APL klublarining agentlik xizmati uchun to‘lovi oshkor qilindi.
Asosiy fakt shuki, bu borada yetakchilik «Chelsi» qo‘lida emas. Ishonish qiyin, lekin shunday: London jamoasi «behisob» transferlarni amalga oshirgan bo‘lsada, Angliyada agentlarga bitta klubdan kamroq pul to‘lagan.
Agentlik xizmati to‘loviga doir APLning yangi jadvalida 2022 yil 1 fevral - 2023 yil 31 yanvar oralig‘ida klublar tomonidan amalga oshirilgan transferlar ortidan vositachilarga ketgan mablag‘ inobatga olingan. Oddiy aytganda, bunda oxirgi ikki transferlar bozori (yozgi va qishki) yoxud mavsum-2022/2023ga doir raqamlar mujassamlashtirilgan. Natijalarga kelsak, agentlar uchun eng yoqimli klub - bu «Manchester Siti». Yangi-eski chempion mavsum davomida vositachilarga 51,56 million funt to‘lagan. 2-o‘rindan joy olgan «Chelsi»da ushbu ko‘rsatkich 43,16 million funtga teng. «Liverpul» esa 33,69 million funt miqdoridagi to‘lov bilan 3-qatorda.
Todd Bouli boshqaruvida aynan oxirgi ikki transferlar bozorida xaridlarga hammadan ko‘proq ajratgan (611,49 million yevro) «Chelsi»ning agentlarga to‘lov bobida yetakchi emasligi chindan ham, ajablantiradi kishini. Axir London klubi transferlar xarajati bo‘yicha ikkinchi bo‘lgan «MYU» (243,28 million yevro)ni ham o‘z changida qoldirib ketdi. Yana bir tomoni, naq 41 (!) nafar futbolchi bilan shartnoma tuzish asnosida transferlarning umumiy summasi bo‘yicha 3-ko‘rsatkich qayd etgan «Nottingem Forest» agentlarga atigi 4,35 «limon» to‘lab, APLning 20ta klubi orasida oxirgi o‘ringa joylashdi.
Oddiy hisob-kitoblar shuni ko‘rsatmoqdaki, «Manchester Siti» tomonidan ikki transferlar oynasi davomida yangi futbolchilar xaridiga yo‘naltirilgan jami mablag‘dan 25 foizi agentlik xizmati uchun ketgan (transferlarga - 150,5 million, agentlarga - 51,56 million). Agentlik to‘lovi jadvalida 18-o‘rinda turgan «Brentford» (5,56 million funt) APLda chakki taassurot qoldirmaganini ham alohida ta’kidlash kerak.
APL: agentlik xizmati xarajati (mavsum-2022/2023)
1. «Manchester Siti» - 51,56 mln. funt
2. «Chelsi» - 43,16 mln. funt
3. «Liverpul» - 33,69 mln. funt
4. «MYU» - 24,72 mln. funt
5. «Arsenal» - 16,74 mln. funt
6. «Tottenxem» - 16,13 mln. funt
7. «Aston Villa» - 15,62 mln. funt
8. «Lids» - 15,31 mln. funt
9. «Everton» - 13,54 mln. funt
10. «Vest Xem» - 12,03 mln. funt
11. «Nyukasl» - 10,78 mln. funt
12. «Lester» - 10,28 mln. funt
13. «Kristall Pelas» - 9,79 mln. funt
14. «Fulxem» - 8,75 mln. funt
15. «Brayton» - 8,58 mln. funt
16. «Sautgempton» - 6,31 mln. funt
17. «Vulverxempton» - 6,18 mln. funt
18. «Brentford» - 5,56 mln. funt
19. «Bornmut» - 5,05 mln. funt
20. «Nottingem Forest» - 4,35 mln. funt
APL-2022/2023 transferlar hisobotiga kelsak, xarajat va daromad o‘rtasidagi balans bo‘yicha 20ta klubdan atigi 5tasi plyusda. Oddiy aytganda, 15ta jamoa transferlar bozorida futbolchilar xaridiga sotuv summasiga nisbatan ko‘proq pul ajratgan. Bu borada «Chelsi» eng serxarajat jamoadir, albatta. Londonliklarda transferlar balansi -543,66 million yevroga teng. «Brayton»ga qoyil qolish kerak: o‘z tarixida ilk marta yevrokuboklarga yo‘l olgan kamtarin jamoa transferlar bo‘yicha +82,17 million yevro plyus ko‘rsatkichini qayd etdi - bu APLda eng yuqori balans.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
