«Roma» klubi va Italiya terma jamoasi yarim himoyachisi Alessandro Florensi FIFA 1904 nashriga intervyu berdi. Jarohat tufayli maydonga tusha olmayotgan futbolchi «Skuadra adzurra»ning JCH-2018 saralash bahslaridagi, «Roma»ning esa Italiya «A» seriyasidagi imkoniyatlari haqida gapirib o‘tdi.
— Alessandro, maydonga qachon qaytasiz?
— Tizzam asta-sekin tuzalib bormoqda. Vrachlarning aytishlaricha, hammasi joyida ekan. Endilikda tizzamning qanchalik «nagruzka»ni ko‘tarishini sinab ko‘ramiz.
— Siz uchun «Roma» qanday ahamiyat kasb etadi?
— Klub - ikkinchi oilam va uyim. Bolaligimda ham qachonlardir «Roma» libosida maydonga tushishni orzu qilganman. Niyatim amalga oshishi uchun esa barchasini qildim. Hozir bundan faxrlanaman.
— Franchesko Totti mavsum tugagach, faoliyatini yakunlashi mumkin. Shundan so‘ng sardorlik bog‘ichi sizga o‘tadimi?
— Kim biladi deysiz? Balki Franchesko o‘ynashda davom etar. Ayni payt vise-sardor Daniele De Rossi ekanligini unutmang. U ajoyib ishlarni amalga oshirib, haqiqiy yetakchiga aylangan.
— «Roma» 16 yillik tanaffusdan so‘ng skudettoni qo‘lga kiritishi mumkinmi?
— Albatta, bosh sovrinni «Yuventus»dan olib qo‘yish uchun qo‘limizdan kelganini qilamiz. Shu o‘rinda aytish joiz, jamoamiz kun sayin kuchayib bormoqda.
— Hozir Rimda istiqomat qilasizmi?
— Ha. Lekin markazda emas, shahar tashqarisida yashayman. Rim — mo‘’jizaviy shahar, mening uyim. Bu yerda har doim nimadir ro‘y beradi. Shaharda hamma narsa bor: tarix, madaniyat, sport.
— Nima deb o‘ylaysiz, «A» seriyasi boshqa chempionatlardan nimasi bilan farq qiladi?
— Ligamiz ishonchli tarzda avvalgi o‘rniga qaytishda davom etmoqda. Menimcha, butun Italiya, bu yerdagi klublar shuning uchun mehnat qilishmoqda. To‘g‘ri, hozir «A» seriya saviya borasida Angliya premyer-ligasiga tenglasholmaydi. Lekin yaqin orada jahonning eng kuchli birinchiliklari bilan raqobatlasha olamiz. Top-futbolchilar yana Italiya klublari bilan shartnomalar imzolashmoqda. Buning o‘zi ham ko‘p narsani anglatadi.
— Italiya terma jamoasi yana kuchlilar qatoriga kira oladimi?
— Bunga shubha bo‘lishi mumkin emas. Tarkibimizda tajribali futbolchilar bilan birga yosh iqtidorlar ham bor. Jamoaning yangi ustozi Jampyero Ventura yaxshi o‘yin ko‘rsatishimiz uchun mehnat qilmoqda. U taktik jihatdan ancha kuchli mutaxassis.
— Arrigo Sakkining «Italiya futboli o‘ta konservativ va eskirgan», degan fikrlariga qo‘shilasizmi?
— Eskirgan degan fikrga qo‘shilmaymanu, lekin taktika haqida gapiradigan bo‘lsak, italyan futboli shubhasiz konservativ.
— 2018 yili Rossiyada bo‘lib o‘tadigan jahon chempionati haqida nima deysiz?
— Har bir futbolchi o‘z terma jamoasining yirik turnirda ishtirok etishini istaydi. Yevropa chempionatida Italiya yomon o‘ynamadi. JCH-2018 saralash bahslarida ham yaxshi harakat qilmoqda. Lekin meni shaxsan qachon oyoqqa turishim qiziqtiradi. Avvaliga jarohatimni bartaraf etay, keyin mundial borasida bosh qotiraman.
— Antonio Konte yana italiyalik murabbiylarga e’tibor qaratishlariga sabab bo‘ldi. Uning o‘yin uslubi sizga yoqadimi?
— Juda ham. «Chelsi»da uning ishlari yurishayotgani men uchun yangilik emas. Konte juda ko‘p ishlaydi. Antonioning uslubi Angliyada natija berayotganidan xursandman. Aynan u tufayli Italiya futboli oldinga bir qadam tashladi. Yevroda ham yaxshi o‘yin namoyish qilganimiz uning xizmatlaridir. Antonioni juda hurmat qilaman.
— Futbolchi sifatida yana nimani istardingiz?
— «A» seriyada o‘ynashni boshlaganimdanoq istaklarim amalga oshdi, desam mubolag‘a bo‘lmaydi. Ammo yana bir-ikkita sovrin yutsam, kamlik qilmasdi.
— Yozda qiz farzandli bo‘ldingiz. U hayotingizni qanchalik o‘zgartirib yubordi?
— Bo‘lajak rafiqamni uchratgan va qizim tug‘ilgan kunlar hayotimdagi eng yaxshilaridir. Otalik mas’uliyati muhim va o‘zgacha. Turmush o‘rtog‘im, qizim va oilam eng katta yutug‘imdir. Umid qilamanki, ular uchun ham shunday. Ishonmasligingiz mumkin, jarohat tufayli ko‘proq vaqtimni qizalog‘im Penelopa bilan o‘tkazdim.
— Siz ham «Roma»da 40 yoshgacha o‘ynamoqchimisiz?
— (kuladi) Bilmadim. Yashasak ko‘raveramiz. Lekin butun oilasi «Roma»ga muxlislik qiladigan futbolchi uchun bu jamoa safida o‘ynash katta sharaf.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
