20 yildan beri «Arsenal» chempionlik unvonisiz to‘p surmoqda.
Mikel Arteta sovringa juda yaqin keldi, hatto so‘nggi tur arafasida bayram tantanalariga tayyorgarlik ko‘rildi, standart vaziyatlar, medallarni topshirish jarayonlari mashq qilindi. «To‘pchilar» «Vest Xem»ning «Manchester Siti» ustidan g‘alaba qozonishiga umid bog‘lashgandi. Ammo qo‘shnilari mag‘lubiyatga uchrab, umidni puchga chiqarishdi. Biroq aslida, sovrinni «Arsenal»ning o‘zi birmuncha avvalroq boy bergandi. Buning uchun jamoa faqat o‘zidan xafa bo‘lishi mumkin. Vaholanki, jamoa mavsumni yomon o‘tkazmadi, da’vogarlar o‘rtasidagi ochkolar farqi minimal darajada edi. Lekin qanchalik zo‘r bo‘lmasin, «quruq» o‘yinga sovrin berilmaydi. Shunday og‘riqli pallada 7 yillik umrini «to‘pchilar»ga baxshida qilgan Granit Jaka Londondan ketishi bilan chempionlikka erishgani xayoldan o‘tdi.
Granit Jaka - «Bayer» bilan chempion
Arteta tomonidan yaroqsizga chiqarilgan, Alonso jamoasining yetakchi yarim himoyachisi. Mikel bolalikdan tanish bo‘lgan qadrdoni bo‘lmish Xabiga unutilmas yordam ko‘rsatdi. Jaka «Bayer»ning «Oltin dubl»ga erishishida muhim rol o‘ynadi. Ya’ni, «kumush tovoq» ortidan Germaniya Kubogini ham qo‘lga kiritdi. Ajablanarli jihati shundaki, Granit «Arsenal» tarkibida biror marta Angliya chempioni bo‘la olmadi, Germaniyada esa Bundesliganing qudratli, lekin eng omadsiz klubi bilan zafar quchdi. Boz ustiga, «dorishunoslar» ichki chempionatni mag‘lubiyatsiz o‘tkazishdi.
Robin van Persi - «MYU» bilan chempion
«Arsenal» muxlislari niderlandiyalik afsonaning futbolkalarini yoqib yuborishdi. Van Persi «to‘pchilar» safida samarali to‘p surgan, rasmiy uchrashuvlarda 132ta gol urgandi. Lekin 8 mavsumdan keyin azaliy raqib safiga yo‘l olgani muxlislarni qattiq ranjitgandi. Aslida, chempionlikni orzu qilgan Robin to‘g‘ri qarorga kelgandi. Futbolchi ser Aleks jamoasida 26ta gol urish bilan chempionlikka ulkan hissa qo‘shdi.
Matyo Flamini va Olivye Jiru - «Milan» bilan chempion
YECHL finalchisi bo‘lgan Flamini «Milan»ga o‘tib, Skudetto sohibiga aylandi. Oradan bir necha yil o‘tgach, uning vatandoshi bo‘lmish hujumchi Jiru bu muvaffaqiyatni takrorladi. Endi jahon chempioni «Milan»ni tark etib, ummon ortiga yo‘l oldi. U «Chelsi» tarkibida YECHL va YELda g‘olib chiqqan bo‘lsa, Italiyada «A» seriyasida zafar quchdi. Chempionlik mavsumida Olivye 11ta gol urgandi. Uning yoshida yetakchi o‘yinchi maqomida bo‘lish osonmas. Biroq u Zlatan bilan hamkorlikda «rossonerlar»ning muhim ijrochilari bo‘lganliklari aniq. Bu bilan faxriylar yosh jamoadoshlariga ibrat bo‘lishdi.
Aleks Oksleyd- Chemberlen - «Liverpul» bilan chempion
«Beshiktosh» xavbeki 6 mavsumni «Arsenal»da o‘tkazgan, o‘ta yorqin o‘ynagan bo‘lmasada, jarohat olishidan avval umid uyg‘ota boshlagandi. Keyin u «Liverpul»da orzusiga erishdi. Klopp jarohatlarga moyil bo‘lgan futbolchini xarid qilganini yaxshi bilardi. Darhaqiqat, faoliyatining qariyb yarmini murakkab jarohatlardan forig‘ bo‘lishga sarfladi. Lekin APL g‘olibiga aylangan 2020 yilda nisbatan eng ko‘p vaqtini maydonda o‘tkazdi. Eslashga arziydigan mavsum.
Serj Gnabri - «Bavariya» bilan chempion
«Shtutgart» maktabidan kelgan Gnabri «Arsenal»dagi debyutini londonliklarga xos tarzda juda barvaqt nishonladi. Lekin baribir, ikkinchi Sesk maqomiga ko‘tarila olmadi. Keyin uni «Verder»ga «surgun» qilishdi. Faqat shundan keyin hujumkor yarim himoyachi Bundesliga chempioni tarkibiga o‘tib, qatorasiga 5 marta «kumush tovoq»ni qo‘lga kiritdi. Agar u «Arsenal» tarkibida qolganida, hozir sovrinsiz qolgan bo‘lardi. Eng asosiysi, Gnabri «Bavariya» bilan xuddi «Barselona»dagi Anri kabi YECHL kubogini boshi uzra baland ko‘tardi.
Samir Nasri - «Manchester Siti» bilan chempion
Gnabridan farqli ravishda, Nasri YECHLda g‘olib bo‘la olmadi. Lekin «Arsenal»ni «Manchester Siti»ga alishgani janjalkash fransuzga Angliya chempioni unvonini hadya etdi. Arsen Venger saviyali ijrochilarni tanlagandi. Shunchaki, Londonda ularga omad kulib boqmadi. Boyib ketgan «shaharliklar» esa Gael Klishi va boshqa sobiq «to‘pchilar» mahoratidan samarali foydalanishdi. To‘g‘ri, Klishi «Arsenal»safida ham APL g‘olibi bo‘lgandi. Lekin Samir faqat «Siti» bilan shohsupaga ko‘tarildi.
Voysex Shesni - «Yuventus» bilan chempion
Polshalik mohir darvozabon APLdagi 5 mavsumdan keyin «Arsenal»ni tark etgan bo‘lsada, biror marta chempion bo‘la olmadi. «Roma»da ham Voysexning ishlari yurishmadi, lekin «Yuventus» qatorasiga 3ta chempionlik unvonlarini hadya etdi. Hozir turinliklar yangi darvozabonni izlash bilan bandlar, 34 yoshli posbon kasbdoshi Buffon kabi 40 yoshgacha o‘ynashiga kafolat yo‘q. Biroq sezgirligi tufayli «A» seriyasiga o‘tgan Voysexga «Arsenal» bilan erisha olmagan chempionlik unvonlari bilan tushgan suratlari dalda berishiga shubha yo‘q.
Aleksandr Gleb, Sesk Fabregas, Aleks Song, Tomas Vermalen - «Barselona» bilan chempion bo‘lganlar
Hikoyamiz deserti sifatida 4 nafar futbolchining «Arsenal»ni tark etish evaziga boshqa jamoada chempion bo‘lishganini misol qilib keltirishni lozim topdik. Aslida, Tyerri Anri va Eshli Koul ham Ispaniya chempionatida g‘olib chiqishgan. Biroq undan avval APLda ham shohsupani zabt etishgani sababli ro‘yxatdan chetda qolishdi. Sesk esa faoliyatini oxirigacha «to‘pchilar» safida to‘p surganida, sovrinsiz qolgan bo‘lardi. Fabregas xuddi belorus Gleb singari «Barselona»da sovrinlari sonini ko‘paytirib oldi. Aleks Song voqeasi o‘zgacha voqea. Jarohatlarga moyil xavbek yaxshi haq to‘laydigan «Barsa»da o‘ynashni afzal ko‘rgandi.
Gleb, Sesk va Song bir martadan La Ligada g‘olib chiqishgan, Tomas Vermalenga turli shikastlanishlar xalal bergan bo‘lsada, 4 marta shohsupaga ko‘tarilgan. To‘rtlikda Sesk Fabregas boshqalarga nisbatan samaraliroq to‘p surdi, ko‘plab gollar va samarali uzatmalar muallifi bo‘ldi. Hozir ispaniyalik afsona «Komo»ning murabbiylar shtabi a’zosi. Jamoa «A» seriyasiga chiqqach, Sesk klubning bosh millioneri sifatida futbolchilarning Ibisada hordiq chiqarish xarajatlarini o‘z zimmasiga oldi.
«Arsenal»ga esa hozircha g‘alaba tantanalarini uyushtirish nasib etmayapti. Mikel Arteta yangi mavsumda zafar quchishga urinib ko‘radi, albatta. Shogirdlari saviyali o‘yinchilar, faqat jamoaviy uyushqoqlik yetishmayapti.
A.ABDUVALIXO‘JAYEV tayyorladi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
