Bugungi futbolni Messining ajoyib o‘yini va gollarisiz tasavvur qilib bo‘lmaydi. Leo shunday harakat qiladiki, himoyachilar uni to‘xtatib qolishga juda-juda qiynalishadi. Xo‘sh, sahifamiz qahramonining siri nimada?
Messi to‘p bilan harakatlanganda qo‘lini pastga tushirib oladi va hech narsaga parvo qilmay, nigohlarini to‘pdan uzmaydi. U dastlab himoyachilarni aldashga kirishadi, bu paytda sekin harakatlanadi. Atrofida himoyachilar yig‘ila boshlagach, kutilmaganda tezlashib, ularni birin-ketin ortda qoldiradi. U hech qachon bir tekis harakatlanmaydi. Dam o‘ngga, dam chapga burilib, yo‘nalishini o‘zgartiradi va himoyachilarni chalg‘itadi. Tezda kutilmagan qarorlar qabul qilishi bois himoyachilar bu borada oldindan bashorat qila olishmaydi.
Messida hujumchi uchun eng muhim bo‘lgan jihat — to‘pning qaerda ekanligini his etish va kerakli vaziyatda qaerda paydo bo‘la olish imkoniyati mavjud. U to‘pni saqlab turishda gavdasidan foydalanadi. Garchi jussasi kichik bo‘lsa-da, jismoniy jihatdan ancha baquvvat.
Argentina yulduzining futbol borasidagi tasavvuri o‘zgacha, xususan, u bu haqda shunday deydi:
— Sen futbolchimisan, demak, futbolni yaxshi ko‘rishing shart. Qanchalik?.. Xuddi men kabi. Men uch yoshligimdan to‘p tepishni boshlaganman. Uyqudan turganimda ham, kunduzi ham, kechqurun ham futbol o‘ynardim. Hatto kechqurunlari uyda ham futbol o‘ynardim. Uydagi hamma idishlarni sindirib chiqqanman. Onam esa buni ko‘rib, aqldan ozishiga bir baxya qolardi...
Leo mashg‘ulot uchun doimo qiyin sharoitlarni tanlardi. O‘zining ta’kidlashicha, odatda, mashg‘ulot uchun qumloq, changalzor, umuman, to‘p siljishi, to‘pni tepish qiyin bo‘lgan joylarni tanlar, kamdan-kam hollarda tekis maydonga murojaat qilar ekan. Natijada changalzor-u qumloqlarda bemalol koptok bilan muomala qilishni o‘rgangan Messi uchun stadionda to‘p tepish hech qanday muammo tug‘dirmasdi.
SALFETKADA TUZILGAN SHARTNOMA
«Barselona» klubi futbol direktori Karlos Reksacha Messining o‘yinini bevosita ko‘rib, shunaqa qiziqib qoladiki, darhol shartnoma tuzishni xohlaydi. Yonida hech qanday hujjat yoxud boshqa qog‘oz bo‘lmagani uchun Reksacha Leoni restoranga taklif qilib, ular o‘rtasidagi dastlabki shartnoma salfetkada imzolanadi.
Keyinchalik Messining «Barsa» tarkibida ko‘rsatgan o‘yini Ispaniya futbol mutasaddilarining e’tiborini tortadi. Hujumchi 2005 yilning sentyabrida Ispaniya fuqaroligini olganidan so‘ng hatto uni Ispaniya terma jamoasi safida to‘p surishni taklif qilishadi. Ammo Leo Argentina terma jamoasini afzal ko‘radi.
BAXTLI INSON, BAXTIYOR OTA...
Messi argentinalik modeler Antonella Rokkuzzo bilan turmush qurgan. 2012 yilning 2 noyabrida, ya’ni juma kuni Messiga otalik baxti nasib qildi. Bu Leoning birinchi farzandi — o‘g‘li edi. Dunyo futbol yulduzlari bu xushxabar bilan Messini tabriklashdi. Messi esa aynan shu kuni «Facebook» orqali butun dunyoga jar soldi: «Bugun men dunyodagi eng baxtli insonman. Chunki mening o‘g‘lim dunyoga keldi. Buning uchun Yaratgandan minnatdorman. Bu sovg‘a uchun ayolimga ham tashakkur. Barchangizni yaxshi ko‘raman...»
U farzandiga Tiago Lionel Xorxe Andreas Messi deb ism qo‘ydi. Bu ismning o‘ziga xos ma’nosi bor, ya’ni Tiago ismi «Barsa»ning boshqa bir o‘yinchisi — Tiago Alkantara sharafiga qo‘yilgan. Xorxe esa buvasining ismi bo‘lib, Andreas esa Leoning jamoadoshi Andreas Iniestaning ismiga atab qo‘yilgan.
Bu voqea yana bir qiziqarli faktga sabab bo‘ldi. Portugaliyalik yulduz Krishtianu Ronaldu Messidan 869 kunga katta bo‘lsa, Messining farzandi ham Ronaldunikidan 869 kun keyin tug‘ildi. Ya’ni Krishtianu Junior 2010 yilning 17 iyunida dunyoga kelgandi.
AUTIZMNI YENGISH YO‘LI
Bugungi kunda Messi o‘z fondini ochgan va u orqali ko‘plab xayriya mablag‘lari ajratmoqda. Jumladan, uning fondi X sindromi tanqisligi hamda autizm bilan kasallanganlarni davolash uchun katta mablag‘ ajratadi. Leo, shu bilan birga, UNISEF a’zosi hisoblanadi.
LIONEL MESSI — NONUSHTADA
Messi, asosan, sut va go‘shtli taomlarni, shuningdek, go‘sht qovurishni juda yaxshi ko‘radi. Yana makaronli ovqatni ham sevib iste’mol qiladi. Futbolchining kunlik iste’mol qiladigan taomlari kaloriyasi 2400-3000 kkal ni tashkil etadi. Bu mahsulotlar tarkibiga, asosan, non, kartoshka, makaron, yorma, yog‘siz sut mahsulotlari, meva-sabzavot kiradi.
Ertalabki axborot dasturlarini muntazam ko‘rib boradi. Shuningdek, «Samba» va «Kumbi» milliy musiqalarini tinglashni yoqtiradi.
Lionel o‘zini argentinalik inqilobchi Che Gevaraga qiyoslaydi.
Messi hamma narsani kechirishi mumkin, ammo haqoratni emas. U qanchalik ko‘ngilchan bo‘lmasin, sha’nini yerga urgan odamga nisbatan bemehr.
U ko‘pincha yolg‘izlikni yaxshi ko‘radi.
Italiya termasi hamda «Inter» jamoasi hujumchisi Antonio Kassano ikkinchi farzandini Messining ismi bilan atagan.
— Bu birinchi farzandim tug‘ilganidan keyingi ikkinchi quvonchim, — deydi italiyalik yulduz «Undici» teleshousida bergan intervyusida. — O‘g‘limga Messining ismini berishimga sabab, uning ham tarixda nomi qoladigan futbolchi bo‘lishini istayman. Ayolim futbolga qiziqmaydi, ammo unga ham Messining o‘yini yoqadi. Mening tasavvurimda, Messi — tarix uchun juda muhim bo‘lgan o‘yinchi. Menga uning nafaqat o‘yini, balki xarakteri ham yoqadi...
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
