Germaniyaning afsonaviy darvozaboni, Yevropa chempioni va Jahon chempionati kumush medali sovrindori Oliver Kanning akademiyasi ijrochi direktori Moris Mattes va menedjeri Robert Niyemann yurtimizga tashrif buyurishgani haqida avval xabar berib o‘tgandik.
Germaniyalik mutaxassislar bugun O‘zbekiston milliy olimpiya qo‘mitasi prezidenti va O‘zbekiston futbol assosiasiyasi 1-vise-prezidenti Umid Ahmadjonov bilan uchrashishdi.
Uchrashuv davomida Umid Ahmadjonov yaqinda muhtaram prezidentimiz Shavkat Mirziyoyev tomonidan imzolangan qarorga ko‘ra yurtimizda Ixtisoslashtirilgan Davlat maktab-internatlari bazasida 14ta hududiy bolalar va o‘smirlar futbol akademiyalari va O‘zbekiston futbol assosiasiyasi qoshidagi Respublika bolalar va o‘smirlar futbol akademiyasini tashkil qilish belgilab qo‘yilgani haqida aytib o‘tdi. Mazkur akademiyalarda Yevropaning futboli rivojlangan mamlakatlari akademiyalari tizimini joriy qilish va shu yo‘l orqali akademiya tarbiyalanuvchilarini yangicha zamonaviy uslubda tayyorlash asosiy maqsad ekanini ta’kidlar ekan, Germaniyaning “Oliver Kan akademiyasi” bilan hamkorlikni yo‘lga qo‘yish ayni muddao bo‘lishini aytib o‘tdi.
Yurtimizdagi akademiyalarda kuchli va yuqori saviyali futbolchilarni yetishib chiqishini ta’minlashda “Oliver Kann akademiyasi”ning boy tajribasi, zamonaviy uslublari, samarali metodikasi qo‘l kelishini ta’kidlab o‘tdi.
Shuningdek, Umid Ahmadjonov afsonaviy darvozabon Oliver Kanning o‘zini ham yurtimizga taklif qildi.
Moris Mattes va Robert Niyemann “Bunyodkor”dagi akademiyaga tashrif buyurib, u yerdagi shart-sharoitlar, o‘qitish uslublari bilan yaqindan tanishishadi. Keyin yurtimizdagi futbol akademiyalarida zamonaviy uslublardan foydalangan holda o‘quv tizimini yo‘lga qo‘yish borasida o‘z takliflarini taqdim qilishadi.