«Tottenxem» yangi mavsum oldidan tarkibni kuchaytirish uchun 367 mln yevro sarfladi, ammo jamoa APLdagi dastlabki 5 turdan so‘ng so‘nggi o‘rinni egallab turibdi.
Londonliklar o‘tgan mavsumni ham muvaffaqiyatsiz o‘tkazgan edi. Jamoa Angliya chempionatida 17-o‘rinni egalladi. Keyinchalik Tomas Frank va Igor Tudor ham vaziyatni keskin o‘zgartira olmadi.
Yozda «Tottenxem» bosh murabbiyligiga Roberto De Dzerbi tayinlandi. Italiyalik mutaxassis kelgach, jamoa tarkibida katta o‘zgarishlar amalga oshirildi — klub 10 nafar yangi futbolchini xarid qildi.
Transferlar uchun jami 367 mln yevro sarflangan. Eng qimmat xarid Sandro Tonali bo‘ldi. «Tottenhem» tayanch yarim himoyachisi uchun «Nyukasl»ga 108 mln yevro to‘ladi.
Shunga qaramay, klub katta mablag‘ evaziga birorta ham markaziy hujumchi xarid qilmadi. Hujum chizig‘ini kuchaytirish maqsadida «Manchester Siti»dan Omar Marmush ijaraga olindi. Ammo u joriy mavsumda o‘tkazgan 341 daqiqasida hali gol yoki assist qayd etmadi.
«Tottenhem» APLdagi dastlabki 5 ta o‘yinda atigi 2 ochko to‘pladi. Jamoa «Nottingem Forest» va «Everton» bilan 0:0 hisobida durang o‘ynadi.
Londonliklar mavsumdagi ilk gollarini «Aston Villa»ga qarshi bahsda urdi. Konor Gallaxer 82-daqiqada gol urgan paytda raqib allaqachon 3:0 hisobida oldinda edi.
De Dzerbining muammolari faqat natijalar bilan cheklanib qolmayapti. Mudrik, Odober va Xavi Simonsning jarohatlari murabbiyning tanlov imkoniyatini kamaytirgan.
Shuningdek, italiyalik mutaxassis ayrim futbolchilar, jumladan Risharlison bilan ham til topishishda qiyinchilikka duch kelayotgani aytilmoqda.
«Tottenxem» Angliya chempionligini so‘nggi bor 1960/61 mavsumida qo‘lga kiritgan.