Yevropa futbol ittifoqi 26 fevral kuni o‘zining navbatdagi Kongressida tarixiy qaror qabul qilib, a’zolari sonini 56taga yetkazishi mumkin edi.
Biroq mittigina Jersi oroli futboli rahbariyatining arizasiga ijobiy javob berilmadi. Chunonchi, La-Mansh bo‘g‘ozidagi bu orolcha BMT tomonidan tan olingan mustaqil mamlakat hisoblanmaydi.
Geografiya darsi
Jersi - La-Mansh bo‘g‘ozidagi orolcha. U Normandiya orollari tarkibiga kiradi. Hududi - 116 km|kvadrat. Aholisi - 100 ming kishi. Jersi Fransiya sohillariga juda yaqin.
Oradagi masofa atigi 20 kilometr. Vaholanki, orol Britaniya qirolligi mulki hisoblanadi. Biroq deylik, Angliya qirg‘oqlaridan naq 150 kilometr uzoqda joylashgan.
Siyosiy tuzilma
Ha, Jersi oroli Buyuk Britaniyaning muayyan qismi sanalmasada, shu qirollik tasarrufida. Lekin orolda o‘z hukumati, vazirliklari bor. Xullas, jersiliklar qonunlarni mustaqil ravishda qabul qiladilar, soliq tushumlarini o‘z ehtiyojlariga sarflaydilar. Shunga qaramay, orolning asosiy rahbari tayin - Buyuk Britaniya qirolichasi.
Umuman, Britaniya hukumati Jersining muhofazasi va xalqaro ishlariga javobgardir. Jersi futboli rahbarlari UYEFA tarkibiga kirish uchun «zayavka» berishda ayni shu nisbatan mustaqil tuzumni asos qilib olishgandi. «Bizda alohida parlament, hukumat, qonunlar va soliq tizimi ishlayapti», - dedi Jersi futbol assosiasiyasi boshlig‘i Fil Ostin.
Biroq bu UYEFA oilasining teng huquqli a’zosi bo‘lish uchun kam. Zero, Yevropa futbolining oliy organi 2007 yili o‘z Nizomiga tuzatishlar kiritgandi. Yangi qoidalar bo‘yicha UYEFA faqat BMT tomonidan tan olingan mustaqil mamlakatlarni o‘z tarkibiga qo‘shib olishi mumkin.
Aslida UYEFA tarkibida yangi tahrirdagi Nizomga muvofiq kelmaydigan a’zolar ham bor. Misol uchun, Farer orollari va Gibraltar mustaqil davlat emas, biroq har ikkisi UYEFA oilasiga Nizom o‘zgartirilganidan oldin qo‘shilgan.
Yana bir tomoni borki, Jersi boshqa sport turlarida mustaqil qatnashmoqda. Deylik, orolning kriket terma jamoasi 2015 yili nufuzli xalqaro turnir final «pulka»siga chiqqandi.
Futbol holati
Orol oliy ligasida 13ta jamoa bor (aholi soniga nisbatan olganda, ancha ko‘p). Shuning barobarida Jersi terma jamoasi muntazam ravishda Orol o‘yinlari turnirida ishtirok etadi. 2 yilda bir marta tashkillashtiriladigan bu musobaqada aynan qaysidir jihatdan mustaqil sanalgan mitti hududlar jamoalari qatnashadi.
Darvoqe, keyingi turnir (Orol o‘yinlari-2019)ga Jersi jamoasi bormaydi. Chunki unda futbol musobaqasi bo‘lmaydi (mezbon - Gibraltarda buning uchun shunchaki, maydonlar yetishmaydi). Jersi jamoasi shuningdek, oldinlari Gibraltar, Farer, Bermud va Kayman orollari termalari bilan doimiy ravishda o‘rtoqlik o‘yinlari o‘tkazardi.
Biroq ular FIFA va UYEFA tarkibiga kirgach, jersiliklar munosib sparring-raqiblarni yo‘qotishdi. Endilikda orolliklar ba’zan Fransiya va Buyuk Britaniya klublari bilan kuch sinashishmoqda.
E’tiborlisi, Jersi futbol assosiasiyasi bitta klubni Angliya quyi divizionlaridan biriga joylashtirishga ham urindi. Ammo bu g‘oya samarasiz ko‘rindi. Birinchidan, masofa uzoq va har bir safar o‘yini 200 km. yo‘l bosishni talab etadi.
Qisqasi, bu moddiy tomondan juda og‘ir. Ikkinchidan, oroldagi eng kuchli futbolchilarni bitta klubga jalb qilishganida, hudud chempionati tanazzulga uchrashi hech gap emasdi.
Mashhur futbolchilar ham bormi?
DAVOMI
InterFutbol.uz ning Telegram dagi sahifasiga ulaning – eng so‘nggi yangiliklar, qiziqarli bloglar va tahliliy materiallar endi bir to‘plamda.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
