Shahzod Toirov: «Navbahor»dagi qisqa davrim, shirin xotiralar bilan eslash hamda sog‘inishga arzigulik davr bo‘ldi, deya olaman”
Xabaringiz bor, «Navbahor»ning 23 yoshli himoyachisi Shahzod Toirov birinchi davrada kam o‘yin amaliyotiga ega bo‘lganligi bois, o‘zaro kelishuvga asosan, jamoani tark etdi. Toirov joriy mavsumning birinchi yarmida «lochinlar» tarkibida jami 4 ta uchrashuvda maydonga tushib, 288 daqiqa harakat qildi.
Klub matbuot xizmati xodimlari Shahzod Toirovdan intervyu olishdi.
— Shahzod, jamoada juda qisqa vaqt bo‘ldingiz, «Navbahor»ni bu qadar erta tark etishingizning sababi nimada?
— Avvalambor, assalomu alaykum. To‘g‘ri ta’kidladingiz, «Navbahor»dagi faoliyatim juda erta yakunlandi. Bunga esa o‘yin amaliyotining kamligi asosiy sabab bo‘ldi. Hozir futbol o‘ynaydigan yoshda bo‘lganim, futbolchi sifatida yanada rivojlanishim kerakligi bois, jamoani tark etishga qaror qildim.
— OKMKga o‘tishingiz qanday sodir bo‘ldi? Mazkur jamoaga kim taklif etdi?
— Birinchi davra yakunlanishiga 4-5 ta tur qolganida, menga Olmaliq klubi rahbariyatidan chaqiruv bo‘ldi. Kelajak rejalarim haqida so‘rashdi. «Navbahor» bilan shartnomam borligi uchun ularga aniq javob berolmagandim. Keyin davra yakunida OKMKdan yana aloqaga chiqishdi. Aslida olmaliqliklar joriy mavsum avvalida ham menga taklif bilan chiqishgan edi. Men o‘shanda yaxshi niyatlar bilan «Navbahor»ni tanlagandim. OKMKning bu safargi taklifini esa qabul qildim. Meni Bahodir Mirzayev taklif etdi.
— «Navbahor»dagi qisqa faoliyatingizdan qanday taassurotlar qoldi?
— Namangandagi faoliyatim qisqa bo‘lsada, juda katta taassurot va hissiyotlar bera oldi. Namanganlik muxlislarga alohida respekt degan bo‘lardim. Ular doimo yurtimizda tengsiz ekanliklarini isbotlashga harakat qilishadi. «Navbahor» ishqibozlari yaratgan atmosferada Yevropa nafasini his qildim. Ularni unutmayman. «Navbahor»dagi qisqa davrim, shirin xotiralar bilan eslash hamda sog‘inishga arzigulik davr bo‘ldi, deya olaman.
— «Navbahor»dan ketishingizga klub rahbariyatidagi o‘zgarishlar ham ta’sir o‘tkazdimi?
— Yo‘q, Namangan jamoasidan ketishimning asosiy sababi, murabbiylarning menga ishonch bildirishmagani bo‘ldi. Murabbiyning rejasiga kirmasangizu klub rahbarlari yoki muxlislar “jamoada qoling”, deyishgani bilan hech narsani o‘zgartirib bo‘lmaydi.
— «Navbahor»dan ketmoqchi ekaningizni aytganingizda, «Navbahor» PFK rahbariyati va murabbiylar shtabi qanday reaksiya qilishdi?
— Jamoani tark etmoqchi ekanligimni birinchi bo‘lib, jamoa bosh murabbiyi Sergey Lushanga aytdim. Murabbiy ayni paytda rejalariga meni kiritmayotganini, jamoaning asosiy tarkibi o‘zagini aniqlab olganligini, shuning uchun hech narsani o‘zgartirmoqchi emasligini ta’kidladi. Shu bois, ketishim eng to‘g‘ri yo‘l ekanini anglab yetdim.
To‘g‘ri, klub rahbarlari ozgina shoshilmasligimni, hali hammasi oldinda ekanini aytishdi. Biroq menga o‘yin amaliyoti kerak edi. Shuning uchun «Navbahor»dan ketdim.
— So‘nggi so‘z o‘rnida muxlislarga tilaklaringiz...
— «Navbahor»dagi qisqa faoliyatim davomida meni qo‘llab-quvvatlagan, men bilan do‘st bo‘lgan barchaga o‘z minnatdorchiligimni bildiraman. Namanganlik muxlislarga esa omad va zafarlar tilayman. «Navbahor» ishqibozlarini menga ko‘rsatgan hurmatlarini hech qachon unutmayman. Sobiq jamoadoshlarimga ham rahmat.
«Navbahor»ga esa 2-davra o‘yinlarida omad yor bo‘lishini tilayman.
«Navbahor» PFK matbuot xizmati.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
