Futbolda bobosi yurti sharafini himoya qilishga bel bog‘lagan argentinalik Mateo Retegi Italiya milliy jamoasi libosidagi dastlabki 2ta o‘yinda ham gol urib, keng jamoatchilik nazariga tushdi.
Argentinaning San-Fernando shahrida tug‘ilgan Mateo bunga qadar o‘z mamlakatining U-19 va U-20 toifasidagi terma jamoalarida o‘ynashga ulgurgandi. Yigitchaning otasi Karlos Retegi esa vaqtida Argentina xokkey terma jamoasi safida 3ta Olimpiadada ishtirok etgan. Qiziq, Mateo qanaqasiga birdan Italiya terma jamoasida paydo bo‘lib qoldi?
Hammasi oddiy: kichik Retegi ona tomondan bobosi Anjelo di Markoning italiyalik ekanligidan foydalanib, tarixiy vatani pasportini olishga qaror qildi. Ma’lum bo‘lishicha, di Marko Sisiliyada tug‘ilib-ulg‘aygan va keyinchalik Argentinaga ko‘chib ketgan ekan. CBS Sports ma’lumotiga qaraganda, yosh hujumchi hozircha hattoki, italyan tilini ham bilmaydi. Muhimi, bu kamchilik dastlabki bahslarda uning yangi jamoadoshlar bilan til topishib o‘ynashiga monelik qilmadi. Har holda, «moviy gvardiya» libosidagi dastlabki 2ta o‘yinda ham raqib darvozasini nishonga oldi. Shu tariqa Mateo «skuadra adzurra»dagi faoliyatini qatorasiga 2ta o‘yindagi gollar bilan boshlagan tarixdagi 4-futbolchi bo‘ldi.
Hujumchi ayni payt Argentinaning «Boka Xuniors» klubiga tegishli. Ha, Mateo afsonaviy Diyego Armando Maradonaning qadrdon klubi ixtiyorida. To‘g‘ri, Retegi joriy mavsum «Tigre» klubida ijara muddatini o‘tamoqda. Asosiysi, u hozirga qadar barcha musobaqalar doirasida 51 marta maydonga tushib, 29ta gol urishga ulgurdi. Umuman, Mateo yaqin orada klubini ham o‘zgartirsa, ajabmas. Binobarin, argentinalik italyanga «Atletiko» va «Inter» kabi Yevropaning dongdor jamoalari befarq emas. Qolaversa, 23 yoshli hujumchining mart oyida Angliya termasi darvozasini ishg‘ol qilgani (ikkinchi golini maltaliklarga «ulashdi») unga nisbatan qiziqishni keskin oshirib yuborishi tayin. Ajdodlari yurti sharafini munosib himoya qila boshlagan futbolchining qisqa vaqt ichida katta e’tibor qozonishi ehtimoli yuqori har holda. To‘g‘ri, Retegining birinchi goli Yevro-2024 saralash bosqichi dastlabki turida «skuadra adzurra»ga naf keltirgani yo‘q, zero, Angliya milliy jamoasi bunga qadar 2ta gol farqi bilan oldinga chiqib olgandi. Malta termasi ustidan qozonilgan g‘alaba esa «moviy gvardiya» ruhiyatini ko‘targaniga shubha yo‘q.
Aytish joiz, Mateo Retegining tezkor effekti nafaqat bosh murabbiy Roberto Manchini, balki Italiya futboli rahbariyatini ham ilhomlantirib yubordi, go‘yo. Xabarlar oqimiga qarasak, italyanlar argentinalik yana bir necha futbolchini mahalliylashtirish xususida o‘ylay boshlashdi va murabbiy ham bunga qarshi emas. Ayni payt Italiya futbol federasiyasi Nikolas Kapaldo, Nikolas Valentini va Xino Infantino nomzodini o‘rganib chiqmoqda. «Dunyo jadal o‘zgarmoqda. Boshqa mamlakatda tug‘ilgan va uning yoshlar termalarida to‘p surgan yigitlarni har qaysi jamoa safida ko‘rish oddiy holatga aylanmoqda. Deylik, Italiya yoshlar terma jamoalarida ham shunday futbolchilar o‘ynaganlar. Faqat ular milliy jamoa darajasiga ko‘tarilganlaridan so‘ng tarixiy vatanlari sharafini himoya qilishni ma’qul topishgan», - dedi Roberto Manchini bu borada. Ehtimol, futboldagi mahalliylashtirish jarayoni Italiya terma jamoasi uchun taraqqiyotning yangi yo‘nalishidir. Buni vaqt ko‘rsatadi, albatta. Hozircha aniq fakt shuki, dastlabki 2ta o‘yinda maydondan golsiz chiqib ketmagan argentinalik italyan o‘g‘loni vatandoshi Pyerino Prati qayd etgan natijani takrorladi. «Milan» afsonasi uzoq 1968 yili italyanlar uchun o‘ynashga qaror qilgan va dastlabki 2ta o‘yinda Bolgariya termasi darvozasini nishonga olgandi.
D.ALIMOV tayyorladi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
