Isroil va "HAMAS" o‘rtasidagi urushning keskinlashuvi natijasida, G‘azo sektori va Iordan daryosining g‘arbiy sohilida o‘tkaziladigan mahalliy chempionat o‘yinlari 7 oktyabr kuni to‘xtatilgan edi. Chegaralarning yopilishi tufayli Falastin terma jamoasi Malayziyadagi "Merdeka kubogi"da ham qatnasha olmadi.
Oqibatda, Falastin terma jamoasining JCH-2026 saralashida qatnashish uchun neytral maydonga chiqib ketishi so‘roq ostida qolayotgan edi. Iordaniya shahzodasi Alining vaziyatga aralashuvi natijasida, Falastin terma jamoasi a’zolari Iordaniyaga olib kelindi va shu yerda JCH saralashiga tayyorgarlikni boshlab yuborishdi.
Shahzoda Ali Falastinning Avstraliyaga qarshi o‘yinini ham Iordaniyada o‘tkazmoqchi edi. Ammo, yaqinda OFK kubogi doirasidagi "Al Vehdat"-"Al Qahraba" o‘yini davomida, mezbon muxlislar tomonidan Falastin milliy hukumati raisi Mahmud Abbas sha’niga nomaqbul hayqiriqlarning yangrashi - Falastin futbol assosiasiyasining JCH saralashi uchun neytral maydon sifatida Iordaniyani emas, Quvaytni tanlashiga turtki bo‘ldi.
Falastin terma jamoasi Livanga qarshi 1-tur o‘yini oldidan, 11 noyabr kuni Saudiya Arabistonida Yaman terma jamoasiga qarshi o‘rtoqlik o‘yini o‘tkazishni rejalashtirgan.