Tahririyatimizga Jizzaxdan kelgan maktubda bayon etilishicha, ashaddiy va jonkuyar futbol muxlisi Bahrom Siddiqov yaqinda qutlug‘ 80 yoshini qarshilaydi. Mahalliy muxlislar otaxoni, sport faxriysi vaqtida «So‘g‘diyona» jamoasida ishlagan va chempionatimizning bronza medali sovrindori bo‘lgan. Bahrom otaning «Jonu-dilimsan futbol» nomli kitobidan qancha-qancha muxlislar bahra olishgan. U kishi ayni payt Jizzax futboli tarixi haqida risola yozmoqda. Umuman, jizzaxliklar Bahrom Siddiqovning viloyat futboli rivoji yo‘lidagi xizmatlarini yuksak baholab, alohida qadrlaydilar. Yubiley bahona tinib-tinchimas Bahrom otani muxlislar va tahririyatimiz nomidan qizg‘in qutlab, u kishiga sog‘lik-salomatlik, uzoq umr va ijodiy parvozlar tilaymiz. Ijodlaridan quyidagi parchalar esa gazetamiz o‘quvchilariga armug‘on...
Darvozabon Aleksandr Lobanovga
Yangi mavsum boshlansa,
Darvozangga qulf ilgin.
Lev Yashindek «qoplon»ni,
O‘zingga ustoz bilgin.
Himoyachi Vitaliy Denisovga
Raqiblarni sol qiynoqqa,
O‘tib bo‘lmas dovonim.
Yashil maydon quchog‘ida,
Bo‘l, mashhuri zamonim.
Yarim himoyachi Server Jeparovga
Sen bo‘lmasang maydonda,
Burchak to‘pin kim tepar?
Iqtidorli yoshlar kammi,
Qani ayt, Server Jepar?
Hujumchi Igor Sergeevga
Ko‘rsat uka, ukajon,
Hujumchiga xos o‘yin.
Toki Marat, Sasha ham,
Egsinlar, oldingda bo‘yin.
Murabbiy Samvel Babayanga
«Ozodi»yu, Chin yurtida,
Tepki olishga ko‘ndingiz.
Go‘zal Moskov hajrida,
Parvonadek kuydingiz.
Murabbiy Ro‘ziqul Berdiyevga
Iligi to‘q, yuragida o‘ti bor,
Murosasiz zo‘r jamoa tuzdingiz.
Qo‘sha-qo‘sha g‘alabalar bo‘lsa yor,
El-ulusga dadil boqar ko‘zingiz.
Sharhlovchi Eldor Mustafoyevga
Chala-chulpa jumlalar,
Bezayversa sharhingiz.
Didi baland ishqiboz,
Pasaytirar narxingiz.
Muxlis Bahrom Siddiqovga
Futbol ortidan jon bobo,
Ko‘p narsadan kechdingiz.
Hazil qilib bu oqshom,
Dil chigilin yechdingiz...
«Pul o‘lsin» - kulmang
Kimlarnidir o‘ylatib,
Yolg‘on-yashiq so‘ylatib.
O‘pqon nafsni qondirgan,
«Pul o‘lsin» - kulmang.
Yo‘q qilib «Futbol sharhin»,
Oshirib chipta narxin.
Muxlis ko‘zin tindirgan,
«Pul o‘lsin» - kulmang.
Yonar o‘tda kuymayin,
«Jang» qilishga qo‘ymayin.
Futbol shashtin so‘ndirgan,
«Pul o‘lsin» - kulmang.
Bosh hakamni ko‘ndirib,
Qo‘lga qushdek qo‘ndirib.
Uch ochkoni undirgan,
«Pul o‘lsin» - kulmang.
Hilpiratib bayroqni,
Farqlamay qora-oqni.
Hujum o‘tin so‘ndirgan,
«Pul o‘lsin» - kulmang.
Dam bermayin hushtakka,
Kech qoldirib gashtakka.
Bahrom dilin yondirgan,
«Pul o‘lsin» - kulmang.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
