Bukayo Saka 6 sentyabr kuni «Bornmut»ga qarshi kechgan safar o‘yinida «Arsenal»ga yordam berolmaydigandek edi jarohat tufayli.
Amalda 22 yoshli vinger APLning qatorasiga 87ta o‘yinida qatnashdi. U bu borada «kanonirlar» tarixidagi rekordchi hisoblanadi. Saka chempionatdagi o‘yinlar seriyasi bo‘yicha «Arsenal» afsonasi Pol Merson (ketma-ket 82ta uchrashuv) natijasini ancha oldin yaxshilagandi.
Bukayo Saka barqarorligida asosiy omil - bu jarohatlarning minimal soni. 22 yoshli iqtidor oxirgi jarohatga yo‘liqishiga qadar butun faoliyati davomida atigi 28 kun safdan chetda qolgandi, xolos. Umuman, Sakaning seriyasi 2021 yilning may oyida boshlangan. Yosh futbolchi «Vest Bromvich»ga qarshi o‘sha bahsda chap qanot himoyachisi rolini bajargan va Emil Smit Rou goliga assistentlik qilgandi. O‘shanda «Arsenal» uchun gol urishgan Nikolya Pepe va Villian esa hozir jamoada emaslar. Bukayo 2021 yilning iyun oyida kichik jarohatga yo‘liqqan, lekin atigi 5 kunga safdan chiqqan va faqat Angliya termasi o‘yinini o‘tkazib yuborgandi. Umuman, Saka oxirgi 2 yildan ko‘proq vaqt davomida bor-yo‘g‘i 28 kun «lazaret»da bo‘lgan va jarohatlar ortidan «Arsenal»ning 2tagina o‘yinida qatnashmagandi. «Kanonirlar» bu orada uning ishtirokisiz YELda «Molde»ni 3:0 hisobida yengishdi va APLda «MYU» bilan bahsda murosa ko‘chasini tanlashdi - 0:0.
Aslida Bukayo avgust oyi oxirida qatorasiga 83ta o‘yinda maydonga tushish asnosida «Arsenal» rekordchisiga aylangan edi. Pol Merson esa 82ta o‘yinga teng seriya sohibidir. Bu borada 3-yuqori natija ketma-ket 78ta uchrashuvda maydonga tushgan Gael Klishiga tegishli. Darvoqe, Merson mart oyida Sky Sports nashridagi o‘z ruknida Sakaga alohida to‘xtaldi. «Bukayo katta o‘yinlar natijasini hal qilishga qodir. Yo‘q, u jadvalning quyi qismidagi jamoaga qarshi bahsda «xet-trik» qayd etadigan yoki 7:0 hisobida tugaydigan uchrashuvda 7-golni uradigan futbolchi emas. Saka ko‘pincha «Arsenal»da hisobni ochadi yoki muvozanatni tiklaydi. Shuningdek, g‘alaba goli yoki hal qiluvchi samarali uzatmaga mualliflik qiladi. To‘g‘risi, Sakaga o‘xshash futbolchilar sanoqli. Muhimi, u maydonda o‘ta xotirjam. Vaholanki, endigina 22 yoshni qarshiladi. Demak, Bukayodan hali ko‘p narsa kutishimiz mumkin. Menimcha, 26-28 yoshga to‘lishiga qadar o‘zining eng yaxshi o‘yinini ko‘rsatmasa kerak. Quvontiradigan tomoni, Saka futbolni shunchaki, yaxshi ko‘radi. Ya’ni faqat o‘ynashni xohlaydi va barchasini yuzida tabassum bilan bajaradi. Qisqasi, yigitcha o‘zi ko‘zlagan marralarga yetishish uchun hamma narsaga ega...», - deb yozdi «Arsenal»ning sobiq yarim himoyachisi.
«Arsenal»ning hozirgi tarkibiga qarasak, eng ko‘p o‘yin aynan Sakaga tegishli. U hattoki 7 yildan buyon «Arsenal»da to‘p surayotgan Muhammad al Nenidan ham oldinda. Qolaversa, o‘rtada katta farq ham bor - Sakada 185da o‘yin, misrlik hujumchisi 156ta. Aytish o‘rinli, al Neni «kanonirlar» libosini kiygan vaqt amaldagi bosh murabbiy Mikel Arteta ham hali butsalarini mixga ilgan emasdi. «Shunchaki, «Arsenal» libosida o‘ynashni xohlardim, - deydi Sakaning o‘zi. - Xayo-limda faqat shu fikr bor edi. Imkoniyat tug‘ilishi bilan jamoada qolish uchun borimni bera boshladim. Atrofingdagi odamlarning senga ishonishlari juda muhim, ayniqsa, yosh bo‘lsang. O‘yinning ba’zida yaxshi chiqadi, goho aslo qovushmaydi. Shunday holatlarda murabbiylarning seni tarkibga qayta-qayta kiritishlari mislsiz ishonch bag‘ishlaydi. Baxtimga, aynan shunday ishonchni ta’minlayotgan menejer qo‘l ostida shug‘ullanyapman va buni o‘yinlarim sonidan ham ko‘rish mumkin».
«Arsenal» bosh murabbiyi Mikel Artetaning aytishicha, hozirgi daraja Saka uchun eng yuqori nuqta emas: «Bukayo shunday barqarorlik namoyish etyaptiki, bunaqasi uning yoshida kamdan-kam kuzatiladi. Chindan ham, noyob barqarorlik. Sakada o‘yiniga qo‘shadigan jihatlar bormi? Javob oddiy: u hali har tomonlama mukammallikka erishishi mumkin. Binobarin, har doim o‘zidan ko‘prog‘ini talab qiladi». Demak, Bukayo o‘yini va o‘sishini kuzatishda davom etamiz.
HOZIRGI «ARSENAL» GVARDIYACHILARI
Bukayo Saka - 185da o‘yin
Muhammad al Neni - 156ta o‘yin
Edvard Nketia - 138ta o‘yin
Gabriel Martinelli - 135ta o‘yin
Gabriel Magalyas - 124ta o‘yin
I.PARPIYEV tayyorladi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
