“Andijon”ning Qarshida “Nasaf” ustidan qozongan g‘alabasida, shubhasiz, darvozabon Eldor Adhamovning hissasi katta. U murakkab seyvlarni amalga oshirib, jamoasini muqarrar gollardan saqlab qoldi.
"Darvozabon — yarim jamoa" deb bejizga aytishmagan. Buni Adhamov yana bir karra isbotlab berdi. Jonini jabborga berib o‘ynagan darvozabon ushbu qimmatli g‘alaba haqida shunday dedi:
— Xudoga shukr, bu o‘yin biz uchun juda omadli chiqdi, - deya gap boshladi, Adhamov. - “Nasaf”ning har bir pozisiyasida yaxshi o‘yinchilar borligini va jamoaning umumiy holatda kuchli ekanligini bilardik. Buni butun O‘zbekiston futboli biladi. Qo‘ldan kelganicha “Nasaf”ning o‘yin uslubini o‘rganishga harakat qildik. Shunga yarasha bizga vazifa qo‘yildi: darvozamizdan to‘p o‘tkazib yubormaslik va oldingi chiziqda imkoniyatlardan maksimal foydalanish. Xudoga shukr, himoyada tartibli o‘ynadik. O‘zimiz yaratgan vaziyatdan gol ura oldik. Birinchi taymda ko‘proq vaqtimizni hujumda o‘tkazdik. Ikkinchi bo‘limda “Nasaf” bosimni oshirdi. Shuning uchun chuqurroq himoyalanishga majbur bo‘ldik. Qarshi hujumdan foydalanib ketdik. Har doim ham bunday gol ko‘ravermaymiz. Kutilmagan pozisiyada kutilmagan zarba bo‘ldi. Zarba darvozabon uchun juda noqulay chiqdi.
Bu o‘yinga biz qattiq tayyorlandik va intizorlik bilan kutgandik. Oson uchrashuv bo‘lmasligini bilardik. Mendan tashqari himoyachilarimiz ham ko‘p vaziyatlarni bartaraf etishdi. Men ham qo‘limdan kelganicha jamoamni gollardan saqlashga harakat qildim. Xudoim o‘zi oxirigacha qo‘llasin. Raqib hujumlarini bartaraf qilganimizdan keyin ham hali o‘yin tugamagandi. His-tuyg‘uga berilmadik, muvozanatni yo‘qotmasdan oxirigacha maksimal kuchimizni sarfladik. Yana bizga hujumlar bo‘lishini bilardim. Lekin, baribir darvozabon xavfli vaziyatlarni bartaraf etganida bu unga ishonch beradi. Mavsumni yaxshi boshlab oldik va muxlislarni xursand qildik. Bu yog‘iga bo‘shashish kerak emas.
— “Nasaf” darvozabonining o‘rnida siz bo‘lganingizda Sardor Abdunabiyevning yo‘llagan zarbasini qaytara olarmidingiz yoki...
— Bunday savolga javob berish uchun oldin o‘sha pozisiyada bo‘lish kerak edi. Hozir biror nima deb bo‘lmaydi. Hamkasbini muhokama qilish to‘g‘ri emas. Umid Ergashevni qanday darajadagi darvozabon ekanini hamma yaxshi biladi. Kuchli posbon. Shaxsan menga uning o‘yinlari yoqadi. O‘sha paytda zarba juda kuchli va noqulay bo‘ldi, deb o‘ylayman. Kutilmaganda zarba berildi.
— O‘yindan so‘ng sizni g‘alaba bilan birinchi bo‘lib kim tabrikladi?
— Har doimgidek birinchi navbatda ota-onam qo‘ng‘iroq qilib tabrikladilar. Olgan jarohatim haqida so‘rashdi.
— Xo‘sh, jarohatingiz qanday, jiddiy emasmi?
— Xudoga shukr, jarohatim juda ham qo‘rqinchlik emas. Tezroq tiklanishga harakat qilaman.
“Andijon” matbuot xizmati.
Qo‘qon-1912
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
