Faoliyatimni yakunlagach, oilam va do‘stlarim bilan birga Fransiyada yashayman. «Real» va uning muxlislari uchun qila oladigan yagona narsam menga bo‘lgan mehri uchun minnatdorligimni bildirishimdir. Bu aql bovar qilmaydigan narsa, chunki men u yerda hech qachon o‘ynamaganman. 14 yoshimda atigi bir hafta Madridda bo‘lganman, lekin «Real» juda ajoyib klub va ularga Chempionlar Ligasi finalida omad tilayman.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
