Italiyada mavsum qiziqarli o‘tishi aniq edi. Sababi Massimiliano Allegri “Yuventus”ga qaytdi, Joze Mourinyo “Roma”, Maurisio Sarri esa “Lasio” boshqaruviga keldi. Shu bilan birga, “Inter” va “Milan” o‘z tarkibini yanada kuchaytirdi. Mavsum haqiqatdan ham qiziqarli va voqealarga boy bo‘ldi. Shu sabab bugun yakuniga yetgan A seriya haqida biroz suhbatlashamiz.
Chempion: “Milan”
Chempionlar ligasi: “Milan”, “Inter”, “Napoli”, “Yuventus”
Yevropa ligasi: “Lasio”, “Roma”
Konferensiyalar ligasi: “Fiorentina”
Elitadan tushib ketganlar: “Kalyari”, “Jenoa”, “Venesiya”
A seriyaga chiqqanlar: “Lechche, “Kremoneze”, “Monsa”
Mavsumning eng yaxshi to‘purari
A Seriyada mavsumning “eng yaxshi to‘purari” Chiro Immobile bo‘ldi. “Lasio” hujumchisi 27 marta o‘z hisobiga gol yozdirib qo‘ydi. Bu uning Italiya chempionatidagi eng yaxshi uchinchi natijasi hisoblanadi — 2017/18 yil 29 gol va 2019/20 yil 36 gol. Hujumchi Dushan Vlaxovich to‘purarlar poygasida ikkinchi o‘rinni egalladi. Mavsum davomida "Fiorentina" va "Yuventus" safida to‘p tepgan serb 24 ta gol urishni uddaladi. Kuchli uchlikni “Inter” hujumchisi Lautaro Martines 21 gol bilan yakunlab berdi. Qiziqarli tomoni Immobile penaltidan 7 marta unumli foydalangan.
Mavsumning eng yaxshi assistenti
A seriyada mavsumning “eng yaxshi assistenti” nomi Domeniko Berardiga berildi. “Sassuolo” vingeri 14 marta sheriklarining gol urishiga yordam berdi. Umuman olganda, italiyalik futbolchi har bir o‘yinda o‘rtacha 0,43 golli uzatma berdi, bu esa chempionatdagi eng yaxshi natija hisoblanadi. Bu ko‘rsatkich bo‘yicha ikkinchi o‘rinni "Inter" yarim himoyachilari Nikolo Barella va Xoqon Chalxano‘g‘li egalladi. Har ikki futbolchi hisobida 12tadan golli uzatma bor. Kuchli uchlikni “Lasio” yarim himoyachisi Sergey Milinkovich-Savich yakunlab berdi. Serb futbolchisi 11 ta golli uzatmani amalga oshirdi. Liganing “eng yaxshi assistenti” sovriniga ega chiqqan Berardi mavsumni juda yaxshi o‘tkazdi, ammo “Sassuolo” bor-yo‘g‘i 11-o‘rinni egalladi, xolos.
“Gol+pas” bo‘yicha eng yaxshi ko‘rsatkich
“Gol+pas” tizimida eng yaxshilar Immobile va Berardi bo‘ldi. Har ikki futbolchi ham 29 ochkodan jamg‘argan. Shu bilan birga, “Lasio” forvardi 27+2, “Sassuolo” vingeri esa 15+14 ko‘rsatkich qayd etgan. Keyingi o‘rinlarni Vlaxovich (27 ochko, 24+3) va Lautaro (24 ochko, 21+3) egalladi. “Lasio” yarim himoyachisi Milinkovich-Savich gol+pas tizimida 22 ochko (11+11) to‘pladi. OAV xabariga ko‘ra, Berardi va Savich yangi mavsum qaysidir grand klubga o‘tishi mumkin. Kuzatamiz.
Mavsumning eng yaxshi darvozaboni
Mavsumning eng yaxshi darvozaboni nomini haqli ravishda Mayk Menyan oladi. “Milan” darvozaboni 17 ta o‘yinda o‘z davozasi dahlsizligini saqlab qolib, “rossonerilar”ga chempionlik uchun kurashda katta yordam berdi. Qolaversa, bu ligadagi eng yaxshi ko‘rsatkich. Samir Xandanovich (“Inter”) va Rui Patrisiu (“Roma”) esa 15tadan “quruq” o‘yin o‘tkazgan. "Napoli" darvozaboni David Ospina 13 marta “nol”ga o‘ynagan. Menyan – “Milan”ning asosiy qahramonlaridan biri. Sababi uning "rossonerilar" safidagi birinchi mavsumi va Mayk A seriyaning “eng yaxshi darvozaboni” bo‘ldi.
Mavsum jamoasi
Bu nom ham “Milan”ga berilishi kerak. “Rossonerilar” haqiqiy kambekni amalga oshirishdi, ayniqsa 2 yil oldin Yevropa ligasi yo‘llanmasini zo‘rg‘a qo‘lga kiritgan jamoa bugungi kunda chempionga aylandi. 2020/21 yilgi mavsumda ham “qizil-qoralar” Skudetto uchun kurashga yaqin keldi, biroq A Seriya turnir jadvalida “Inter”dan 12 ochko ortda qolgan holda 2-o‘rinni egalladi. "Milan" joriy mavsum chempionlik uchun kurashda asosiy raqibi - "neradzurrilar"ni 2 ochkoga ortda qoldirdirgan holda oltin medallarga ega chiqdi. Skudetto - "rossonerilar" uchun katta muvaffaqiyat. "Qizil-qoralar" 11 yildan so‘ng yana Italiya futbolining cho‘qqisiga qaytishdi. Ajablanarlisi shundaki, shundan so‘ng darhol klub egalari jamoani sotishga qaror qilishdi. Nimadir g‘alati.
Mavsum omadsizligi
Mavsumning eng omadsiz jamoasi "Yuventus" bo‘ldi desak ham bo‘ladi. Bunday darajadagi jamoa Skudettoga yo‘l olishi kerak. Ammo ketma-ket 2 yildan beri “byankonerilar” faqat Chempionlar ligasi yo‘llanmasi uchun kurashmoqda. Andrea Pirloning bosh murabbiy etib tayinlanishi bilan bog‘liq tajriba hech qanday naf bermadi. Massimiliano Allegrining qaytishi bilan Turinda barqarorlik qaytayotgandek tuyuldi. Biroq, "keksa sinyora" yana bir omadsiz mavsumni o‘tkazdi. Keyingi mavsum "Yuventus" Milan klublariga chempionlik uchun kurashni taklif qilishi aniq. Aks holda rahbariyatda Allegri va futbolchilar kuchli tanqid ostida qolishi mumkin.
Xayrlashuvlar
Bu mavsum Turin klubi uchun juda og‘ir kechdi. Biriga natijalar sabab bo‘lgan bo‘lsa, yana biriga Jorjo Kyellini va Paulo Dibala bilan xayrlashish sabab bo‘ldi. Birinchisi klub afsonasiga aylandi, ikkinchisi esa...
Kyellini bilan vaziyat boshqacha. Jorjo 17 yil davomida "keksa sinyora" liboslarini himoya qildi va Turin klubini sharaf bilan tark etadi. Argentinalik futbolchining ketish sababi esa noma’lum. Ko‘plab OAV xabariga ko‘ra, yangi shartnoma borasida kelisha olishmagan. Bu yigitlar faoliyatini qayerda davom ettirishi hozircha noma’lum, ammo baribir ularning ketishi klub uchun katta yo‘qotish.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
