Kamerun milliy jamoasi hujumchisi Erik-Maksim Shupo-Motingning shaxsiy ishlari bilan shug‘ullanayotgan agent Rojer Vittmannga qoyil qolish kerak
Qarang, 34 yoshli futbolchining butun faoliyati davomida kuzatilgan barcha o‘tishlar qiymati 0ga teng. Ya’ni u biror klub safiga to‘laqonli transfer asosida qo‘shilmagan.
Aniqroq aytsak, Erik-Maksim hozirga qadar Yevropaning jami 5ta klubi safida o‘ynagan bo‘lsa, ularning har biri bilan erkin agent maqomida shartnoma tuzgan. Faoliyati davomida transferiga eng ko‘p pul sarflangan futbolchilar reytingi o‘z yo‘liga, kamerunlik bunday ro‘yxatda mutlaq autsayderlar qatorida bo‘ladi. Lekin fakt shuki, erkin agent sifatida bitim tuzadigan futbolchi klub oldiga o‘z shartlarini baralla qo‘yish imkoniyatiga ega bo‘ladi. Ehtimolki, Shupo-Moting ham «Mayns», «Shalke», «Stok Siti», «PSJ» va «Bavariya» bilan kelishuvga erishish jarayonida bundan foydalangandir. Shu ma’noda Rojer Vittmann ishiga qoyil qolish kerak. U har safar kamerunlik mijozi maqbul shartlar (1-3 yillik) asosida kelishuvga erishishini ta’minlamoqda.