Kim o‘ylabdi deysiz, bunaqangi keskinlik, bunaqangi shiddatli matchlarni superliga bizga taqdim etadi deb. To‘g‘risi, bu haqida maqola yozishimga Internet sahifalaridagi “Navbahor” - “Bunyodkor” uchrashuvidan so‘ng ishlangan maxsus videorolik turtki bo‘ldi. Bugun baholi qudrat Superliganing o‘tgan yetti turidagi eng xavfli, hujumkor o‘yinchilari Top yettiligini taqdim etamiz. Marhamat!
7-o‘rin. Elguja GRIGALASHVILI
“Qizilqum” o‘yinchisi Grigalashvili o‘zining noodatiy hujumkorligi bilan ko‘pchilikning e’tiboriga tusha oldi. U bu mavsumda xet-trik qayd etishga ham ulgurgani bunga misol. Jamoasining unchalar ham ishi yurishmayotganiga qaramasdan, u jamoada yo‘qolib qolmayapti. O‘ylashimizcha, bu yigit mavsum mobaynida hali “Qizilqum” muxlislarini ko‘p bor xursand qila oladi.
6-o‘rin. Sardor SOBIRXO‘JAYEV
Sardor o‘zining aqlli o‘yin ko‘rsatishi bilan boshqa markaziy yarim himoyachilardan biroz farq qiladi. Mirjalol Qosimov undan shunday foydalanmoqdaki, Sardor bu mavsumda bir necha bor gollarga asistentlik qilishga ulgurdi. U uncha yuqori bo‘lmagan tezlik bilan ham maydonda ancha-muncha narsalarga ulgurayotgani taxsinga sazovor. Undan yana gol+paslar kutib qolamiz!
5–o‘rin. Aziz IBRAGIMOV
Ulug‘bek Baqoyevning “joker qartasi” sifatida bu mavsumda namoyon bo‘layotgan iqtidorli hujumchi Aziz Ibragimovning tajribasi ulkan. U xorijiy chempionatlarda ham o‘zini ko‘rsata olgan edi. Endi yurtimiz ichki chempionatida ham chakki ko‘rinmayapti. U jamoasining so‘nggi daqiqalardagi juda ko‘p gollarida faol ishtirok etmoqda.
4-o‘rin. Suhrob NURULLOYEV
“Metallurg” jamoasing 7-raqamli o‘yinchisi bu mavsumda katta tezlik egasi ekanligini ko‘rsata oldi. Ayniqsa, “Nasaf” darvozasiga urgan goli bunga yaqqol misol bo‘la oladi. “Metallurg” hozircha Superligada chaqilmas yong‘oqdek ko‘rinyapti. O‘ylaymizki, mavsum oxirigacha shunday bo‘lib qoladi.
3-o‘rin. Arslonmurod AMONOV
“Buxoro” jamoasining o‘ziga xos “dinamidi” bo‘layotgan o‘yinchi nafaqat gollari bilan, balki ajoyib passlari bilan ham hammani o‘ziga qarata olmoqda. U “Buxoro” jamoasida o‘z o‘yinini to‘liq ko‘rsatmoqda. Mavsumdagi AGMKga qarshi “super kambek”da ham uning hissasi katta edi. Arslonmurod shu ketishda hademay poytaxt jamoalari qiziqishi doirasiga tushib qolsa ham ajab emas.
2-o‘rin. Javlon IBROHIMOV
“Bunyodkor”ning yana bir foydali yarim himoyachisi. U tayanch zonasida harakatlanishiga qaramasdan bu mavsum bir nechta gollarni urishga erishdi. ”Bunyodkor”ning ishonchli o‘yinlarida hamda “qaldirg‘ochlar” turnir jadvalini boshqarib borishida Javlonning hissasi katta. U raqib hujumini ustalik bilan buzib, jamaosining hujumlarini boshlamoqda. Bunday yarim himoyachilar zamonaviy futbolda juda defisit.
1-o‘rin. Aziz TURG‘UNBOYEV
Bu yigitcha hozirda ichki chempionatimizda, e qo‘yingki, O‘zbekistondagi eng iqtidorli futbolchi deb hisoblanmoqda. Uning o‘yinlaridan odam zavq olayapti. Ayniqsa, Namangandagi uy uchrashuvlarida u umuman boshqacha harakatlanmoqda. Maydonda istaganini amalga oshirmoqda. Qanotlardan markazga yorib o‘tmoqda, markazda bo‘lsa qisqa masofada bir necha o‘yinchilarni aldab o‘tib ketmoqda. Hatto uning o‘yinlarini Mirjalol Qosimov ham bejiz alohida qayd etmadi. Aziz hozirgi kunda Superligadagi eng foydali o‘yinchi bo‘lmoqda. Shunday ishlashda davom etsa, hademay Milliy terma jamoada xam debyut qilsa ajab emas. Undan faqat bitta narsani iltimos qilardik. Ishlashda to‘xtab qolma, Aziz. Sendan umidlarimiz katta.
Bu shunchaki reyting, xolos. Buni tuzishdan asosiy maqsadimiz 0151 Superliga o‘yinlariga qiziqishni ozgina bo‘lsa ham ko‘paytirish. Agar bu ketish bo‘lsa, tez orada bizning chempionatimizga reklama ham kerak bo‘lmay qoladi. Chunki muxlislar bunday shiddatli va keskin o‘yinlarni stadiondami, TV qarshisidami, internetdami farqi yo‘q, maza qilib tomosha qilishmoqda. Superliganing o‘ziga yarasha O‘zbekiston futboli uchun foydali tomonlari juda ko‘p. Eng asosiysi esa baribir terma jamoa uchun kadr tayyorlash. Hozirgi o‘zbek futboli har doimgidanda ko‘proq yangi yulduzlarga muhtoj. Biz sendan yulduzlarni kutib qolamiz, Superliga!
Yahyoxo‘ja ULUG‘XO‘JAYEV
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
