Kecha nufuzi jihatidan Yevropada ikkinchi o‘rinda turadigan Yevropa Ligasi musobaqasining 1/16 bosqich birinchi uchrashuvlari nihoyasiga yetdi. Chempionlar Ligasi nimchorak finalining dastlabki uchrashuvlari esa haftaning bezagiga aylandi. France Football nashri bu ikki musobaqa yakuniga ko‘ra o‘z ramziy termasini tuzib chiqdi. Ushbu ramziy terma jamoa 4-2-3-1 sxemasida bo‘lib, ko‘pchiligini bu haftaning so‘zsiz qahramonlariga aylanishgan “PSJ” futbolchilari joy oldi.
Ederson (“Benfika”)
«Benfika» posboni jamoasining eng yaxshi o‘yinchilaridan biri bo‘ldi. Obameyangning penaltisini qaytardi. Bundan tashqari, gabonlik hujumchi bilan bir qatorda, Roys, Pulishichning xavfli zarbalarini bartaraf etib, jamoasining kichik ustunligini ta’minladi.
Toma Menye (“PSJ”)
Menye ushbu ramziy terma jamoadan joy olgan “PSJ”ning besh futbolchisidan dastlabkisidir. O‘z uyida «Barselona«ni «er tishlatgan» «PSJ» himoyachisi haqli tarzda bu terma jamoadan o‘rin olgan. O‘z qanotida Neymarni qurolsizlantira olgan belgiyalik himoyachi hujumda ham samarali o‘yin ko‘rsatdi. Uning katta masofani bosib o‘tib Kavaniga oshirgan uzatmasi yakunda parijliklarning yirik g‘alabasini ta’minladi.
Benedikt Hyovedes («Shalke 04»)
Gelzenkirxenliklar Yevropa Ligasida o‘zini juda yaxshi his etmoqda. 7 uchrashuvning 6 tasida g‘alaba ! «PAOK»ni mehmonda 3-0 hisobida yenggan «Shalke 04» jamoasi javob uchrashuvi oldidan ajoyib natijaga erishdi. Nemis jamoasi himoyachisi Hyovedes esa grek jamoasi hujumlarini ishonchli tarzda bartaraf etdi. Bundan tashqari hujumda ham jamoasining goliga assistentlik qildi.
Presnel Kimpembe («PSJ»)
Unay Emerining ajoyib kashfiyoti. Jamoa sardori Tiago Silvaning uchrashuvga yaqin qolgan bir paytda jarohat olib o‘ynay olmasligi ma’lum bo‘lgach, ispaniyalik murabbiy 21 yoshli tajribasiz Kimpembega ishonch bildirdi. MSN boshchiligidagi “Barselona”ga qarshi Kimpembe ajoyib harakat qildi. Parij himoyasi “oqsoqoli” Markinyos bilan ajoyib juftlik hosil qildi.
Emerson (“Roma”)
“Vilyarreal” mehmoni bo‘lgan rimliklar mezbonlarni ayab o‘tirishmadi. Yevropa Ligasi 1/16 bosqichi dastlabki uchrashuvidayoq keying bosqich masalasini amalda hal qilishdi. “Roma”ning braziliyalik himoyachisi esa o‘z qanotida ajoyib harakat qildi. Uning uzoqdan bergan zarbasi ajoyib gol bilan yakunlandi.
Marko Verratti (“PSJ”)
Parijliklar yarim himoyasining yetakchisi Verratti kataloniyaliklarga qarshi o‘zining eng yorqin uchrashuvini o‘tkazdi. Raqibga tinimsiz uyushtirilgan bosimlar, yarim himoyadagi sheriklarini to‘ldira olishi, uzoq va yaqin masofalarga aniq to‘p uzatishlari bilan italiyalik futbolchi uchrashuvning qahramonlaridan biriga aylandi.
Adryen Rabyo (“PSJ”)
Unay Emeri jamoasining navbatdagi qahramonlaridan biri Rabyo bo‘ldi. Tiago Mottaning diskvalifikasiyasi sababli tayanch yarim himoyachisi vazifasini o‘tashi kerak bo‘lgan Adren bahsdan oldin ko‘pchilik futbol mutaxassislari tomonidan shubha bilan qaraldi. Matyuidi bilan birga “Barselona” hujumchilarini “qurolsizlantirdi”.
Anxel Di Mariya (“PSJ”)
2017-yilni argentinalik futbolchi ajoyib tarzda boshladi. Birinchi mavsumni ko‘tarinki ruhda o‘tkaza olmagan Di Mariya atrofida turli mish-mishlar paydo bo‘la boshladi. Yangi yildan esa Anxel Di Mariya o‘zining mahoratini qayta namoyon eta boshladi. «Barselona»ga qarshi bahsda ikkita bir-biridan chiroyli gollar muallifiga aylandi. Butun o‘yin davomida juda faol o‘yin ko‘rsatdi.
Tiago Alkantara («Bavariya»)
«Arsenal«ni ayab o‘tirmagan «Bavariya» tarkibida Tiago Alkantara dublga erishdi. «To‘pchilar» himoyasini o‘ta qiyin ahvolda qoldirgan ispaniyalik futbolchi jamoasining eng faol o‘yinchilaridan biri bo‘ldi.
Karim Benzema («Real» Madrid)
«Napoli«ga qarshi bahsda Benzema ajoyib harakat qildi, deya olamiz. O‘yinning boshidayoq qulay imkoniyatni ko‘kka sovurgan bo‘lishiga qaramay, jamoasining dastlabki goliga mualliflik qildi. Karvaxalning uzatgan ajoyib zarbasini boshi bilan Pepe Reyna qo‘riqlayotgan darvozani ishg‘ol qildi. Uning bu goli Chempionlar Ligasidagi 51-goli bo‘ldi va Karim hamyurti Terri Anridan o‘zib ketdi.
Edin Jeko («Roma»)
Yevropa Ligasining 1/16 bosqichi so‘zsiz «Roma»ning bosniyalik hujumchisiga ataldi. Mehmonda «Vilyarreal» jamoasini 4-0 hisobida yenggan rimliklar safida Edin Jeko xet-trik muallifiga aylandi. 8 gol bilan Jeko Yevropa Ligasi to‘purarlar bahsida yetakchilikni mustahkamlab oldi. Butun mavsum mobaynida esa Jeko hisobida 28 gol bor.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
