Kelasi yozda «Real» boshqaruvini qo‘lga olish asnosida murabbiylik faoliyatini tiklashi mumkinligi aytilayotgan Yurgen Klopp mazkur masalaga yana bir marta barham bergandek bo‘ldi. Har holda, ayni payt «Red Bull» kompaniyasining global futbol yo‘nalishi rahbari sifatida ishlayotgan germaniyalik mutaxassis AFP axborot agentligi- (Fransiya)ga bergan intervyusida bu boradagi xabarlarni qat’iyan rad etish barobarida hozirgi maqomidan mamnunligini ta’kidladi.
– Xabi Alonsoni yaqindan bilgan mutaxassis sifatida uning «Real» boshqaruvidan iste’foga chiqarilganini qanday qabul qildingiz?
– Ochig‘i, bu xabarni ilk marta eshitganimda, xayolim biroz chalkashib ketdi. Avvaliga miyamda savol tug‘ildi: «Qanaqasiga axir?» Ammo ortiqcha o‘ylab o‘tirmay, o‘zimga darhol javob ham berdim: «Hayron qoladigan joyi yo‘q, axir bu — «Real»ku». «Madrid»da vaziyat doim shunday: agar jamoa turnir jadvalida 1-o‘rinda bo‘lmasa, har qanday murabbiy o‘z kelajagi haqida jiddiy o‘ylab qo‘yishi kerak. Umuman, shu voqealarga qaramay, Xabi men uchun yangi avlodning eng istiqbolli murabbiylaridan biri bo‘lib qolaveradi. U o‘yinni chuqur tahlil qilish salohiyatiga ega, vaziyatlarni tez ilg‘aydi, qaror qabul qilishda aqlga tayanadi. Bu sifatlar esa har qanday yuqori darajali jamoa murabbiyi uchun juda muhim.
– Xabi Alonso bungacha «Bayer»da katta muvaffaqiyatlarga erishgan va ko‘pchilik uni «Madrid»da yangi sarguzashtlar kutayotganiga shubha qilmagandi…
– Xabi 2024 yili «Bayer» bilan Bundesliga va Germaniya kubogini yutish orqali nechog‘li istiqbolli murabbiy ekanligini isbotladi. Ammo «Real» – mutlaqo boshqa muhit, jamoada sabr tushunchasi deyarli yo‘q. Bunga tarixdan yetarlicha misol keltirish mumkin. Masalan, Yupp Xaynkes 1998 yili «Madrid» bilan CHLda g‘olib chiqqan bo‘lsa-da, ishdan bo‘shatilgandi, baribir.
– Xo‘sh, «Real» rahbariyatiga yangi murabbiy tanlash masalasida qanday maslahat bera olasiz?
– Jamoa rahbariyatida o‘z ishlarining ustalari va nima qilayotganlarini tushunadigan mutaxassislar ishlashmoqda, shubhasiz.Agar shaxsiy fikrim kimnidir qiziqtirsa, aytishim mumkinki,boshmurabbiyni ishdan bo‘shatishdan oldin uning vorisi haqida muayyan tasavvurga ega bo‘lish lozim. Shuningdek, vaziyatga real ko‘z va kayfiyat bilan qarash kerak. Misol uchun, hozir «Madrid»ga Gvardiolani chorlash haqida o‘ylayotgan bo‘lsalar, bu unchalik hayotiy g‘oya emas.
– Endi mavsum yakunlangach, aynan «Real»da ish boshlashingiz haqidagi mish-mishlarga ham to‘xtalsak…
– Hozir hayotimning shunday bosqichidamanki, ayni faoliyatimdan to‘laqonli qoniqish hosil qilyapman va boshqa joyga intilmayapman. Agar qayerdadir «Real» xizmatimga jiddiy qiziqayotgani haqida eshitsam ham, ortiqcha hayajonga berilmayman. Chunki barchasi faqat OAV taxminlari, xolos.
– Demak, siz uchun murabbiylikka qaytish masalasi butunlay yopiq, shundaymi?
– Ayni payt shunday. Ammo ertaga nima bo‘lishini hech kim bilmaydi. To‘g‘ri, hozir qachondir bu boradagi fikrimni o‘zgartirishni o‘ylamayapman, lekin hammasini vaqt ko‘rsatadi. Shunday ekan, bu savolga aniq javob bermay turganim ma’qul. Qisqasi, mazkur masalada aniq nuqta qo‘yishga shoshilmaslik kerak…
MUHAMMADXON tayyorladi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
