Termiz davlat universiteti qoshida tashkil etilgan «TerDU» klubi ishtirokini Proligada davom ettiradi. Universitet rektori Abduqodir Toshqulov tashabbusi bilan klub endi nisbatan kattaroq Ligada ishtirok etadi.
O‘tgan yilning iyul oyida Birinchi liga ishtirokchisi bo‘lgan «Qiziriq» futbol klubi Termiz davlat universiteti tasarrufiga o‘tkazilgan bo‘lib, klub nomi «TerDU»ga o‘zgartirilgandi. Shundan so‘ng klub faoliyatida jonlanish kuzatildi va «TerDU» mavsumni o‘z mintaqasida beshlikda yakunlab, Toshkent mezbonlik qilgan pley-off bosqichida ishtirok etdi. Oliy ta’lim muassasasi rektori o‘z xatida «TerDU» Proliga uchun talablarni bajarishga tayyor ekanligini ma’lum qildi.
Termiz shahrida professional futbol uchrashuvlari talablariga javob beradigan arenalar soni cheklangan. Shundan kelib chiqib, «TerDU» «Surxon» futbol klubi bilan shartnoma imzoladi va 2026 yilgi mavsum davomida uning zaxira maydonidan rasmiy uchrashuvlar davomida foydalanish bo‘yicha kelishuvga erishdi. Mazkur maydon zamonaviy talablar asosida bunyod etilgan bo‘lib, u Proliga uchrashuvlarini qabul qilish imkoniyatiga ega. Shuningdek, hududda klublar sonining ortib borishi ehtimoliy yangi maydonlar bunyod etilishiga olib kelishi mumkin.
Liga bilan kelishuv asosida «TerDU» U19 jamoasi tarkibi universitetning kichik kurs talabalaridan tashkil topadi. O‘z navbatida, asosiy tarkib futbolchilari bilan Liga talab qilgan ko‘rinishda professional mehnat shartnomalari imzolanadi. Shu tariqa Surxondaryo viloyatida futbol bilan shug‘ullanayotgan yosh futbolchilar kelajakda qo‘nim topishi mumkin bo‘lgan yana bir klub bosqichma-bosqich rivojlanib boradi.
Qayd etish kerak, Proliga ishtirokchilarining turli hududlardan ekanligi mamlakat futbolini rivojlantirish yo‘lida muhim ahamiyat kasb etadi. Bugunga kelib, Superliga klublarida o‘z o‘rnini topa olmagan iqtidorlar uchun o‘zini namoyon qilish imkoniyati mavjud bo‘lgan o‘rta sinf jamoalari soni ortib bormoqda. Tanlov imkoniyatlarining oshib borishi esa, o‘z navbatida, raqobat muhitiga ijobiy ta’sir ko‘rsatishi mumkin.
Liga universitetlar qoshida tashkil etilayotgan futbol klublarining yangi bosqichga chiqib borayotganini olqishlaydi. Ishonamizki, qisqa vaqt ichida oliygohlar nafaqat ta’lim, balki professional sport yo‘nalishidagi imkoniyatlari bilan ham yosh avlodni o‘ziga jalb qila oladi.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
