Zamonaviy futbolda o‘smirlar yuksak salohiyatni namoyish etgan holda turli rekordlarni yangilab, o‘yin sur’atini oshirmoqdalar
«Transfermarkt» ma’lumotlari orasidan yoshi 18dan o‘tmagan eng qimmat navqiron iqtidorlarni hukmingizga havola etishni lozim topdik.
«Manchester Siti» dahshatli davrni boshdan kechirmoqda - so‘nggi 16ta o‘yinda to‘rttagina g‘alaba. Umuman, kimdir shunday manzarani tasavvur qila oladimi? Yana «Siti»ning safida 3,5 yil avval «Aston Villa»dan 117,5 mln. yevroga xarid qilingan Jek Grilish ham bor. So‘nggi oylarda angliyalik futbolchi faqat salbiy jihatlari bilan hammani lol qoldirmoqda.
1,5 yil avval Jek «Siti»dagi eng yaxshi mavsumini o‘tkazgandi. Keyin saviyasi pasayib, 2024 yilni o‘ta alamli natija - barcha musobaqalarda birorta gol ura olmagan holda yakunladi. Jek o‘zining oxirgi golini 2023 yilning 16 dekabrida, «Kristal Pelas»ga qarshi o‘yinda (2:2) urgandi. Shundan beri 46ta uchrashuvni «quruq» o‘tkazdi.
2022|23 yillar mavsumi «Siti»ga ham, Grilishga ham muvaffaqiyatli bo‘ldi. Jamoa treblga erishdi, Jek esa 5ta gol va 16ta assistni rasmiylashtirdi. Ayniqsa, ancha vaqtdan beri APLda peshqadamlik qilayotgan «Arsenal» darvozasiga urgan g‘alaba goli (3:1) muxlislarda chuqur taassurot qoldirgandi.
O‘shanda Grilish yetarli yulduzlarni jamlagan «Siti»da ham o‘yin sur’atiga ta’sir eta olishini namoyish etgandi. Uning hujumkorlikka qo‘shgan hissasi, kuchli bosim ostida ham to‘pni saqlay olish qobiliyati jamoani kuchaytirib yuborgandi. YECHLning 2022|23 yillar mavsumida «shaharliklar»ning birorta o‘yinchisi Jekdan ko‘proq (12 marta) boshlang‘ich tarkibda maydonga tushmagandi.
2023|24 yillar mavsumida Grilishning o‘yiniga jarohatlar o‘zining salbiy ta’sirini o‘tkazdi, u 15ta o‘yinda maydonga tusha olmadi. Shundan keyin Jek barqarorlikka erisha olmadi. Joriy mavsumda 13ta o‘yinda qatnashgan bo‘lsada, atigi 2 marta to‘liq to‘p surdi.
Aslida, sermahsullik angliyalik futbolchining ustun jihati emas. APLdagi eng yaxshi natijaga (8ta gol) Jek 2019|20 yillar mavsumida «Aston Villa» safida erishgan. Keyingi mavsumda u 3 oyni boldirini davolashga sarflab, 6ta gol bilan kifoyalanishga majbur bo‘lgandi. Umuman, Grilish APLda 183 marta maydonga tushib, atigi 26ta gol urgan.
Angliya terma jamoasida futbolchi Yevro-2024 turniridan chetda qoldi. Lekin tez orada vaqtinchalik bosh murabbiy Li Karslining ishonchini qozondi va YEMLning 3ta o‘yinida 2ta gol urdi. Ayni shu pallada klub miqyosida birorta gol ura olmagandi.
«Karsli rahbarligida Jek klubdagidan boshqacharoq yumushlarni bajaradi. Maydonda unga ko‘proq erkinlik beriladi. Jekning o‘yin uslubi «Aston Villa»dagi so‘nggi mavsum o‘yinini eslatadi. Gvardiola Grilishga terma jamoadagi uslubda o‘ynash imkoniyatini bergach, «Siti» «Nottingem Forest» yengib, g‘alabasiz seriyaga nuqta qo‘ydi. Jek chindan ham ko‘tarinki kayfiyatda to‘p surdi», deyilgandi Sky Sports maqolasida.
«Bizning o‘yinimiz doimo yarim himoya chizig‘i atrofida shakllanadi. Aynan shu chiziq vakillari o‘yin sur’atini belgilab beradilar. Bugun Grilish vazifani a’lo darajada uddalagani sababli, o‘yinni to‘liq nazorat qildik. Jek to‘pni saqlagan holda dadillik bilan raqib qarshiligini yenga oladi», - degandi Gvardiola «Nottingem Forest»ga qarshi o‘yindan keyin.
O‘shanda Jek markazda Gyundogan bilan yonma-yon to‘p surgan, Jeremi Doku esa chap qanotda o‘ynagandi. Lekin Grilishning markazdagi keyingi ishtiroki omadsiz bo‘ldi. Garchi uning uzatmalari 94,6 foiz aniq bo‘lsada, «Siti» YECHLda 0:2 hisobida «Yuventus»ga imkoniyatni boy berdi.
«Markazda o‘ynagan paytida, Grilish himoyadagi mas’uliyatni chuqurroq his etadi. Bu uning uslubidagi futbol emas. «Aston Villa»da Jek jamoaning eng yaxshi o‘yinchisi edi. U o‘zi istagan pozisiyada to‘p sura olardi. Gvardiolaning sxemasida bunday erkinlikka ega emas. Shunday ekan, oldinga intilish imkoniyati bo‘lmagan futbolchining gol urganini tasavvur qilish qiyin. Ikki yil avval u «Siti»ning muhim o‘yinchilaridan biri edi. Jekni so‘nggi o‘n yillikdagi eng yaxshi angliyalik futbolchi desak, mubolag‘a bo‘lmaydi. Bunday o‘yinchidan bir yilda hech bo‘lmaganda bitta gol kutishga haqlimiz. Albatta, uning o‘yinida boshqa kamchiliklar ham yetarli. Lekin Jek goldagi qurg‘oqchilikka barham bersa, faoliyatini tiklab olgan bo‘ladi», - bu Opta Analystning e’tirofi.
Angliyadagilar Gvardiolaning qat’iy sxemasi Jekka og‘irlik qilmoqda, deb hisoblashmoqda. «Aston Villa»ning sobiq o‘yinchisi Li Xendri kasbdoshi boshqa klubga o‘tishi kerak, degan fikrda. Ekspertning nazarida Jek anchadan beri «Siti»da futboldan zavq olmayapti: «Menimcha, Grilish faqat murabbiyning talabiga binoan to‘p surmoqda. Uning Angliya terma jamoasidagi o‘yinini ko‘rganda, umuman, bosh-qa futbolchi o‘ynayotgandek tuyuladi. Ya’ni, juda erkin to‘p suradi. Samaradorlik bobida Jek «Siti»ning umidini puchga chiqargan bo‘lsada, yuksak salohiyat sohibi. Garchi u «Siti»da barcha sovrinlarga erishgan bo‘lsada, jamoani o‘zgartirsa, yaxshi bo‘ladi. Chunki futbolchi o‘z kasbidan lazzatlanishi lozim, deb o‘ylayman. Jekni yana «Aston Villa»da ko‘rishni istardim».
«MYU»ning sobiq bosh skauti Mik Braun «Siti» Grilishni sotib yuborish taraddudini ko‘rayotganligini ma’lum qildi: «Grilishning bir yildan ko‘proq vaqt ichida gol ura olmayotgani o‘ta hayratlanarli voqea. Hozir u avvalgidek ta’sirchan emas. Jekning o‘yini «Siti» rahbariyatining hafsalasini pir qildi. Bilishimcha, «Siti» futbolchiga oid takliflarni mavsum yakunida ko‘rib chiqadi.
«Manchester Siti» inqirozga uchragan paytda Grilishning omadsiz o‘yini yaqqol ko‘zga tashlanmoqda. Uning salbiy jihatlari va samarasizligi klub uchun yanada jiddiy muammo bo‘lib qoldi. Avvallari u muhim uchrashuvlarda boshlang‘ich tarkibda maydonga tushardi, endi zaxirada qolib ketmoqda. Gvardiola Grilishni o‘zgartirib yubordi, faqat ijobiy tomonga emas. Futbolchi uni muxlislar yoqimtoyiga aylantirgan barcha fazilatlaridan judo bo‘ldi. Deylik, «Nyukasl» yoki «Tottenxem»ga katta ish haqi oladigan va mavsumda 3 yoki 4ta gol uradigan futbolchi kerakmi? Grilish - endi artist emas».
MUHAMMADSODIQ tayyorladi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
