«Lans» yozning so‘nggi oqshomi o‘z maydonida «Loryan»ni 5:2 hisobida mahv etdi.
Biroq final hushtagi yangraganidan keyin ham muxlislar o‘z o‘rinlaridan qo‘zg‘alishmadi. Chunonchi, ularni oldinda klub hayotidagi yana bir muhim voqea kutayotgandi - chin sardor Seko Fofana bilan yangi shartnoma tuzish marosimi. Tadbir o‘ta dabdabali tarzda tashkil etildi: futbolchi nomini jo‘r bo‘lib olqishlayotgan 37000 muxlis, jamoadoshlar tomonidan tizilgan hurmat yo‘lakchasi, markaziy doira ichiga qo‘yilgan stol va andakkina feyerverk...
Seko Fofananing o‘zi jarohat tufayli o‘sha o‘yinda ishtirok etolmadi, maydonga esa ko‘zlarida yosh bilan tushdi. U shartnoma qog‘oziga tezda imzo chekdi va klub rahbariyatidan «Sardor Seko-2025» yozuvi tushirilgan futbolkani qabul qilib oldi. «Bu yerga kelganimda, asosiy maqsadim bosqichma-bosqich rivojlanish edi. O‘ylaymanki, joriy mavsum ancha uzoqqa borishga qodirmiz», - dedi sardor muxlislarga yuzlanib. «Lans» bosh direktori Arno Puil ham quvonchini yashirib o‘tirmadi: «Seko bilan shartnoma muddatining uzaytirilgani - klub barqarorlik yo‘lini tutgani belgisi. Fofana safimizga qo‘shilgan kundan e’tiboran loyihani amalga oshirish yo‘lida maydonda ham, uning tashqarisida ham bor kuch-mahoratini sarflamoqda. Ana shu fidoyiligi evaziga chin sardor rolida muxlislar mehrini qozondi va yosh futbolchilar uchun asl professionallik namunasiga aylandi». Darhaqiqat, hozir «Lans»da hammasi risoladagidek ketmoqda: jamoa Liga 1ning dastlabki 11ta turida atigi bir marta mag‘lubiyatga uchradi va 7ta g‘alaba hamda 3ta durang evaziga 24 ochko jamg‘arib, turnir jadvalining yetakchi uchligida bormoqda.
Sardor Seko - hujumkor yarim himoyachi. Yozda uni «PSJ» o‘z tomoniga og‘dirmoqchi bo‘ldi. Fofana - «Parij» («PSJ» emas) klubi tarbiyalanuvchisi. U «Manchester Siti» yoshlar jamoasida ham ma’lum muddat shug‘ullangan. «Lans»ga esa 2020 yili «Udineze»dan o‘tdi. O‘shanda klub transfer uchun 8,5 mln. yevro ajratishdan tiyilmadi. To‘g‘risi, bu Liga 1ga qaytgan klub uchun jiddiy xarajat edi. E’tiborli tomoni, Fofana o‘sha vaqt Angliya jamoalari va «Atalanta»dek hujumkor klub taklifini rad etdi: «Tanlovimni hamma birdek tushungani yo‘q. O‘zi anchadan buyon «Lans» o‘yinlarini kuzatib yurardim - do‘stim Arsen Elogo «Grenobl» safida shu jamoaga qarshi maydonga tushganida, uning stadionidagi muhitdan lol qolgandim. Italiyada esa oilasiz yashab, ancha zerikdim. Boz ustiga, koronavirus pandemiyasi umumiy vaziyatni yanada murakkablashtirdi. Qisqasi, hammasi bir bo‘lib, Fransiyaga qaytishni istadim. Aslida «Atalanta» mendan rozilik olgandi, «Udineze» bilan ham kelishuvga erishgandi. Biroq so‘nggi lahzada hammasi birdan o‘zgarib ketdi. Mana, endi futboldan chinakam zavq olish imkonini beradigan jamoa bilan birgaman».
Fofana chindan ham, o‘ta qisqa vaqt ichida jamoa yetakchilari safidan joy oldi. Xususan, ikkinchi mavsumdayoq sardorlik bog‘ichiga loyiq topilgach, hayratlanarli darajada o‘yin ko‘rsata boshladi. Debyut mavsumini 8ta gol bilan yakunlagan yarim himoyachi zarbalar soni bo‘yicha faqat dahshatli Kilian Mbappedan ortda qoldi. Shu joyda alohida eslatib o‘tamiz, Seko hujum vakili emas, markaziy yarim himoyachidir. Muhimi, u kutilmagan reydlari bilan raqib jarima maydoniga yorib kirishni o‘rniga qo‘yadi. Muvaffaqiyatli mavsum yakunida Fofanani Fransiya chempionati ramziy terma jamoasiga kiritishdi. Albatta, markaziy chiziqqa. U bunda Orelyen Tchuameni, Dimitri Payet va Kilian Mbappe bilan birga to‘rtlik hosil qildi. Shuningdek, Sekoni Liga1ning afrikalik eng yaxshi futbolchisi sifatida e’tirof etishdi va unga marhum Mark-Vivyen Foe nomidagi sovrinni topshirishdi. Aytish joiz, Fransiya futbolida bu mukofotning nufuzi ancha baland. Bundan tashqari, Liga 1ni ingliz tilida yoritib boruvchi mahalliy Get French Football nashri Sekoni «PSJ»ning barcha yulduzlaridan ustun qo‘yib, 2021 yilning eng yaxshi futbolchisi sifatida tanladi. Seko shuningdek, L`Equipe nashri elit ro‘yxatida ham top-10da qayd etildi.
Fofana joriy mavsumni ham o‘ta shiddatli boshladi - startdagi 4ta o‘yinda 2ta gol va 2ta samarali uzatma. Lekin «Lans»da xavotir ham yo‘q emas. Zero, Sekoning shiddati oshgan sari kuchli va boy klublarning unga e’tibori tobora ortmoqda. Xususan, «Sevilya», «Renn», «Arsenal», «Nyukasl», hattoki, «PSJ»ning futbolchiga qiziqayotgani haqida gap-so‘zlar bor. Nafaqat gap-so‘zlar, balki amaliy harakatlar ham. Misol uchun, Parij superklubi sport direktori Luish Kampush «Lans» yetakchisini Lionel Messi, Neymar va Kilian Mbappe kabi megayulduzlar qatorida ko‘rish niyati borligini yashirmadi. Fofana esa chalg‘imaslik uchun turli gap-so‘zlardan yiroq yurishni istamoqda va shu maqsadda shaxsiy agentini ham o‘zgartirdi, biroq bundan naf chiqqani yo‘q. Qo‘shimchasiga, «Lans» bir necha yetakchilaridan ayrilgan. Masalan, Jonatan Kloss «Marsel»ga o‘tib ketdi, tayanch yarim himoyachisi Sheyk Dukure «Kristal Pelas»da o‘ynashni ixtiyor etdi. Aynan shu futbolchi hujumga otlangan Fofana o‘rnini to‘ldirib turardi. To‘g‘ri, yo‘qotishlar o‘rnini to‘ldira oladigan yigitlar ham yo‘q emas. Masalan, «Bordo»dan taklif etilgan Jan Onana darhol o‘zini ko‘rsata boshladi. Hozirda unga ham top-klublar tomonidan qiziqish katta. Ayniqsa, «Milan»dan...
«Lans» qatorasiga ikki mavsumni Liga 1 turnir jadvalining 7-pog‘onasida yakunladi. Endi esa jamoa yuksak sport formasidagi Seko yetakchiligida nihoyat, yevrokuboklarga chiqsa, ajabmas. Agar omadi chopib qolsa, «Lans»ni YECHLda ko‘rishimiz ham mumkin.
A.ABDUVALIXO‘JAYEV tayyorladi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
