Sport klublari hayvonlarga qanday yordam beradi?
Biz sport faqat kishilar uchun, degan aqidaga ko‘nikib qolganmiz. Biroq o‘zgacha fikrlaydigan klublar va kompaniyalar ham borki, o‘z yondashuvlari bilan yanada ko‘proq muxlislar e’tiborini jalb etadilar. Ularga insonning yaqin do‘sti bo‘lmish jonivorlarga bo‘lgan munosabat ko‘mak beradi. Mutaxassislarning hisob-kitoblariga ko‘ra, Rossiya aholisining 61 foizi uy hayvonlariga ega. Demak, sport tashkilotlarida jonivorlarga nisbatan ijodiy tashabbus bilan yondashuv orqali millionlab muxlislar qalbini zabt etish imkoniyati bor. Muhimi - jonivorlarga mehr-oqibatli bo‘lish. Bu borada veterinariya klinikasi bosh qa bir qator muassasalar hamkorlik qilishlari mumkin. Quyidagi hikoyamiz har qanday kishi qalbini eritib yuboradigan samarali hamkorliklar haqida.
«Jirona» o‘yinlariga jonivorlar bilan kelish mumkin
Joriy mavsumda Ispaniyaning «Jirona» klubi o‘zining yorqin o‘yinlari bilan ko‘pchilikni lol qoldirmoqda. Bundan ikki yil avval jamoa jonivorlarni parvarish qilishga ixtisoslashgan «Gosbi» kompaniyasi bilan hamkorligi orqali tanilgandi. Misol uchun, «Jirona»ning uy stadionida kuchuk bilan keladigan muxlislarga alohida hudud ajratilgan!
Shuningdek, klub ramzi bo‘lmish qo‘g‘irchoq yonida haqiqiy va o‘ta yoqimtoy tumor - Kanya ismli labrador ham bor. Uzun dumli jonivor jamoaning ko‘plab tadbirlarida ishtirok etadi. Lekin eng asosiysi, «Jirona» - «Gasbi» hamkorligining sezilarli qismi jonivorlar parvarishiga, oziq-ovqat va dori-darmonlarga sarflanadi.
«Ovyedo» klubi esa «Jirona»dagi kasbdoshlaridan o‘rnak olgan holda, veterinariya klinikasi bilan hamkorlikda o‘zining jonivorparvar muxlislari uchun chegirmali dasturni joriy etdi.
Kuchuklar uchun VIP-loja
MLS vakili bo‘lmish «Sent-Luis» klubi «Purina» brendi bilan birgalikda keng ko‘lamli yumushni amalga oshirdi: kuchuksevar ishqibozlar endi o‘yinlarni tomosha qilishayotgan pallada, ularning suyukli jonivorlari maxsus hududda chopib o‘ynashlari, turli yeguliklarni tamaddi qiladilar.
«Ostin»ning har o‘yinida - yangi baroq kuchukcha
Sent-Luisdan ortiqcha uzoqlashmagan holda, Ostinga nazar tashlaymiz. U yerdagi shaharga nomdosh jamoa Austin Pets Alive ko‘magida 61ta kuchukchaga boshpana topdi. O‘z maydonidagi uchrashuvlar arafasida o‘z uyini izlayotgan baroq kuchukcha klub tumori vazifasini ado etadi. Qarang-a, emosiya umidida kelib, uzoq yillik do‘stini topib oldi. Bundan yaxshiroq yana nima bo‘lishi mumkin?!
Kuchuklar tashrif bo‘yicha rekordlarni yangilashmoqda
«Klivlend Monsterz»ning o‘yiniga 505ta kuchuklar kelganiga nima deysiz? Biz ham u yerda o‘tirgan ishqibozlar uchun maydonda kechgan bellashuvda nimalar yuz berganining umuman ahamiyati yo‘q, degan qarorga keldik: ularning butun diqqat-e’tiborini tribunalardagi baroq jonivorlar band etishgandi.
Argentinada kuchuklar uchun tanishuv xizmati tashkil etildi
Argentina Primerasida barcha klublar ishtirokidagi antiqa tadbir - jonivorlar bilan yuruvchi muxlislarning tanishuv marosimi o‘tkazildi. Unda yangi do‘stlarga ega bo‘lishadi va hayvonlarga mo‘ljallangan tadbirlarda ishtirok etadilar. Bundan tashqari, har bir jonivor sevimli klubining ramzi tushirilgan bo‘yinbog‘ bilan taqdirlanadi.
Xokkeydagi jarima daqiqalari +10 kg. ozuqa
E’tiborli jihati shundaki, Rossiya sportida jonivorlar parvarishiga ko‘mak ko‘rsatish va klublarning xayrixohlik tadbirlaridagi ishtiroki tobora faollashib bormoqda. Masalan, «Traktor» xokkey klubi o‘z o‘yinchilarining o‘yindan chetlatilgan har bir daqiqasi uchun 10 kg.dan ozuqa ajratib, jonivorlar pitomnigiga jo‘natadi. Raqib darvozasiga imkon qadar ko‘proq shayba urish istagidan voz kechib, maydondan chetlatishlarini kutish - kamdan-kam uchraydigan holat. Biroq uy hayvonlariga ko‘rsatilayotgan muruvvatni inobatga olganda, Chelyabinsk klubiga doimo faqat g‘alaba tilash mumkin.
Kuchukchalar xokkeyda
Jonivorlarga muruvvat ko‘rsatishda «Sibir» xokkey klubi ham befarq emas. Uning «Amur»ga qarshi bellashuvi 4 oyoqli muxlislari guvohligida o‘tdi. Xokkeychilar ular bilan suratlarga tushib, erkalab ardoqlashdi.
Basketbolda ozuqa jamg‘arish udumi
«Runa» basketbol klubi Viking («Viking» - jamoa laqabi) laqabli kuchukchani o‘z qaramog‘iga olgan va uy uchrashuvlari arafasida u uchun ozuqa yig‘ardi. Tez orada muxlislar ham tashabbusni qo‘llab-quvvatlashga kirishdilar: bitta o‘yinda to‘plangan yemish 100 kg.dan oshib ketdi. Klub esa ularni «Xaski xelp» nomli hayvonlar pitomnigiga topshirishga odatlandi.
«Kuchuklarga uyda mazza»: «Zenit»ning xayriya tadbiri
«Zenit» klubi tomonidan namoyish etilgan tadbir Rossiya sportidagi eng yorqin tashabbus sifatida e’tirof etildi. Unda futbolchilar maydonga kuchukchalarni ko‘tarib olgan holda chiqib, muxlislar e’tiborini boshpanasiz jonivorlarga jalb etdilar. Tadbirning ovozasi qariyb butun dunyoni zabt etdi: 433 va ESPNdan tortib, ijtimoiy tarmoqlaru Vyetnamning VTV telekanaligacha uni yoritishda bosh-qosh bo‘ldilar.
Zikr etilgan ajoyib voqealar muxlislar auditoriyasini yanada kengaytirish bilan birgalikda, muhim insoniy fazilatni hayotga tatbiq etishga chorlaydi. Majoziy ma’noda aytganda: barchani qutqarishning iloji yo‘q, lekin asrab qolishning doimo iloji bor!
R.IBROHIMOV tayyorladi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
