Superliganing 10-turi doirasida kechgan «Andijon» — «Dinamo» (2:1) uchrashuvidan so‘ng mezbonlar ustozi Islom Ahmedov matbuot anjumanida ishtirok etdi. Mutaxassis irodali g‘alaba, jamoadagi yangi falsafa va zahiradan tushgan futbolchilarning o‘yinga ta’siri haqida to‘xtaldi.
«G‘alaba zamirida katta jamoa mehnati yotibdi»
Islom Ahmedov dastlab barcha andijonlik muxlislarni va klub rahbariyatini muhim g‘alaba bilan tabrikladi.
«Andijon xalqini, muxlislarimizni va rahbarlarimizni ushbu qiyin g‘alaba bilan tabriklayman. «Dinamo»da yaxshi futbolchilar yig‘ilgan, ularning o‘z uslubi va tajribali murabbiyi bor. Shu bois o‘yin og‘ir kechishini bilardik. Ikkinchi bo‘limda futbolchilarimiz haqiqiy xarakter ko‘rsatishdi. Shuningdek, jamoamizning «ko‘rinmas kuchlari» — oshpazlardan tortib qorovullargacha, barcha ishchi-xodimlarimizga minnatdorchilik bildiraman. Biz bir kuch bo‘lib mehnat qilyapmiz», — dedi murabbiy.
Yangi falsafa va ichki raqobat
Murabbiy jamoa boshqaruvini qo‘lga olgach, taktik yondashuv o‘zgarganini va raqobat kuchayganini ta’kidladi.
«Biz hech qaysi raqibga moslashmasdan, o‘z o‘yin uslubimizni yaratishni boshladik. Kim o‘yin kuni optimal formada bo‘lsa, o‘sha maydonga tushadi. Samvel Babayan davrida ham qo‘ldan kelgancha yordam berdik, ammo o‘shanda omad kelmagan edi. Hozir esa boshqa falsafa asosida ishlayapmiz va bu o‘z samarasini bermoqda».
Zaxiradan tushgan «jokerlar» va ruhiy erkinlik
Uchrashuv taqdirini zahiradan maydonga tushgan Imeda Ashortia va Damir Temirovning gollari hal qildi. Ahmedov bu tasodif emasligini tushuntirdi.
«Biz futbolchilarga zahiradan tushadigan o‘yinchi emas, balki «ikkinchi bo‘limda o‘yinni kuchaytiruvchi asosiy tarkib a’zosi» ekanini singdiryapmiz. Tannafusda yigitlarga: «Xato qilishdan qo‘rqmanglar, mas’uliyatni o‘z bo‘ynimizga olamiz, sizlar futboldan rohatlaninglar», deb tushuntirdik. Shundan so‘ng ular bosimdan xalos bo‘lib, erkin o‘ynashni boshlashdi».
Maydon holati va jarohatlar haqida
Raqib tomonidan bildirilgan «maydon ataylab ostirilgan» degan fikrlarga murabbiy quyidagicha javob qaytardi:
«Bizning o‘yin falsafamiz qisqa va o‘rta paslarga qurilgan, shu bois maydon holatidan o‘zimiz ham biroz ranjidik. Bu texnik sabablar bilan bog‘liq bo‘lishi mumkin. Jarohatlarga kelsak, Golbanning oyoq mushaklarida yirtilish bor, hozir tiklanmoqda. Boltaboyev esa sog‘lom va unga ham imkoniyat beriladi».
Suhbat yakunida Islom Ahmedov «Bobur Arena»dagi muhit haqida gapirib, Andijon muxlislarining qo‘llab-quvvatlashi jamoaga qo‘shimcha kuch va shijoat bag‘ishlashini alohida e’tirof etdi.
Eslatib o‘tamiz, «Andijon» ushbu g‘alabadan so‘ng turnir jadvalida 13 ochko bilan 8-o‘ringa ko‘tarilib oldi.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
