«Milan» sobiq bosh murabbiyi, hozirda Saudiya Arabistonining «Al-Nasr» klubini boshqarayotgan taniqli mutaxassis Stefano Pioli Italiya Superkubogi finali oldidan MilanNews.it nashriga intervyu berdi
Suhbat chog‘ida Pioli «Milan»ning hozirgi o‘yinlarini kuzatish uning uchun og‘ir bo‘layotganini yashirib o‘tirmadi.
- «Milan»ning natijalarini kuzatib boryapsizmi? Jamoa o‘yini borasida qanday fikrdasiz?
- «Milan»dan doimo qiziqarli va chiroyli o‘yin kutaman. To‘g‘risi, jamoaning bu mavsumdagi uchrashuvlarini unchalik kuzatmadim. Boisi, «rossonerrilar»ning o‘yinlarini oynayi jahon orqali tomosha qilish og‘ir botdi. Shuning uchun milanliklarning joriy yilgi natijalariga umumiy baho berishim qiyin. Yashirmayman, YECHL doirasida «Real»ga qarshi bahsning ikkinchi bo‘limni ko‘rdim, yigitlar kuchli raqibga qarshi yaxshi o‘ynashdi va ajoyib g‘alabani qo‘lga kiritishdi. Ammo, «A» Seriyada «Yuventus»ga yutqazib qo‘yilgani yaxshi bo‘lmadi. Tushunaman, har mavsumning o‘ziga xos ko‘tarilishlari va pasayishlari bo‘ladi. Lekin, «Milan» har doim g‘alaba qozonish uchun harakat qilishi kerak.
- Apennin orollarini bir muddat tark etishingizning boisi nima?
- Mavsum tugashi bilan Italiyada murabbiylik qilmaslikka qaror qildim. To‘g‘risi, mamlaktdagi so‘nggi 5 yillik faoliyatim hissiy jihatdan ancha toliqtirdi. Avvaliga Saudiya Arabistonida murabbiylik qilaman deb o‘ylamagandim, bu imkoniyat keyinchalik paydo bo‘ldi. Bilasizmi? «Al-Nasr» rahbariyati bilan yaxshi uchrashuv bo‘lib bo‘ldi. Ular to‘g‘ri futbol g‘oyalarini taqdim etishdi. Men ko‘pincha dast-labki his-tuyg‘ularga asoslanib qaror qabul qilganim bois, mazkur taklifga rozilik bildirdim. Boshqa tarafdan esa Milandan uzoqroqda yashash yaxshilikka xizmat qilgandir. Chunki, uyda qolish va «Milan»ning o‘yinlarini chetdan kuzatish qiyinroq bo‘lardi. Qolaversa, murabbiylik qilishni yaxshi ko‘raman - kasbimdan yetarlicha zavq olaman desam ham bo‘ladi. Ba’zi hamkasblarim uzoq faoliyatdan so‘ng tanaffus qilishni xohlashadi, lekin men ishsiz turolmayman.
- Saudiyada Italiya superkubogi uchrashuvlarida ishtirok etish uchun kelgan shogirdlaringizni ko‘rib qanday his-tuyg‘ularni boshdan kechirdingiz?
- Bu quvonch va umidlarga to‘la ajoyib uchrashuv bo‘ldi. Og‘ir ayriliqdan so‘ng ularni yana ko‘rish menga zavq bag‘ishladi. Yigitlarning final oldi mashg‘ulotlarini kuzatib, «Milan» zaxira o‘rindig‘i yonida o‘tirar ekanman o‘zimni hali ham o‘sha yerda ekanligimni his qildim (kuladi). Milanelloda o‘rnatgan hurmat va do‘stlik men bilan abadiy qoladi. Bunga yaqqol misol «rossonerilar» bilan uchrashganimdan xabar topgandan keyin Jiru ham darhol menga qo‘ng‘iroq qilib hissiyotlarim bilan qiziqdi.
- Zlatan Ibragimovich boshqaruvchi sifatida ishonch uyg‘otadimi?
- O‘ylaymanki, Zlatan juda aqlli boshqaruvchi va «Milan» uchun qo‘lidan kelganini qilishga harakat qiladi. Men uni boshliq emas, futbolchi sifatida yaxshi bilardim. Lekin ishonchim komilki, Ibragimovich jamoa sha’ni uchun bor kuchini ishga soladi. Kutilmalar katta albatta, ammo g‘alaba qozona olmaslik muvaffaqiyatga erisha olmaslikni anglatmaydi. U ham boshqalar kabi xato qiladi, o‘rganadi va rivojlanadi. Agar men «Milan» muxlisi bo‘lganimda, Zlatanga ishongan bo‘lardim.
- Krishtianu Ronaldu bilan ishlash siz uchun nimani anglatadi?
- Krishtianuning jamoadagi tutgan o‘rni uning futbolchilik fazilatlaridan ham oshib ketadi. Ronaldu Saudiyaga futbolni yangi darajaga olib chiqish uchun kelgan va bunga hech qanday shubha yo‘q. Men faoliyatim davomida ko‘plab chempionlarni tarbiyalaganman, ammo bu ro‘yxatda Krishtianu birinchi o‘rinda turadi. Uni boshqalardan ajratib turadigan yagona narsa - mentalitet. Ronaldu barcha sovrinlarga ega chiqib bo‘lsa ham mukammallik tarafdori bo‘lib qolaveradi va o‘yinlarga aql bovar qilmaydigan ishtiyoq bilan tayyorgarlik ko‘radi. Go‘yo u hali ham 20 yoshda va nimalarga qodirligini isbotlash uchun yetarli motivasiyaga ega. Ajoyib fikrlash qobiliyatiga ega chempion ijrochining jamoada mavjudligi sheriklariga ham foyda keltiradi va umumiy saviyaning oshishiga xizmat qiladi.
- Saudiya Arabistonidagi murabbiylarda taktik muloqotda qiyinchiliklar bormi?
- Men doim raqiblarimizdan kamchilik topish yo‘llarini qidiraman. Vazifam o‘yin davomida ular uchun muammo tug‘diradigan uslublarni yaratishdir. «Al-Nasr»da o‘z prinsiplarim va rejalarimni amalga oshirishdan oldin, avvalo, futbolchilarning xususiyatlarini baholay boshladim. Umuman olganda, qayerda bo‘lsam ham Italiyadagi kabi ishlayman. Quvonarli tomoni jamoamning hujum va himoyadagi ko‘rsatgichlari ancha yuqori.
- «Milan»ni sog‘indingizmi?
- Ha va yo‘q. Aniqrog‘i, o‘tmish haqida ko‘p o‘ylay olmayman. To‘g‘ri, «Milan» top-klub va uni tark etish oson bo‘lmadi. Ortga qarasam, jamoani sog‘inaman, lekin hozir ishlab turgan klubimda baxtiyor ekanligimni ham qo‘shimcha qilmoqchiman.
- «Milan» bilan bog‘liq eng yorqin xotiralaringiz bormi?
- Ular juda ko‘p va eng asosiysi Skudettoni qo‘lga kiritganimiz albatta. Balki «Milan»da ishlash, mashg‘ulotlar va o‘yinlarning quvonchi ham yorqin xotiralarimning bir bo‘lagidir. Lekin nima bo‘lgan taqdirda ham murabbiy jamoani qanday holatda qabul qilib olgani va ketayotganda o‘zidan nimalar qoldirayotganiga e’tibor berishi kerak deb o‘ylayman. Muhimi, «rossonerrilar» bosh murabbiyi sifatida kechirgan his-tuyg‘ular o‘zim bilan abadiy qoladi.
- «Atalanta» bilan o‘yindan keyin paydo bo‘lgan «Pioli yonmoqda» («Pioli is on fire») qo‘shig‘i haqida qanday fikrdasiz?
- Bu ajoyib edi. «Pioli yonmoqda»ning o‘ziga xos jihati shundaki, qo‘shiq o‘yinchilar tomonidan yaratilgan va shundan keyingina muxlislar buni qabul qilishgan. Tomoshabinlar tribunadan turib bu iborani ishlatishganda jamoadagi yigitlar juda xursand bo‘lishdi.
Xurshid YUSUPOV tayyorladi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
