Argentina terma jamoasi murabbiylari ish olib boradigan korpusga kirganda, ko‘zingiz ikkita katta suratga tushadi. Bu Sesar Luis Menotti va Karlos Salvador Bilardoning rasmlaridir. Argentina termasi aynan shu murabbiylar qo‘l ostida 1978 va 1986 yillarda jahon chempionligini qo‘lga kiritgan.
- Bu yerda ish boshlaganimdan buyon suratim shu devorda bo‘lishini istaganman,-deb gap boshladi «Albiseleste»ning hozirgi ustozi Edgardo Bausa FIFA.com. saytiga bergan intervyusida.— Bilaman bu sharafga erishish oson bo‘lmaydi. Chunki buning uchun kamida jahon chempionligini qo‘lga kiritishingiz kerak. Biroq aynan shunday o‘ylar ishimga sidqidildan kirishishimga yordam beryapti. Mundialda g‘olib chiqish uchun jamoani qanday tayyorlash kerakligini bilaman.
Bausa maqsadga erishish uchun qanday mashaqqatli yo‘llarni bosib o‘tish lozimligini yaxshi biladi. Shunga qaramay, u JCH-2018 saralash bahslarida Janubiy Amerika mintaqasi turnir jadvaliga e’tibor bermaydi. Ayni payt argentinaliklar 5-o‘rinni band etib turishibdi. Bu esa jamoaga faqat xalqaro o‘tish bosqichida ishtirok etish huquqini beradi, xolos.
- Turnir jadvaliga qarashimga hojat yo‘q. Shundoq ham ko‘chada har kuni eslatib turishadi. Hozirda miyamda faqat ikkita fikr bor. Birinchisi, jahon chempionati yo‘llanmasini qo‘lga kiritish. Ikkinchisi esa, Rossiyadagi turnirda finalga chiqish.
Bugun Argentina terma jamoasini og‘ir o‘yin kutib turibdi. Jamoa Buenos-Ayresda Chilini qabul qiladi. Chililiklar jadvalda to‘rtinchi o‘rinda borishmoqda va argentinaliklardan bir ochko ko‘p jamg‘arishgan. Albatta, bu o‘yinni finalga tenglasa bo‘ladi. Xabaringiz bor, Argentina qatorasiga ikkita Amerika kubogining finalida Chiliga penaltilar seriyasida imkoniyatni boy bergandi.
- Bu o‘yinni finalga tenglamagan bo‘lardim. Lekin aynan shu uchrashuv katta ahamiyatga ega. Eng avvalo, jamoadan ikkita final qarg‘ishini olib tashlash kerak. O‘sha uchrashuvlarda biz mag‘lub bo‘lmaganmiz, ammo penaltilar seriyasida yutqazganmiz. Bir so‘z bilan aytganda, Chiliga qarshi o‘yin juda muhim. Chunki jadvaldagi asosiy raqobatchimiz ham aynan Chili. Agar g‘alaba qozonsak, qarg‘ishdan qutulgan bo‘lamiz.
Bausa futbolchilarning ruhiy tushkunlikka tushishlaridan emas, balki raqibning kuchli ekanidan cho‘chiydi, xolos.
- Terma jamoamizning barcha futbolchilari sayyoraning eng yaxshi klublarida to‘p surishmoqda. Chililiklar maydon markazida ancha kuchlilar. Yaxshi pressing tashkil qilishadi va kalta paslarda o‘ynashadi.
E’tiborli tomoni, Chili terma jamoasi bosh murabbiyi Xuan Antonio Pissi Bausaning do‘stidir. Chiliga qarshi uchrashuvdan so‘ng Argentinani yana bir qiyin o‘yin kutib turibdi. Keyingi turda Bausa jamoasi dengiz sathidan 3600 metr balandlikda joylashgan Boliviya poytaxti La-Pasga tashrif buyuradi.
- Barchasi vaziyatga bog‘liq. Dastlab Chiliga qarshi o‘ynaymiz. Undan keyin o‘z maydonida juda kuchli hisoblangan Boliviya bilan o‘yin kutib turibdi. Boliviyaliklar ham jadvaldagi o‘rinlarini o‘nglab olishga harakat qilishmoqda.
Boliviya joriy saralash bosqichida o‘z maydonida ikkita o‘yinda g‘alaba qozondi. Bausa Ekvadorning «LDU Kito» jamoasida besh yil faoliyat olib borgan. Shunday ekan, tog‘ sharoitida qanday o‘ynash lozimligini yaxshi biladi. Zamonaviy jamoalar kombinasion futboldan tashqari, bo‘lajak o‘yinga qanday reja tuzishni ham yaxshi o‘zlashtirib olishdi. So‘nggi 20 daqiqada kuchli o‘yin namoyish qilish muhim. Argentinaliklar ustozining aytishicha, uning jamoasi keraksiz besh ochkoni yo‘qotgan. «Albiseleste» kutilmaganda o‘z maydonida Paragvayga imkoniyatni boy berdi va Peru bilan durang o‘ynadi. Agar shu bahslarda 100 foizlik natija qayd etilganida, Argentina terma jamoasi turnir jadvalida yuqoriroq o‘rinda bo‘lishi aniq edi. Shu bois ham navbatdagi ikkita tur argentinaliklar uchun muhim ahamiyat kasb etadi.
- Bizning mintaqada turnir jadvali bunchalik tig‘iz bo‘lganini eslay olmayman. Agar Chilini mag‘lub etsak, mundialga chiqish uchun ajoyib imkoniyatga ega bo‘lamiz. Bu futbolchilar va mamlakat xalqi uchun ajoyib voqelik bo‘lardi. Hayot meni shu narsaga o‘rgatdi - omadsizlik va omadning orasidagi farq o‘ta qisqa. Ammo o‘z oldimga hamisha yuqori maqsadlarni qo‘yaman va g‘alabaga hamisha ishonaman.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
