Bugun «Lusail» stadionida jahonning eng kuchli terma jamoasi aniqlanadi. Bir qarashda Argentina va Fransiya juftligidan favoritni aniqlash qiyindek - lov etib ko‘ringan, birini ikkinchisidan ustun qo‘yadigan xususiyat deyarli mavjud emasdek ular orasida. Hatto turli xil portallar tomonidan chiqarib boriladigan statistik ma’lumotlar ham tarozining bir pallasini yaqqol bosib bera olmaydi. O‘zaro o‘yinlarga to‘xtalar ekanmiz, rasmiy bahslarda bu jamoalar 5 marta to‘qnash kelgan va ularning to‘rttasida janubiy amerikaliklarning qo‘li baland kelganini ko‘rish mumkin. Fransuzlar so‘nggi JCHning nimchorak finalidagina Argentinani mag‘lub eta olgan - 4:3.
Bu safar endi ular yana mundialda to‘qnash kelmoqda, faqat yirikroq bosqich - finalda. Bu yerda yo‘qotiladigan hech narsa yo‘q, barcha rezervlar ishga solinadi. Bevosita o‘yinga to‘xtaladigan bo‘lsak, «uch ranglilar» tarkibida negadir hal qiluvchi uchrashuv oldidan kutilmagan yo‘qotishlar sodir bo‘lmoqda: dastlab 3-4 futbolchida shamollash alomatlari ko‘zga tashlangan edi. Biroq keyinchalik bu masala deyarli hal etildi. Buning ustiga jurnalistlar «o‘lganning ustidan tepgan» qabilida Deshamdan tinmay Benzema haqida so‘rashni davom ettiryapti, ularning munosabatlarini suv yuzasiga chiqarish yo‘lida qo‘lidan kelgan hamma ishni qilmoqda. Ammo ayyor Desham bu borada hecham sir boy bergani yo‘q.
U savolni yopiqligicha qoldirishni maksimal uddalayapti. Bu yog‘i Karimning o‘z qo‘lida qolgandi: andisha ostonasidan o‘tib finalda o‘ynaydi, yoki bo‘lmasa sheriklari pishirgan oshdan uzoqroq bo‘ladi. U ikkinchisini tanladi. Uning maydonga tushmasligi ayni paytda jamoa muhitiga plyus bo‘lsa bo‘ladiki, aslo zarar keltirmaydi. 5 ta gol urgan Mbappe, 4 ta gol urgan Jiru, 3 ta assistni o‘z hisobiga yozdirib qo‘ygan Grizmanlardan qay biri unga issiq o‘rnini bo‘shatgisi keladi deysiz? Bizningcha ham hammasi o‘z o‘rnida qolgani yaxshi. Benzemasiz Fransiya eyforiyalardan xoli, sergak tortgan, mag‘lubiyat hidini unutmaydigan jamoa bo‘lib shakllandi. Qolgan feyk xabarlar esa Deshamning aqlli hiylasi bo‘lib chiqdi, u o‘yindan oldin birinchi yurishni amalga oshirdi...
Opta ma’lumotlariga ko‘ra zarba, vaziyat yaratish va zarbaga sharoit yaratish borasida Messi, Grizmann, Mbappe hamda Teo Ernandes yuqori o‘rinlarni egallaydi. Turnir to‘purarlari va assistentlari orasida ham aynan shu ikki yurt vakillari yetakchi. Gap uzoqroqqa borganlikda emas, mundial boshidan beri yuqorida nomlari zikr etilgan futbolchilar mehnatdan charchagani yo‘q. Qaysi jamoa yutsa ham g‘alabaga haqli ersa ajab emas. Argentinani boshida ko‘pchilik asosiy favoritlar qatoriga qo‘shmadi. Mukammal tarkibni muvozanatga solish, bir jamoa uchun o‘ynashni yig‘ishtirish va hokazo.
Biroq yakunda Skaloni eng aqlli murabbiylardan ekanini isbotladi. Har bir o‘yinga antiterror ishlab chiqdi, raqibga qarab moslashdi, xorvatlarni ularning o‘z uslubida yengdi, niderlandlarni metin iroda bilan taslim etdi, autsayderlarga qarshi juda xotirjam turib berdi. Buning ustiga Messi o‘yindan o‘yinga yayrab harakat qilmoqda, avvalgi mundiallardan ham ko‘ra ko‘proq muhabbatini namoyish etmoqda jamoasiga, bu samimiy muhabbatdan, qotil ijroga aylanib ketyapti. Leoda sovuqqonlik va xotirjamlik mukammal tarzda qorishib ketgan. U jahon chempioni bo‘lishni hammadan ko‘proq xohladi. Bugun Messi jahon kubogini olsa, bundan faqatgina futbol yutadi. Tan olaylik, u chempionlik yo‘lida hammadan ko‘ra haqliroq o‘yin namoyish etdi.
Rosariodagi bir bolakay orzusi, Maradona ruhi, yirik ummondagi kichik bir kemtikning to‘lishi va butun boshli munozaraga chek qo‘yilishi uchun ham Bugun u zafar quchishi kerak, aks holda tarix uni kechirmaydi.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
