«Zenit» hamda Rossiya terma jamoasining sobiq bosh murabbiyi Dik Advokat yana o‘z faoliyatini davom ettiradigan bo‘ldi.
76 yoshli mutaxassis uzoq davom etgan muzokaralardan so‘ng Kyurasao milliy terma jamoasi tizginini o‘z qo‘liga oldi.
Advokat odatda, yana qaytib kelish uchun xayrlashadi. Dik bir necha marta o‘z faoliyatini yakunlaganini e’lon qilib, keyin ishga qaytishi hech kimni ajablantirmaydi. Aftidan, hissiyotli murabbiy hurmat-ehtirom bilan o‘tadigan xayrlashuvlarni juda xush ko‘radi.
Advokatning Kyurasao terma jamoasidagi murabbiylar shtabidan uning ayrim eski qadrdonlari ham joy oladilar. Jumladan, unga «Zenit»da assistent bo‘lgan va hozirda ishsiz yurgan 72 yoshli Kor Pot ham.
Niderlandiyalik mutaxassis Kyurasao FFning taklifini qabul qilishga shoshilmadi. Sababi, u yangi ish joyidagi shart-sharoitlar, tashkiliy masalalar holatidan bexabar edi. Biroq federasiyaning yangi texnik direktori Xolid Sinux hammasi talab darajasida ekanligiga murabbiyni ishontirdi.
Dik Advokat Kyurasao terma jamoasi xususida shunday dedi: «U yerda tashkiliy masalalar bo‘yicha doimiy muammolar mavjud. Mehmonxonalar, samolyotlar, safarlar... Futbolchilar sharoitlar qay darajada ekanligini bilishlari muhim ahamiyatga ega. Bir vaqtlar men Belgiyada bu masalada kelishib olganman. Biroq ularda pul yetarli, Kyurasaoda esa ko‘p emas».
Kyurasao Advokatning murabbiylik faoliyatidagi 8-terma jamoa. Bungacha Dik Rossiya termasidan tashqari, Serbiya, BAA, Janubiy Koreya, Belgiya, Iroq va Niderlandiya (3 marta) terma jamoalarini boshqargan, vatandoshlari bilan Yevro-2004 turnirida bronza medallariga sazovor bo‘lgan.
Muxlislar auditoriyasiga yaxshi tanish bo‘lmagan Kyurasao terma jamoasi bir qarashda jiddiy emasdek tuyulsada, FIFA reytingida dastlabki yuztalikdan (90) joy olgan. Yevropalik jamoalardan Lyuksemburg (83) va Armaniston (93) uning eng yaqin qo‘shnilari. Xullas, Kyurasaodagilar Advokat tashrifidan avval ham to‘p bilan yaxshi tanish bo‘lishgan. Albatta, Kyurasao hech qachon jahon chempionatlarida ishtirok etmagan, aynan shu topshiriqni JCH-2026 turnirining saralash bosqichida ado etish niderlandiyalik mutaxassis zimmasiga yuklatildi.
Hozircha FIFA tomonidan KONKAKAF uchun ajratilgan mundial yo‘llanmalarining 3tasi o‘z sohiblarini topib ulgurdi. Bular AQSH, Kanada va Meksika - musobaqada mezbon maqomida maydonga tushadigan terma jamoalar. Konfederasiyaning qolgan terma jamoalari saralash bosqichidagi natijalarga ko‘ra 3ta to‘g‘ridan-to‘g‘ri ishtirok huquqini beradigan va 2ta pley-off to‘qnashuvida aniqlanadigan yo‘llanmalar uchun kuch sinashadilar.
Kyurasao terma jamoasi uchun saralash bosqichi bellashuvlari shu yilning yozida start oladi. Avval dastlabki guruh bosqichi (5ta jamoa 1 davra - 4ta o‘yin) o‘tkaziladi. Unda 1-2-o‘rinni egallaganlar 2025 yilda hal qiluvchi bosqichga yo‘l oladilar. Unda 8ta jamoa ikki guruhga bo‘lingan holda, ikki davrada kuch sinashadilar. O‘z guruhida g‘olib chiqqan 2 jamoa mundial yo‘llanmasini qo‘lga kiritadi. Kyurasaodagilar bo‘lajak raqiblarini aniqlab beradigan qur’ani kutishmoqda. Lekin asosiy raqobatchilar ma’lum - Panama, Kosta-Rika, Yamayka, Gonduras, Saalvador, Gaiti va Trinidad-Tobago.
Kyurasao oroli futbol olamiga bir qator taniqli o‘yinchilarni yetkazib berdi. Jumladan, PSV, «Ayntraxt» va «Nyukasl» jamoalarida to‘p surgan Yetro Villems, Yurgen Lokadiya (PSV, «Brayton», «Xoffenxaym»), Vurnon Anita («Ayaks») va Taxit Chong («MYU»)larni. To‘g‘ri, bu futbolchilar Niderlandiya terma jamoasida to‘p surishga qaror qilishgandi. Biroq 2021 yilda 32 yoshli Anita terma jamoani o‘zgartirish huquqidan foydalanib, Kyurasao terma jamoasi safiga o‘tdi. Hozirda Vurnon Saudiya Arabistonida «Al-Aruba» klubi sharafini himoya qilmoqda
O‘tgan yili 30 yoshli Yurgen Lokadiya ham Anitaning tashabbusini takrorlab, vataniga qaytdi. Kyurasao terma jamoasidagi debyutidan keyin Xitoyning «Sanchjou Mayti Layons» klubi bilan shartnomaga imzo chekdi. «Transfermarkt» Anitani 300 000 yevroga, Lokadiyani esa 1,2 mln. yevroga baholagan.
Kyurasao terma jamoasining eng qimmat o‘yinchisi - «Birmingem»dagi Juninyo Bakuna. 26 yoshli markaziy himoyachining transfer bahosi 4,5 mln. yevro. Joriy mavsumda Juninyo Chempionshipdagi 26 uchrashuvda 4ta gol va 5ta samarali uzatmani o‘z hisobiga yozdirib qo‘ydi. Umuman, Kyurasao terma jamoasi o‘zagini Niderlandiyaning turli divizionlarida to‘p suradigan futbolchilar tashkil etishgan. Yevropaning boshqa chempionatlarida o‘ynayotgan futbolchilar ham bor. Terma jamoaning yulduzi sifatida Juninyoning akasi Lendroni e’tirof etish o‘rinli. 32 yoshli markaziy himoyachi o‘z faoliyatini «Aston Villa», «Reding», «Kardiff Siti» va «Uotford» klublarida o‘tkazgan, hozir Niderlandiya 2-divizionida «Groningen» klubining sardori.
Kyurasao terma jamoasining eng yuksak natijasi - 2017 yilda bo‘lib o‘tgan Karib Kubogi turniri g‘olibligi. O‘shanda jamoa Yamayka terma jamoasini 2:1 hisobida taslim etgandi. Xullas, orol davlati federasiyasining muzeyidan ozmi-ko‘pmi sovrinlarni topish mumkin.
Advokat xuddi Rossiya terma jamoasidagi kabi, Kyurasaoda ham mashhur vatandoshi bo‘lmish Gus Xiddink izidan bormoqda. Orolliklar 2020 yil sentyabrida Xiddinkni terma jamoaga olib kelishgandi. Biroq murabbiy milliy terma jamoa bilan atigi 2ta uchrashuv o‘tkazishga ulgurdi: Kuba terma jamoasi 2:0, Sent-Vinsent va Grenada 5:0 hisoblarida mahv etildi. Koronavirus pandemiyasi davrida kasallikka chalingach, Gus orolni tark etdi. 2021 yil mayidan shu paytgacha Kyurasao terma jamoasida 5 marta murabbiy almashdi. Arvokat Kyurasaoda o‘zini uydagidek his etishiga shubha yo‘q. Niderlandiya qirolligi tarkibidagi mustaqil respublika nufuzli sayyohlik yo‘nalishida joylashgan. Dik esa yoqimli muhitni foydali faoliyatga aylantira oladi. Ehtimol, tez orada shu jajji saltanat jamoasini final bosqichiga olib chiqib, uzoq yillik faoliyatida navbatdagi yorqin sahifani ochar.
Sodiq SOBIR tayyorladi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
