Футболда асосан натижа учун ўйналади. Мабодо керакли натижа қўлга киритилса, олам гулистон. Уни ҳеч ким йўққа чиқаролмайди. Ўйин давомида минг яхши ўйна, чиройли ўйин кўрсат, натижага эришилмаса, ҳаммаси бир пул. ЕВРО- 2000 финалида яхши ўйнаб, охирида нақд ғалабани бой берган Италия терма жамоасини биламан. Улар учрашувни яхши ўтказишди. Аммо қитъа ғолиби бўлиш учун ўйин охирида атиги 40 сонияни ушлай билишмади. "ПСЖ" ҳам "Барcелона"га қарши яхши ўйин кўрсатди. Аммо ўзига керакли натижага эришолмади. Футбол ўйинида учрашув мобайнида яхши ўйнаб мағлубиятга учрашинг бор нарса. Футбол ўзи шуниси билан қизиқ.
Бироқ натижага ҳакамларнинг хатолари таъсир кўрсатса-чи. Буни қандай ҳазм қилиш мумкин. Тарихда шундай ўйинлар кузатилганки, ҳакамлар хатоларга йўл қўйиб, ўйин натижасига таъсир кўрсатган. Натижа эса тарихда қолган. 90-дақиқадан кейин ҳакамнинг якунловчи ҳуштаги янградими, натижа дегани шу.
Ана шундай вазиятлардан бири ЕВРО-1996даги Болгария-Руминия ўйинида кузатилган. Иккала жамоа ҳам ЖЧ-1994 қаҳрамонлари, таркибда Христо Стоичков ва Георге Хажи каби етакчилар бор. 3-дақиқадаёқ Стоичков болгарларни олдинга олиб чиқди. Орадан ҳеч қанча вақт ўтмай, руминлар ярим ҳимоячиси Доринел Мунтянунинг зарбаси дастлаб тўсинга тегиб, дарвоза ичкарисига бир метрлар кирган тўп ташқарига қайтиб чиқди. 1:0 ҳисоби ўйин охиригачо ўзгармади. Ҳаққоний голи инобатга олинмаган Руминия терма жамоаси чемпионат билан барвақт хайрлашди.
Африка Миллатлар Кубоги-2000 мусобақаси финалида қитъанинг 2 кучли жамоаси — Камерун ва Нигерия терма жамоалари учрашди. Ўйин ҳам шунга мос ўтди. Асосий ва қўшимча вақтларда жанговар дуранг — 2:2 ҳисоби қайд этилди. Пенальтилар сериясида Нигерия терма жамоаси ҳужумчиси Виктор Икпебанинг зарбаси олдин тўсинга тегиб, дарвоза ичкарисига бир метрлар кириб, ташқарига чиқиб кетди. Тоза голни ҳакамлар кўрмай қолишди. Натижада Камерун Африка чемпиони бўлди.
Чемпионлар лигаси-2002 ярим финалида "Байер"- "Манчестер Юнайтед" баҳсида "МЮ" етакчиси Рой Киннинг зарбасини "Байер" ҳимоячиси дарвоза ичкарисидан қайтарди. Натижада "Байер" (Леверкузен) ўз тарихида илк марта Чемпионлар лигаси финалига чиқди.
Мен асосан, бу жойда тўп дарвозага кириб, қайтиб чиққан ҳолатларни назарда тутяпман. Вақти келиб бу ҳолатларга чора топилди — голни аниқлайдиган технология амалда жорий этилди.
Шундай вазиятлар кузатилганки, бу ёғи ҳакамларнинг инсофига боғлиқ бўлиб қолган. Чемпионлар лигаси-2006 ярим финалида "Милан" ва "Барcелона" учрашди. Дастлабки ўйинда "Барселона" 1:0 ҳисоби билан устунликка эришди. Жавоб ўйинида эса "Милан" ҳужумчиси Андрей Шевченконинг тоза голи инобатга олинмади. Бу эса учрашув натижасига ўз таъсирини кўрсатди. Натижа эса тарихда қолди.
Узоққа бормайлик, Ўзбекистон терма жамоаси Осиё Кубоги-2007да жуда чиройли ўйин кўрсатди. Чорак финалда Саудия Арабистони терма жамоасига қарши ҳам жуда яхши ўйнадик. 6та зарбамизни устун ва тўсин қайтарди. Бу ҳам етмагандай ҳужумчимиз Максим Шацкихнинг тоза голи инобатга олинмади. Ўйиннинг видеотакрорини кўриб чиққан ОФК мутахассислари бунинг учун Федерациямиз ва терма жамоамиз аъзоларидан кечирим сўрашди. Аммо натижа тарихда қолганди.
ЖЧ-2018 саралашида иштирок этаётган терма жамоамиз бу сафар ҳам тарихда қолишни мақсад қилган. Бунинг учун эса, албатта, натижа керак. Олдимизда турган ўйинларда Эрон, Хитой ва Жанубий Кореяни ютиб натижа кўрсатишимиз лозим. Жамоамизга омад тилаймиз!
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
