Bugun O‘zbekiston futzal federasiyasi prezidenti Bekzod Mamatqulov mamlakat chempionati Oliy va birinchi liga jamoalari rahbarlari va bosh murabbiylari bilan uchrashuv o‘tkazdi.
B.Mamatquolv jamoalar vakillarining o‘z klublaridagi ayni paytdagi holat, mavjud kamchilik va yechimini kutayotgan muammolari bilan qiziqdi. Qolaversa, yangi tashkil etilgan Futzal federasiyaning futzalni rivojlantirish bo‘yicha besh yilga mo‘ljallangan Strategiyasini muhokama qildi, uni yanada mukammallashtirish borasida murabbiylarning taklif va mulohazalarini tingladi.
Federasiya rahbari o‘z o‘rnida mamlakatimizda futbol va futzalni rivojlantirish masalalari Prezidentimiz e’tiborida ekanligi, Futzal federasiyasi o‘z oldiga ulkan maqsad va vazifalar qo‘yayotganligi, bu sohani yanada rivojlantirish, ommalashtirish, uning tomoshabopligini oshirish, klublarni professional, raqobatbardosh faoliyati samaradorligini ko‘tarish, professional va havaskorlar o‘rtasidagi musobaqalarni yuqori saviyada tashkil etish, terma jamoalarning xalqaro maydonlardagi muvaffaqiyatlarini doimiy ta’minlab borish kabi masalalarga alohida to‘xtalib o‘tdi.
Shuningdek, O‘zbekiston futzal federasiyasi prezidenti to‘planganlar bilan shu kabi yig‘ilishlarni tez-tez o‘tkazib turish borasida kelishib oldi.