Jahon futboli tarixidan munosib joy olgan Italiya milliy jamoasi va «Yuventus» afsonasi Andre Pirlo hozirda Turkiya chempionatida murabbiylik bo‘yicha oldinga qadam tashlash harakatida.
Vaqtida maydon va o‘yinni nozik his qilishi ortidan «maestro» laqabini olgan sobiq yarim himoyachi «Fotih Qoragyumryuk» klubini chakki boshqarmayapti. Har holda, tarkibida hamyurtimiz Otabek Shukurov to‘p surayotgan kamtarin jamoada o‘yin chizmasi bor, natija ham yo‘q emas. Daily Mail nashri jurnalistlari yaqinda Pirlo bilan Turkiya, mahalliy Superliga va hozirgi klubi haqida suhbatlashishdi. «Maestro» intervyu davomida shuningdek, Antonio Konte va Karlo Anchelotti faoliyatiga alohida to‘xtaldi, murabbiylik og‘ir kasb ekanligiga qaramay, bugungi ishidan zavqlanayotganini alohida ta’kidladi.
- Suhbat boshida dardli mavzuni eslashga majburmiz: Turkiyada ro‘y bergan dahshatli zilzila ko‘pchilik qatori sizni ham larzaga solgani o‘z-o‘zidan tushunarli. Matbuotda tabiiy ofatdan jabrlangan insonlarga bevosita yordam qo‘lini cho‘zganingiz haqida xabarlar tarqaldi. Shu xususda batafsil gapirib bersangiz...
- Zilzilani eslash ham og‘ir. Shunday ko‘ngilsiz ofat yuz berganidan afsusdaman, albatta va turk xalqiga hamdardman. Mana, ko‘pchilik fojeaga befarq qaragani yo‘q, imkon doirasida zilzila oqibatlarini bartaraf etishda jonbozlik ko‘rsatdi. Albatta, bunday holatda birlashish kerak. Chunki katta ko‘lamli fojealarda qo‘llab-quvvatlov va yordam juda muhim. Zilzilada yaqinlarini yo‘qotganlarga qiyinligini juda yaxshi tushunaman, lekin odatiy hayotga qaytish kerak, baribir. Bu borada turklar irodalariga qoyil qoldim. Fursatdan foydalanib, tabiiy ofatdan aziyat chekkanlarni yana bir marta mahkam quchib qolaman. Biz sizlar bilanmiz!
- Endi futbolga ko‘chaylik. «Fotih Qoragyumryuk» qanday klub, Turkiya chempionati haqida nima deya olasiz?
- O‘z oldimga hamisha katta maqsadlar qo‘yishga odatlanganman. Tabiatim shunaqa. Deylik, futbolchilik faoliyati davomida hamisha katta sovrinlar yutishga intilganman. Murabbiylikda ham aslo o‘zgarmadim. Turkiya Superligasiga esa rivojlanish, yangi sohadagi ishimga asos solish uchun yuzlandim. «Fotih Qoragyumryuk»ka kelsak, klubning ambisiyalari menikiga to‘liq mos. Turkiya Superligasiga esa ortiqcha to‘xtalish shart emas. Bu yerda tetik futbol va qaynoq muhit hukmron.
- Turkiyadagi yashash sharoitiga o‘rganib oldingizmi, yaqin kelajakdagi rejalaringiz qanday?
- Turkiya - yashash uchun ajoyib mamlakat. Hammasi zamonaviy. To‘g‘ri, boshida mahalliy sharoitlarga moslashishda ancha qiynalganim rost. Axir bu yerdagi hayot tarzi Italiyadagidan keskin farqlanadi. Muhimi, hozir barchasiga ko‘nikib ulgurdim va qandaydir muammo yo‘q. Oddiy aytganda, menda hammasi joyida. Rejalar? Takrorlayman, murabbiylikda ham katta marralarni zabt etishni ko‘zlayapman. Maqsad - tajriba oshirish, qaysidir top-jamoa nazariga tushish va uni Yevropa Chempionlar Ligasida g‘alaba sari yetaklash. Agar ambisiyangiz past bo‘lsa, unda ishga kirishmaganingiz ma’qul.
- Xo‘sh, turk futboli maktabidan nechog‘li qoniqyapsiz, bu yerda to‘plangan tajriba sizni yuksak marralar sari yetaklay oladimi?
- Bu yerga kelganimda, menda ma’lum darajada shaxsiy futbol falsafasi va murabbiylik yo‘nalishi bo‘yicha muayyan tushuncha shakllanib ulgurgandi. Faqat barchasini amalda qo‘llash, natijasini ko‘rish talab etilardi. Shu ma’noda aytsam, o‘rganish jarayoni chakki ketmayapti. Miyamdagilarni o‘zgacharoq turk futbolida sinab ko‘rayotganim kelajakda rosa qo‘l kelishiga ishonaman. Binobarin, futbol bobida ma’lum qolipga tushib qolish yaxshi oqibatlarga olib kelmaydi. Murabbiy zaxirasida xilma-xil variantlar bo‘lishi zarur. Buning uchun esa xilma-xil o‘yinlarni ko‘rish, tahlil qilib borish va ba’zi qiyinchiliklarni yengib o‘tish kerak. Aks holda, dastlabki jiddiy sinovdayoq muammoga yo‘liqasiz.
- O‘z misolingizda ayting, futbolda orttirilgan obro‘ murabbiylik ishini nechog‘li yengillashtiradi? Umuman, ikki sohadan qay biri osonroq?
- Futbolchilik faoliyatim davomida hammasi boshqacharoq edi, ehtimolki, osonroq ham. Qolaversa, futbolchi faqat qanday o‘ynash haqida o‘ylaydi. Murabbiylik faoliyati esa ancha keng qamrovli, sen hammasini tushunishing va nazorat ostiga olishing shart. Turli mentalitet va xarakterga ega 20-25 nafar yigit bilan ishlash, aloqa o‘rnatishni o‘ylang. Qisqasi, murabbiylik roli ancha murakkab - bu mutlaqo boshqa ish.
- Murabbiylikda eng muhimi nima - tajribami, bilimmi yoki...?
- Bilimsiz hech qayerga borolmasligingiz tayin, shuningdek, tajriba katta ahamiyatga ega. Lekin menimcha, sabr ham zarur. Jamoangdan nimalar talab qilish mumkinligini to‘g‘ri baholashing uchun bilim kerak. Tarkibda jamlangan turli o‘yin uslubi va xarakterga ega yigitlar bilan to‘g‘ri aloqa o‘rnatish esa katta sabr talab qiladi. Agar jamoang ko‘ngliga yo‘l topa olsang va shogirdlar bilan munosabatda muvozanatni ushlasang, ishing o‘z-o‘zidan yengillashadi. Qisqasi, qo‘pollik yoki qaysarlik naf keltirmaydi, hammasiga sabr bilan yondashish kerak.
- Qiziq, murabbiy sifatida jamoa ichida qandaydir qoidalarni ham joriy etdingizmi?
- Hammasiga real ko‘z bilan qarayman. Hali yosh mutaxassisman va ishlashim, izlanishim, har kuni mukammallik sari qadam tashlashim muhim. Ha, murabbiy rolida 3-4ta qoida o‘rnatganman. Futbolchilar ayniqsa, o‘yin oldidan telefon ishlatmasliklari, uchrashuvlarga kechikmasliklari kerak. Kech qoldingmi, tamom, o‘ynamaysan! Maydonga tushdingmi, 100 foiz kuch bilan ishla.
- Qaysi murabbiylarga havas bilan qaraysiz?
- Deylik, Antonio Kontega. Undan juda ko‘p narsalar o‘rgandim. Hozirga qadar aloqamiz saqlanib qolgan. Konte faoliyatimda men ko‘rgan eng yaxshi murabbiylardan biri, shubhasiz. Uning g‘oliblik mentaliteti tahsinga loyiq. Karlo Anchelotti esa o‘ta xotirjamligi bilan hayratga solardi. U yigitlar bilan yaxshi munosabat o‘rnatishni biladi. Hamisha hammasini 1ta so‘z bilan ifoda etishini ham alohida aytish kerak. Bu juda muhim xislat. Zero, katta jamoa murabbiyi qachon gapirish va qaysi mahal sukut saqlashni bilishi shart.
Fakt. Andrea Pirlo suhbat davomida yana bir ma’lumotni oshkor qildi. Maurisio Pochettino «PSJ» boshqaruvini qo‘lga olganidan keyin uni o‘z shtabida ko‘rishni istagan ekan. «Maestro» esa o‘sha pallada mustaqil ishlash ishqida «Yuventus» taklifini qabul qilgan.
MUHAMMADXON tayyorladi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
