Bugundan O‘zbekiston U19 chempionati boshlanadi. “Andijon” U19 jamoasi dastlabki o‘yinini 13 aprel kuni “Bunyodkor”dagi tengqurlariga qarshi o‘tkazadi.
Ayni damda yosh “burgutlar” bo‘lajak bellashuvga tayyorgarlikni davom ettirishmoqda. Qishda “Andijon” U19 ga Islom Ahmedov bosh murabbiy sifatida tayinlangandi. Keyinchalik ma’lum sabablarga ko‘ra, murabbiy o‘zgardi va Orif Mamatkazin endilikda “Andijon” U19 bosh murabbiyi sifatida ishga kirishdi.
Muxlislar yaxshi biladilarki, Orif Ismoilovich hayotini futbolga bag‘ishlagan bo‘lib, faoliyatini “Andijon”da olib borgani hammaga yaxshi ayon. Qolaversa, jamoada murabbiylik qilgan va yana boshqa lavozimlarda ham mehnat qilgan.
Shunday ekan, Orif Mamatkazin o‘zi uchun qadrdon bo‘lgan jamoasidagi ishini yana davom ettiradi. Bu safar unga “Andijon” U19 jamoasi ishonib topshirildi.
Orif Ismoilovich yoshlar bilan ko‘rilayotgan tayyorgarlik, ularni saralash ishlari va boshlanayotgan chempionat borasida to‘xtalib o‘tdi.
— Orif Ismoilovich, O‘zbekiston U19 birinchiligi ham boshlanyapti. Ayting-chi, “Andijon” U19 tarkibiga yoshlarni saralash ishlari qanday olib borilmoqda?
— Xabaringiz bor, boshida Islom Ahmedov boshchiligida tayyorgarlik ko‘rishgan. Bungacha o‘yinchilar saralangan va biz qisqa muddat ichida ularni ko‘zdan kechiryapmiz. Viloyatimizdagi boshqa tumanlardan murabbiylar yosh futbolchilarni bizga tavsiya qilishyapti. Ularni ko‘ryapmiz. Kimni iqtidori va salohiyati yuqori bo‘lsa, o‘shalarni tarkibimizga jalb qilyapmiz. Mashg‘ulotlarda ham tekshirib boryapmiz. 13 aprel kuni “Bunyodkor” U19 jamoasiga qarshi dastlabki o‘yinimizni o‘tkazamiz. Asosiy vazifalarimizdan biri iste’dodli o‘yinchilarni U21 jamoamizga yetkazib berish. Shu bilan birga chempionatda yuqori o‘rinlarga harakat qilamiz. Hozir 22 ta futbolchi zayavka qilingan. Yana potensiali yuqori bo‘lgan futbolchilarni ko‘rsak, ularni ham tarkibimizga qo‘shib olish imkoniyati bor.
— Ancha vaqtdan so‘ng yana murabbiylikka qaytdingiz...
— Ha, men yana o‘z ishim bilan shug‘ullanyapman. Murabbiylik mening sevimli ishim. Yana qaytganimdan xursandman.
— O‘tgan yili “Andijon” U19 chempionatda faxrli 3-o‘rinni qo‘lga kiritgandi. Bu yil sizning boshchiligingizda o‘sha natijani takrorlash mumkinmi?
— Albatta, harakat qilamiz. Biz undan ham yuqori o‘rinni olishga intilamiz. Bu futbol. Unda kimdir yutadi, kimdir yutqazadi.
— Yoshlar orasida iqtidori yuqori o‘yinchilar ko‘zga tashlanyaptimi?
— Bolalar ko‘p, ular bilan ishlash kerak. Ularga doim aytyapmiz, sizlarga U21 jamoasiga yo‘l ochiladi, keyinchalik asosiy jamoaga yo‘l olasizlar, hammasi o‘zinglarga bog‘liq, faqat harakat va mehnat qilish muhimligini uqtiryapmiz.
— “Bunyodkor” U21 ga qarshi uchrashuvga tayyorgarlik qanday ketyapti?
— “Bunyodkor” yoshlari bo‘yicha to‘liq ma’lumot yo‘q. Lekin eshitishimcha, u yerda yaxshi shakllangan jamoa bor. Bilasiz, “Bunyodkor” akademiyasidan doim iqtidorli bolalar yetishib chiqadi. Yaxshi o‘yin bo‘ladi. Biz ham o‘z oldimizga qo‘ygan vazifa sari jiddiy harakat qilamiz.
“Andijon” matbuot xizmati.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
