Angliya terma jamoasining sobiq sardori Ueyn Runi «Manchester Siti» bosh murabbiyi Xosep Gvardiolani «Manchester Yunayted»ning afsonaviy ustozi Aleks Fergyuson bilan taqqosladi.
Runining so‘zlariga ko‘ra, aynan Gvardiola o‘z davrining eng yaxshi murabbiyi hisoblanadi, Fergyuson esa ingliz futbolining avvalgi avlodida hukmronlik qilgan.
«Men uning Aleks Fergyuson bilan taqqoslanganini ko‘p ko‘rdim. Men uchun Fergyuson — barcha davrlarning eng buyuk murabbiyi, ammo Pep o‘z avlodida, shubhasiz, katta farq bilan eng zo‘ridir», — dedi Runi BBC efirida chiqish qilar ekan.
Gvardiola mavsum yakunlanganidan keyin «Manchester Siti»ni tark etishi kutilmoqda. Ispaniyalik mutaxassis jamoadagi faoliyati davomida 20 ta sovrinni qo‘lga kiritdi, ular orasida 6 ta chempionlik tituli va Chempionlar Ligasidagi g‘alaba ham bor.
«Hamma Gvardiolaning bitta klubda 10 yil davomida ishlagani qanchalik aql bovar qilmas holat ekani haqida gapirmoqda. Ammo Fergyuson «MYU»da 26 yil davomida faoliyat yuritgan. Bu muddat haqida o‘ylab ko‘rsangiz — shunchaki hayratda qolasiz», — dedi sobiq hujumchi.
Runi, shuningdek, murabbiylarni to‘g‘ridan-to‘g‘ri taqqoslash qiyinligini ta’kidlab o‘tdi. «Fergyuson «Yunayted»ga kelgan vaqtda klub butunlay boshqacha vaziyatda edi. U jamoani amalda qaytadan qurishi va uni ingliz futboli cho‘qqisiga qaytarishi kerak bo‘lgan. Pepga esa hamma narsani noldan boshlash to‘g‘ri kelmadi».
Shu bilan birga, Runi Gvardiolaning ingliz futboliga o‘tkazgan ta’sirini yuqori baholadi. «U ingliz futbolining qiyofasini butunlay o‘zgartirib yubordi. Uning g‘oyalari butun tizim bo‘ylab — top-klublardan tortib, bolalar va havaskorlar jamoalarigacha tarqaldi. Darvozabondan boshlab qisqa paslar orqali o‘ynash, to‘p nazorati — bularning barchasi Pep tufayli oddiy holga aylandi».
Eslatib o‘tamiz, «Manchester Siti»da Gvardiolaning o‘rnini Enso Mareska egallashi kutilmoqda.