«Sovetskiy sport» nashrida aytilishicha, Turinning «YUventus» klubida bosh murabbiy Massimiliano Allegriga bog‘liq mashmashalar yuzaga kela boshladi. Aniqrog‘i, mutaxassis o‘z shogirdlarining harakatlaridan qoniqmayapti va ularga zug‘um o‘tkazishga urinmoqda. Bu esa Allegri uchun ko‘ngilsiz xotima topishi mumkin.
O‘zi nima bo‘lgandi?
Xabaringiz bor, bundan bir necha kun ilgari Turinning «YUventus» klubi Italiya superkubogi uchun kechgan bahsda «Milan»ga yutqazib qo‘ydi (1:1, penaltilar bo‘yicha 3:4). O‘yin yakuniga etgach, jamoa ustozi Massimiliano Allegri maydonda klub rahbarlari - bosh direktor Beppe Marotta va sport direktori Fabio Paratichi bilan keta turib, futbolchilar uning ko‘rsatmalarini to‘liq bajarishmaganidan nolidi. Kamiga, Allegri so‘zi oxirida kutilmagan jumlani ishlatdi: «Men ularning adabini berib qo‘yaman» (aslida uning gaplari bundan-da qo‘polroq edi). Baxtga qarshi, Allegri o‘z shogirdlari sha’niga bunday bo‘lmag‘ur so‘zlarni aytgan vaqtda, maydondagi telekameralarning biri murabbiyga juda yaqin turgandi. Shuning uchun mazkur ko‘ngilsiz lavha omma e’tiboriga tushib qoldi.
Italiya OAVlarida aytilishicha, Allegri kiyinish xonasida rostdan ham, shogirdlarining ta’zirini bergan. Uning fikriga ko‘ra, futbolchilar faqat o‘zlarini o‘ylayverib, jamoaviy natijani rasvo qilishganmish. Allegrining g‘azabidan hatto, argentinalik hujumchi Paulo Dibala ham chetda qolmagan. Vaholanki, Dibala amalga oshirilmagan penaltidan keyin shundoq ham tushkunlikka tushib turgan edi.
Bu - birinchisi emas
Shubhasiz, bu qiliq orqali Allegri klub xo‘jayinlarini o‘ylantirib qo‘ydi: jamoaga yangi murabbiy kerakmikan-a?! Negaki, Allegrida bunday yoqimsiz holat birinchi marta uchramayapti. Masalan, u «Milan»ga murabbiylik qilganida ham xuddi shunday voqealar kuzatilgan. Braziliyalik taniqli futbolchi Robino Allegrining haqoratlari joniga tekkani bois, shartta mashg‘ulotlardan ketib qolgandi. Boshqa bir braziliyalik hujumchi Pato esa murabbiy o‘z talablarini tushuntira olmaganidan noligan: «Bizga Karlo Anchelotti ustozlik qilganida, doim men bilan gaplashib, maydonda nimalar qilishim kerakligini sodda va lo‘nda tarzda tushuntirardi. Allegri davrida esa faqat boshimni egib, tanqidlar eshityapman, xolos. Lekin aynan nimani o‘zgartirishim kerakligini haligacha anglab etganim yo‘q. Axir, murabbiy - umi? Odamga o‘xshab tushuntirsin-da!»
Qiziq, o‘zi Allegri qaerda ishlamasin, ikkinchi mavsumdan boshlab, mana shunday voqealar yuzaga kelaveradi. Birinchi mavsumda esa hammasi ko‘ngildagidek o‘taveradi. Misol uchun, «Milan» ham, «YUventus» ham Massimiliano ish boshlagan ilk mavsumda Italiya chempionligini qo‘lga kiritgan. Ehtimol, o‘sha paytda ham murabbiy va futbolchilar orasida ixtiloflar chiqqandir. Ammo harqalay, ular OAVga oshkor bo‘lmagan. Boshqacha aytsak, muammolar bir yildan keyin boshlangan. Deylik, Milanda Allegriga bog‘liq mashmashalar ikkinchi mavsumda kuzatilgandi (isbot uchun Patoning so‘zlari etarli). Turinda esa uchinchi yilga kelib, ustoz va shogirdlar o‘rtasiga «ola mushuk» tushdi.
Allegri nimadan norozi?
Ta’kidlash joizki, Allegri jamoa uchun omadsiz chiqqan o‘yinlardan so‘ng aksariyat hollarda shogirdlarining o‘yinini tanqid qila boshlaydi. Uning mantig‘iga ko‘ra, jamoa maydonda kim bilan o‘ynamasin, to‘pni nazorat qilib, doim g‘olib chiqishi shart. To‘g‘ri, turinliklar hozircha «A» seriyada peshqadam bo‘lib, ECHL «pley-off» bosqichiga guruhda birinchi o‘rinni egallagan holda chiqishdi. Biroq «YUventus» namoyish qilayotgan o‘yin odamni qattiq xursand qiladigan darajada emas. Boz ustiga, jamoa birinchi davrada raqibga qarab usul tanlaydigan klublarga qarshi muvaffaqiyatga erisha olmadi: «Inter», «Milan» va «Jenoa»larning bari «keksa sinora»dan ustun kelishdi - 1:2, 0:1 va 1:3.
Shuningdek, Allegriga nisbatan e’tirozlar ham bor. Ularning eng asosiysi - Massimiliano qo‘l ostidagi futbolchilarning potensial imkoniyatlaridan to‘liq foydalana olmaydi. Bunga yorqin misol - Gonsalo Iguain. Chunonchi, yozda «Napoli»dan 90 million evroga sotib olingan hujumchi aslo o‘ziga o‘xshamayapti. Deylik, u o‘tgan yili neapolliklar safida 36ta gol urganida, o‘rtacha har bir o‘yinda besh marta zarba berish imkoniyatiga ega bo‘lgandi. «YUventus»da esa bu ko‘rsatkich uchtaga arang etmoqda. Shunga qaramay, Gonsalo 18 turda jami 10 marta raqiblar darvozasini aniq nishonga oldi. Biroq shuncha katta pulga sotib olingan futbolchi bundan-da ko‘proq gol urishi lozim.
Uni kim almashtiradi?
Ana endi o‘zingizni bir lahza «YUventus» rahbarlari o‘rniga qo‘yib ko‘ring: Allegrini bir lahzada quvib yuborish mumkin emas. Yodingizda-mi, «Milan» Allegri bilan xayrlashgandan keyin anchagina muammolarga duch kelgandi. Turinda esa tabiiyki, bunday bo‘lishini aslo istashmaydi. Lekin «YUventus» rahbarlari hatto Antonio Konteni ham saqlab qolishga ortiqcha urinishmagan ekan, demak Massimiliano bilan kelishuvni to‘xtatish unchalik qiyin bo‘lmaydi. Faqat hammasi to‘g‘ri vaqtni tanlashda qoldi. Bizningcha, mutaxassis Turinda uzog‘i bilan, yozgacha ishlaydi, xolos.
La Gazzetto Dello Sport nashrida aytilishicha, «YUventus» hozirda Allegrining o‘rniga uch nafar nomzodni o‘rganmoqda. Bular: «Sassuolo» ustozi Eusebio Di Franchesko, «Fiorentina» murabbiyi Paulu Souza va «Monako»da muvaffaqiyatga erishayotgan Leonardu Jardima. Xullas, tez orada Allegri va «YUventus» o‘rtasida kelishmovchilik boshlanganidan xabar topsak, ajabmas.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
