O‘zbekiston terma jamoasining sobiq a’zosi Sayat Ilyosov faoliyatini Qozog‘iston terma jamoasida davom ettirishga qaror qildi. Bu haqda qozog‘istonlik jurnalist Aslan Kajenov xabar berdi.
“O‘zbekiston terma jamoasi safida musobaqalarda ishtirok etgan qondoshimiz Sayat Ilyosov endilikda Qozog‘iston terma jamoasi sharafini himoya qiladi. Ichki musobaqalarda u Mang‘istov viloyati nomidan ringga chiqadi. Ehtimol, uning shaxsiy murabbiyi Marat Jakiyev bo‘ladi. Shuningdek, u mart oyida professional boks oqshomida ham ishtirok etadi. Omad tilaymiz!”, deyiladi xabarda.
Ma’lumot uchun, Sayat Ilyosov 2022 yilda yoshlar o‘rtasidagi Osiyo chempionatida bronza medalini qo‘lga kiritgan, 2025 yilda esa 22 yoshgacha bo‘lgan Osiyo chempionatida oltin medalga sazovor bo‘lgan.
Ilyosov -63,5 kg vazn toifasida O‘zbekiston terma jamoasi tarkibida 2025 yilgi IBA Jahon chempionatida ishtirok etgan. U musobaqaning ilk bosqichida falastinlik Anas Sulaymonga qarshi bahs olib borgan va muddatidan avval g‘alabaga erishgan.
Biroq navbatdagi jangda qirg‘izistonlik Omar Livaza bilan to‘qnash kelgan va raqibiga 0:5 hisobida yutqazib, musobaqani tark etgan. Livaza ushbu musobaqada kumush medalni qo‘lga kiritgan.