Yurtimizdagi yoshlarning bo‘sh vaqtini mazmunli o‘tkazish va futbolga bo‘lgan qiziqishidan kelib chiqqan holda, Uzreport TV telekanali O‘zbekiston Virtual sport o‘yinlari va Kiberfutbol federasiyasi bilan hamkorlikda “Futbol Tv Cup” deb nomlangan Kiberfutbol bo‘yicha yurtimizdagi 1-Xalqaro musobaqa tashkil etishga qaror qildi.
Musobaqa shu yilning 22-27 may kunlari bo‘lib o‘tadi.Ushbu musobaqada yurtimizdagi kiberfutbolchilar bilan bir qatorda Rossiya, Ukraina, Belarus, Ozarboyjon, Eron, Moldova, Belgiya, Fransiya, Shvesiya kabi davlatlardan tashrif buyuradigan mashhur kiberfutbolchilar ishtirok etishi ko‘zda tutilgan.
Ishtirokchilar asosan 18 yoshdan katta bo‘lgan kiberfutbolchilar hisoblanib, ularning soni 48 nafarni tashkil etishi kutilmoqda.Ishtirokchilar orasida sog‘lom turmush tarzini targ‘ib qilish maqsadida, musobaqa davomida xalqaro kiberfutbolchilar terma jamoasiga qarshi O‘zbekiston kiberfutbolchilari o‘rtasida o‘rtoqlik futbol uchrashuvi o‘tkazish ham mo‘ljallangan.
Shuningdek, chet ellik kiberfutbolchilarni yurtimiz bilan yaqindan tanishtirish maqsadida, ularni Samarqand shahriga sayyohatga olib chiqib, yurtimizning tarixiy obidalari va madaniy yodgorliklarini ko‘rsatish ham rejaga kiritilgan.
Ushbu “Futbol Tv Cup” Xalqaro musobaqasi yurtimizdagi kiberfutbolchilarga kelgusida bo‘lib o‘tadigan nufuzli xalqaro turnirlarda munosib ishtirok etish uchun qulay imkoniyat hisoblanadi.Musobaqa g‘oliblariga homiylar tomonidan qimmatbaho buyumlar va boshqa esdalik sovg‘alari topshirish ko‘zda tutilgan.