Мен, Фалончи Пистончиев, бугундан бошлаб барча спорт турларининг қироли бўлмиш футбол ўйиннинг иштирокчисига айланарканман, қўлимдаги ушбу тўпни ушлаб, бу ўйиннинг мухлисларига, мураббийларимга ва футбол “босс”ларига тантанали ваъда бераман-ки, доим ҳалол ўйнашга, мураббий ва раҳбарларнинг кўрсатмаларини сидқидилдан бажаришга, футбол қоидаларидан иложи борича четга чиқмасликка оёғимдан келганча ҳаракат қиламан.
Сўз бераман-ки, алдасам фақат рақибни алдайман, айёрлик қилсам фақат рақибга айёрлик қиламан, чалғитсам фақат рақиб дарвозабонини чалғитаман.
Сўз бераман-ки, агар рақиб ўйинчиси атайлаб қўпол ўйнамаса, жавоб қайтармайман.
Сўз бераман-ки, ўзим ўйнайдиган жамоанинг ички сирларини матбуотга ошкор қилмайман.
Сўз бераман-ки, агар ҳакам муғомбирлик қилмаса, у билан тортишмайман.
Ваъда бераман-ки, бўш бўлса ҳам, дарвозабон турган бўлса ҳам дарвозани ишғол қилиш - биринчи вазифам бўлади.
Имконият бўлди дегунча ҳоҳ чап оёғим, ҳоҳ ўнг оёғим, боринг-ки, танамнинг қўлдан бошқа барча аъзолари ёрдамида гол ураман.
Агар жамоадошларим мендан тўпни қизғанишмаса, мен ҳам уларни тўпсиз қолдирмайман.
Ҳоҳ қуйи лига бўлсин, ҳоҳ юқори лига, жамоам яхши тўлаб турса ўпкам шишиб кетгунча тиним билмай тўп тепишга ҳаракат қиламан.
Футбол мухлисларига, улар ҳатто рақиб фанатлари бўлса ҳам, доим ҳурматда бўламан. Агар улар шаънимни булғайдиган гап билан аччиғимни чиқармасалар, мен ҳам уларга ҳеч қандай қилиқ қилмайман.
Агар мени фақат мақтайдиган бўлсалар, реклама қилсалар, журналистлар билан ҳар доим мулоқот қилишга шай тураман.
Бутсамни михга илгунча нос ва сигарет чекиш, спиртли ичимликларни истеъмол қилиш каби зарарли одатлардан ўзимни тийишга сўз бераман.
Икки тайм ва қўшиб берилган вақт давомида фақат ғалаба ҳақида ўйлашни,
ҳакамнинг финал ҳуштаги чалинмагунча мағлубятни тан олмасликни ўзимга одат қилиб оламан.
Онт ичаман-ки, агар турли жамоалар ўртасида талаш бўлиб кетсам ва бу яқинларим, устозларим ҳамда футбол корчалонлари ўртасида қаттиқ баҳсга сабаб бўлса, охирги қарорни барибир кўп пул берганнинг фойдасига чиқараман.
Агар ушбу қасамимни бузсам ва кимдир буни сезиб қолгудай бўлса, мухлисларнинг нафратига, ҳакамларнинг сариқ ва қизил карточкаларига дучор бўлай. Умрим заҳира ўриндиғида ўтиб кетсин.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Рустам Сулаймонов
