Yaponiyalik 31 yoshli Keysuke Xonda Rossiya chempionatidagi yorqin o‘yinlari bilan esda qolgan. Ammo u Moskvaning SSKA klubini mojaroli tarzda tark etgandi.
Bir-ikki yil oldin SSKA rahbari Yevgeniy Giner «Xondadan tashqari barcha sobiq futbolchilarimiz bilan yaxshi aloqadamiz», degandi.
O‘shanda u «SE» muxbirining «Xonda bilan ko‘rishib qolsangiz so‘rashasizmi?» degan savoliga «Yo‘q. Xondaning transferidan bir chaqa ham olmaganmiz. U bu borada yagona futbolchi. Chunki u bizni aldagan.
U bizga shartnomani uzaytirmoqchi ekani va hech qayerga ketmasligini aytgan. Aslida esa arzimas pul evaziga «Milan»ga o‘tmoqchi bo‘lgan. Endi esa uni bizga tekinga taklif qilishyapti. Uni qayergadir joylab qo‘yishmoqchi», deb javob qaytargandi.
Keyinchalik «Milan» sharafini himoya qilgan futbolchi ayni paytda Meksikaning «Pachuka» klubi safida to‘p surmoqda. Uning jamoasi Klublar o‘rtasidagi jahon chempionatida uchinchi o‘rin sohibiga aylandi.
Biroq Xonda BAAning «Al-Jazira» klubiga qarshi uchrashuvda maydonga tushmadi. O‘yindan so‘ng «Sport -Ekspress» nashri muxbirlari Xonda bilan suhbatlashishdi.
- «Pachuka»ning turnirda uchinchi o‘rinni olishi yaxshi natijami?
- Finalga chiqishimiz mumkin edi. Ammo umuman olganda yomon natija emas.
- Yaqinda Yaponiya matbuotida «Pachuka»ni tark etishingiz mumkinligi haqida yozishdi. Shundan so‘ng 3-o‘rin uchun kechgan bahsda maydonga tushmadingiz. Haqiqatdan ham muammolar bormi?
- Bu shunchaki mish-mish. Yaponiyada bundan qandaydir jiddiy yangilik yasashgan. Aslida esa bunday emas. Meksikadan ketish niyatim yo‘q. Shartnomam may oyida nihoyasiga yetadi.
Shuningdek, yaqin orada Yevropaga qaytmoqchi emasman. O‘sha uchrashuvda o‘ynamaganimning sababi, tizzamdagi jarohat tufayli maydonga tusholmadim.
Murabbiy bilan kelishgan holda Meksika kubogining finalidan o‘rin olgan «Monterrey»ga qarshi uchrashuvga tayyorgarlik ko‘rganim yaxshi degan qarorga keldik. Ushbu uchrashuv 21 dekabr kuni bo‘lib o‘tadi.
- SSKAni kuzatasizmi? Ularning o‘yinlarini tomosha qilyapsizmi?
- Yo‘q.
- Umumanmi?
- Ularning bu mavsum Chempionlar Ligasida o‘ynashganini bilaman. Shuningdek, u yerda hamon do‘stlarim o‘ynayotganidan xabarim bor.
- Ular bilan gaplashib turasizmi?
- Yo‘q.
- Nima uchun? Jamoa safida bir necha mavsum to‘p surdingiz. Nahotki, «qizil-ko‘k» ranglar siz uchun jonajonga aylanmagan bo‘lsa?
- Gap unda emas. Ularni do‘stlarim deb bilaman. Shunchaki, men shunaqa insonman. Bizda, Yaponiyada o‘tmishni kavlayverishmaydi.
- Unda keling, kelajak haqida gaplashaylik. Yozda terma jamoangiz bilan Rossiyaga qaytsangiz kerak. Alohida tuyg‘uni his qilyapsizmi?
- Shunaqa desa ham bo‘ladi. Yaponiya terma jamoasi safida Rossiyada o‘ynash, do‘stlar bilan yana ko‘rishish - ajoyib. Lekin buning uchun yanvardan iyunga qadar tinimsiz mehnat qilishga to‘g‘ri keladi. Agar forma joyida bo‘lmasa, ro‘yxatga kiritilmasligim mumkin. Unda bugungi suhbatimiz bejizga ketadi.
- Aytgancha, Leonid Sluskiyning Angliyada ishlaganidan xabaringiz bormi?
- Ha. Bu meni ajablantirmadi. SSKAda o‘ynab yurgan kezlarimda ham u ingliz tilini o‘rganardi.
Shu bois ham uning Angliya yoki boshqa mamlakatga ketishini tasavvur qilgandim. Uning keyingi faoliyatiga omad tilayman. Menimcha, Sluskiy Yevropaning kuchli jamoasini boshqarishga qodir.
- O‘shanda siz va Yevgeniy Giner o‘rtasida nima o‘tgandi?
- Aytarli mojaro bo‘lmagan. Futbol nafaqat o‘yin, balki biznes hamdir. Shunday ekan, bu industriyada futbolchi ketishni xohlaydi, klub uni qo‘yib yubormaydigan holatlar bo‘lib turadi. Bizda ham shunday bo‘ldi. Menga erkinlik berishmagandi.
- Keyinchalik «Milan»ga o‘tib xato qildim, degan fikrga kelganmisiz?
- Aslo.
Abdulloxon Isroilxonov
Surxon
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
