Ikki kun oldin FIFA 2025 yilda kengaytirilgan formatdagi klublar o‘rtasidagi ilk jahon chempionati o‘tkazilishini tasdiqladi. Quyida bo‘lajak turnir haqida so‘z yuritamiz.
Klublar o‘rtasidagi jahon chempionatini kengaytirish haqida anchadan beri gapirib kelinmoqda. FIFA prezidenti Janni Infantino ilk bor 2016 yilda 32 jamoa ishtirokidagi turnir g‘oyasini ilgari surgan edi. FIFA turnirni to‘laqonli va jozibador qilishni xohladi, chunki yettita jamoadan iborat format (konfederasiyalarning eng yaxshi klublari – 6 nafar g‘olib + mezbon mamlakat chempioni) zerikarli edi. Keyinchalik kengaytirilgan klublar o‘rtasidagi jahon chempionati Konfederasiyalar kubogi o‘rniga va har to‘rt yilda bir marta o‘tkazilishiga qaror qilindi.
Klublar o‘rtasidagi birinchi kengaytirilgan jahon chempionati 2021 yilda Xitoyda bo‘lib o‘tishi kerak edi, ammo turnir koronavirus pandemiyasi tufayli bekor qilindi. Ko‘rinishidan, 2025 yilda klublar o‘rtasidagi jahon chempionatini o‘tkazishga hech narsa xalaqit bermaydi.
Turnir qachon va qayerda bo‘lib o‘tadi?
FIFA 2025 yilda birinchi kengaytirilgan klublar o‘rtasidagi jahon chempionati AQSHda o‘tkazilishini ma’lum qildi. Musobaqa o‘yinlariga mezbonlik qiladigan shaharlar keyinroq ma’lum qilinadi. Aniq sanalar hali aniqlanmagan, ammo biz jahon chempionatining an’anaviy taqvimiga o‘xshab, iyun-iyul oylarini taxmin qilish mumkin.
Turnir formati
Klublar o‘rtasidagi kengaytirilgan jahon chempionati formati hech kimni ajablantirmaydi – hammasi so‘nggi jahon chempionatlarida terma jamoalar uchun qanday bo‘lgan bo‘lsa, deyarli shunday. 32 nafar ishtirokchi 4 ta jamoadan 8 ta guruhga bo‘linadi. O‘z kvartetlarida birinchi va ikkinchi o‘rinlarni egallagan jamoalar pley-off bosqichiga, 1/8 finalga yo‘l oladi.
Ishtirokchilar kim?
Jahon chempionatida kimlar o‘ynaydi? Fevral oyida FIFA ba’zi ob’ektiv ko‘rsatkichlar asosida konfederasiyalar uchun kvotalarni tasdiqlagan edi. UEFA eng ko‘p o‘rinni qo‘lga kiritdi - 12. Keyingi o‘rinda KONMEBOL - u 6 ta jamoa bilan ishtirok etadi. Turnirga Osiyo Futbol Konfederasiyasi, Afrika Futbol Konfederasiyasi va KONKAKAF tomonidan 4 ta klub delegasiya qilingan. Bitta chipta Okeaniya futbol konfederasiyasiga topshirildi. Yana bir chipta mezbon mamlakat klublaridan biriga beriladi.
UEFA sharafini 2021 yildan 2024 yilgacha Chempionlar ligasida g‘olib chiqqan jamoalar himoya qiladi. Qolgan sakkizta yo‘llanma esa xuddi shu to‘rt yillik muddat ichida UEFA klublar reytingida yuqori o‘rinlarni egallagan klublarga beriladi.
Xuddi shu tamoyillar KONMEBOL uchun ham birdek ishlaydi. OFK, AFK va KONKAKAFga kelsak, har bir konfederasiyaning to‘rt yil ichidagi qit’a g‘olibligini qo‘lga kiritgan jamoalar uchun chiptalar mavjud. To‘g‘ri, OFKda taqvim o‘zgarmoqda, AFKda esa bir jamoa ikki marta g‘olib chiqqan holat mavjud, ya’ni chiptalar u yerda reytingga qarab taqsimlanishi kerak.
Shuni ta’kidlash kerakki, konfederasiyasi turnirlari g‘oliblari haqida gap ketganda, bir mamlakatning turli vakillariga hech qanday cheklovlar yo‘q. Ammo konfederasiyalar reytingidan jamoalar tanlansa, bir mamlakatdan faqat ikkita klub yo‘llanma olishi mumkin.
Me’zonlarni hisobga olsak, 2025 yilgi klublar o‘rtasidagi jahon chempionatida ishtirok etadigan 32 ta klubdan 12 tasini allaqachon bilamiz. Ro‘yxat quyidagicha:
"Chelsi", "Real", "Manchester Siti", "Palmeyras", "Flamengo", "Monterrey", "Sietl Saunders", "Leon", "Al-Ahli" (Misr), Vaydad Kasablanka, "Al-Hilol", "Urava Red Daymonds".