30 yoshli hujumchi Denni Ingzning qat’iy xulosasiga ko‘ra, uning tajribasi aynan «Vest Xem»ga kerak.
Futbolchi shuning barobarida bugungi ambisiyalari bilan ham «bolg‘achilar»ga mos kelishini ta’kidlamoqda. Xullas, angliyalik hujumchi Birmingem «Aston Villa»sidan Sharqiy Londonga bejiz ko‘chib o‘tmaganini baralla aytmoqda. Ingz APL 21-turidan o‘rin olgan «Everton»ga qarshi o‘yin (2:0)da «bolg‘achilar» libosida debyut qilishga ham ulgurdi. Ungacha esa klub rasmiy saytiga intervyu berib, hamisha gavjum «London» stadioni mehrini qozonish istiqboli haqida gapirdi, buning uchun imkoni boricha ko‘proq gol urishi zarurligiga alohida to‘xtaldi.
- Denni, «Vest Xem Yunayted» oilasiga xush kelibsiz! Keling, suhbatimizni transferingiz qanday amalga oshgani haqida boshlasak.
- To‘g‘risi, bu men ishtirok etgan transferlar orasida eng tez hal qilingani bo‘lsa kerak. Hammasi juda tez rivojlandi. Uyda chaqalog‘imizni o‘ynatib o‘tirgandim, shu payt shaxsiy agentim qo‘ng‘iroq qilib, shoshiltirdi: «Darhol tayyorlan, Londonga boramiz». Qisqasi, «Vest Xem»ga o‘tishim tarixi chindan ham, juda qisqa... Ikkinchi tomondan, uzoq vaqtdan buyon futbol ichidaman va bu kabi holatlarda qanday yo‘l tutishni aniq bilaman.
- Sharqin London klubida ajoyib insonlar ishlashadi, deylik, ular sizni ham 1000 yillik qadrdon do‘stdek iliq kutib olishdi...
- O-o, gap yo‘q! Takrorlayman, hammasi juda tez sodir bo‘ldi. Umuman, hozirgacha futbolda ko‘rganlarimning hammasida o‘ziga yarasha ajoyib tomonlari bor. Qolaversa, har bir futbolchi o‘ziga qulay joyda bo‘lishga intilishi tabiiy hol. Mana, jamoaga kelishim bilan hamma bilan uchrashdim, imkon qadar chehralarni eslab qoldim. Endi maydonda o‘z missiyamni talab darajasida bajarish maromiga tushib olsam, bas. Xullas, chetda qandaydir muammo yo‘q - hammasi joyida.
- Jamoada Bouen, Benraxma, Paketa va Fornals kabi sifatli assistentlar bor. Bunday guruh davrasiga tushish har qanday hujumchini to‘lqinlantirib yuborsa kerak. Sizda hayajon ham sezilyaptimi?
- To‘xtang, 18-20 emas, 30 yoshli futbolchiman axir. Bunday ijrochilar bilan o‘ynash esa, darhaqiqat, ajoyib! Faqat hozir men uchun yigitlar bilan iloji boricha ko‘proq birga vaqt o‘tkazish, yaxshi tanishish muhim. Shunda maydonda bir-birimizni tushunib to‘p suramiz. Boshqacha aytganda, avvalo, klubdoshlarim maydonda qanday harakatlanishimni xohlashlariyu, muayyan vaziyatlarda nima qilishim zarurligini tushunib olishim zarur. Albatta, «Vest Xem»ga ko‘proq gol urish va maksimal darajada yordam berish uchun keldim. Umid qilamanki, jamoaga kerakman va o‘yinga o‘zgacha jilo bag‘ishlash qo‘limdan keladi.
- Jamoa sardori Deklan Rays bilan Angliya terma jamoasida birga o‘ynagansiz. U «Vest Xem» o‘yinida muhim rolga ega. Deklan bilan maydonda yana uchrashishga ilhaqligingiz tayin...
- Albatta, shunday. Rays - top-darajadagi futbolchi. Juda iste’dodli, istiqboli baland. Shu yoshidayoq yetuk ijrochiga aylanganiga birdan ishonish qiyin. Shuning barobarida Deklanni ajoyib yigit sifatida hurmat qilaman. To‘g‘ri, o‘yinchilik qobiliyatini ko‘proq qadrlayman, baribir. Umidvormanki, maydonda yana birga o‘ynash asnosida muxlislarga ko‘p quvonch ulashamiz hali.
- O‘z o‘yiningizni qanday tavsiflaysiz, asosiy kuchli tomoningiz nima?
- O‘ylaymanki, APLda orttirgan tajribam evaziga nafaqat maydon, balki uning tashqarisida ham jamoaga sifatli yordam bera olaman. Bilaman, «Vest Xem» tarkibida butun dunyodan kelgan ajoyib yigitlar jamlanishgan. Demak, nafaqat o‘z tajribam bilan o‘rtoqlashaman, balki yana yangi qirralarni kashf etishdan umidvorman. Futbolda har bir yangi jamoa - bu yangi dunyo, yangi dunyoqarash. Maydondagi harakatim asosiga kelsak, birinchisi - gol urish. Shuningdek, o‘yin borishiga qarab, raqibga qo‘shimcha bosim yuklashni ham yaxshi bilaman. Lekin asosiy vazifam o‘zgarmaydi - to‘xtamay gol urishim kerak. Hujumchida bundanda yaxshiroq yana qanday sifat bo‘lishi kerak...?
M.PO‘LATOV tayyorladi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
