Gazetamizning avvalgi seshanba sonida Yevropa milliy chempionatlari yangi mavsumi starti bahona APL va La Liga klublari bosh murabbiylari haqida yaxlit ma’lumot taqdim etgandik sports.ru saytining qulay tasvirlari yordamida. Bugun shu mavzu davomi o‘laroq, «A» seriya kengliklariga nigoh buramiz. Xo‘sh, Italiyada bosh murabbiylar tarkibi qanday ko‘rinishda?
Yulduzlar guruhi qanday? Italiya futboli murabbiylar masalasida ancha barqaror. Har holda, an’anaviy kuchli murabbiylik mak-tabi milliy chempionatni doimiy ravishda yulduz ustozlar bilan ta’minlab kelmoqda. Maurisio Sarri, Simone Inzagi, Stefano Pioli, Jan Pyer Gasperini, Massimiliano Allegri - yangi mavsum arafasida deyarli ham-ma o‘z joyida. Bu guruhga superyulduz Jo-ze Mourinyo va «Kalyari»ni «A» seriyaga qaytargan «qa-riya» Klaudio Ranyerini qo‘shing. Ha, «A» seriyaning yangi mavsumi murabbiylar kurashi masalasida ham o‘zgacha intriga taqdim etadigan ko‘rinadi!
Yangi shartnomalar. Chempionatga kirishadigan 4 nafar yangi murabbiy allaqachon o‘z klubini o‘rganishga ulgurdi va raqobat qozonida «qaynash»ga shay. Rudi Garsiya chempion - «Napoli»ning nafis o‘yin tizimi va kuchli ishtiyoqini buzib yubormaslikni o‘ylaydi avvalo. «Lechche», «Verona» va «Frozinone» klublari esa yangi menejerlar bilan boshqacha qiyinchiliklarga duch kelishi tayindek. Harqalay, bu jamoalar bosh vazifa - «A» seriyadan uchib ketmaslik missiyani bajarishga hozircha uncha tanilmagan Roberto D~Aversa, Marko Baroni va Eysebio di Franchesko bilan kirishyapti.
Kimlarni alohida kuzatish kerak? Bu band ostida uzun ro‘yxat tuzish mumkin. Binobarin, «A» seriya APLdan keyin ikkinchi raqamli chempionat maqomiga yaqinlashmoqda va yuksalishda jamoalar to‘plagan murabbiylar guruhi xizmati katta, albatta. Tabiiyki, Joze Mourinyo va uning «Roma»si yana jadvalning yuqori qismiga tirishadi, «Yuventus» bosh murabbiyi Massimiliano Allegri oldida esa «keksa sinyora»ni olimp cho‘qqisiga qaytarishdek katta vazifa bor. So‘nggi yillar keskin o‘zgargan va katta sur’atda o‘sish harakatiga tushgan ambisiyali «Milan» va «Inter» boshqaruvchilarini ham unutmaslik kerak: Stefano Pioli - Simone Inzagi raqobatining o‘zi bir olam. Bundan tashqari, Maurisio Sarri va uning o‘ta qiziqarli «Lasio»si ham bor. «Napoli» yangi bosh murabbiy Rudi Garsiya bilan chempionlik maqomini himoya qilishga urinadi, albatta. Klaudio bobo Ranyeri esa hammani yana bir bora hayratlantirish uchun qaytganini isbotlashga kuch beradi. To‘g‘ri, uning kamtarin «Kalyari» bilan «Lester» mo‘’jizasi»ga o‘xshash ertaknamo hikoya yozishi aqlga sig‘maydi, ammo qandaydir «syurprizlar» ulashishga imkon topsa kerak, baribir. Bundan tashqari, yosh murabbiylar - Tyago Motta («Bolonya») va Alberto Jilardino («Jenoa») ham diqqat markazida bo‘lishadi. Umuman, «A» seriyaning yangi mavsumi nafaqat Italiya chempionati xos muxlislari, balki neytral fanatlarni ham o‘ziga jalb etsa, ajabmas. Axir top-murabbiylar bosh rolni o‘ynaydigan serialni o‘tkazib yuborish mumkinmi?
Kim birinchi bo‘lib iste’foga chiqishi mumkin? Qanchalik g‘alati tuyulmasin, lekin ishdan ayrilishga birinchi raqamli nomzod bo‘lish Rudi Garsiya chekiga tushishi hech gap emas. Chunonchi, Saudiya Arabistoni bo‘ylab safardan keyin Italiyaga qaytgan fransiyalik mutaxassis oldida o‘ta murakkab vazifa turibdi: chempionlik uchun poyga 1-turdan boshlanadi. Bordiyu, Garsiya startda depsinadigan bo‘lsa, kuzga bormay, ishsizga aylanishi mumkin. Har holda, «Napoli» xo‘jayini Aurelio de Laurentis tezkor natija so‘raydiganlar toifasidan va u omadsizlikka uzoq toqat qilolmaydi. Massimiliano Allegrining «kursi»si ham juda mustahkam emas. O‘zi italiyalik mutaxassisning o‘tgan mavsum o‘z lavozimini qanday saqlab qolgani biroz hayratlanarli. Endi undan darhol natija ko‘rsatish talab etiladi. Aks holda... Xullas, murabbiyning taqdiri «Yuventus»ning dastlabki oylarda qanday o‘ynashiga bog‘liq, shubhasiz.
Yana nima? Yangi mavsum Italiyada qaysi klub chempionlikka erishadi? Buni aytish tugul, taxmin qilish ham juda-juda qiyin. Birinchidan, kuch jihatidan bir-biriga yaqin klublar safi aql bovar qilmas darajada kengaydi. Ikkinchidan, ularning har biri o‘ziga xos ajoyib menejerga ega. Chempionatda mahalliy mutaxassislar ko‘pligi (80 foiz) ham kurash yanada qizg‘in tus olishini ta’minlasa kerak.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
